రేషన్ కార్డు ఉన్నవారందరికీ,,,సన్నబియ్యం

తెలంగాణ ప్రజలకు రేవంత్ రెడ్డి సర్కార్ మరో పండుగలాంటి శుభవార్త వినిపించనుంది. ఉగాది పండుగ సందర్భంగా ప్రభుత్వం కానుక అందించనుంది. అసెంబ్లీ ఎన్నికల్లో ఇచ్చిన హామీలను రేవంత్ రెడ్డి సర్కార్ ఒక్కొక్కటిగా నెరవేరుస్తూ వస్తోంది. కాగా.. జనవరి 26న రిపబ్లిక్ డే సందర్భంగా.. కొత్త రేషన్ కార్డుల పంపిణీ, ఇందిరమ్మ ఇండ్ల పంపిణీ, రైతు భరోసా, ఇందిరమ్మ ఆత్మీయ భరోసా పథకాలను ప్రారంభించిన రేవంత్ రెడ్డి సర్కార్.. ఇప్పుడు మరో హామీని అమలు చేసేందుకు సిద్ధమవుతోంది. ఎన్నికల్లో ఇచ్చిన మాట ప్రకారం.. రేషన్ కార్డు ఉన్నవారందరికీ.. సన్నబియ్యం పంపిణీ చేసేందుకు ప్రభుత్వం కసరత్తు చేస్తోంది. కాగా.. ఉగాది పండుగ నుంచే సన్నబియ్యం పంపిణీ చేసేందుకు అధికారులు చక చకా ఏర్పాట్లు చేస్తున్నారు.

ఇందుకు గానూ.. 4.59 లక్షల మెట్రిక్ టన్నుల సన్నబియ్యాన్ని సిద్ధం చేసినట్టు పౌరసరఫరాల శాఖ తెలిపింది. దీంతో.. ఉగాది పండుగ సందర్భంగా.. రేషన్ కార్డుదారులకు సన్నబియ్యం పంపిణీ చేసే కార్యక్రమాన్ని లాంఛనంగా ప్రారంభించే అవకాశం కనిపిస్తోంది. ఈ కార్యక్రమంలో భాగంగా.. ఒక్కొక్కరికి 6 కేజీల చొప్పున సన్నబియ్యం పంపిణీ చేయనుంది రేవంత్ రెడ్డి ప్రభుత్వం.

సంక్రాంతి పండుగకే సన్నబియ్యం పంపిణీ కార్యక్రమాన్ని ప్రారంభించాలని భావించిన రేవంత్ రెడ్డి ప్రభుత్వం.. పలు కారణాల వల్ల వాయిదా వేసింది. కాగా.. ఇప్పుడు ఉగాది పండుగ కానుకగా రేషన్ కార్డుదారులకు సన్నబియ్యం పంపిణీ చేసే కార్యక్రమాన్ని ప్రారంభించనున్నట్టు తెలుస్తోంది.

ఇదిలా ఉంటే.. రేవంత్ రెడ్డి సర్కార్ కొత్త రేషన్ కార్డుల పంపిణీ ప్రక్రియను ప్రారంభించగా.. అది నిరంతర ప్రక్రియగా కొనసాగుతుందని ప్రభుత్వం చెప్తోంది. అయితే.. ప్రభుత్వం పంపిణీ చేయనున్న ఈ సన్నబియ్యం.. పాత రేషన్ కార్డు దారులకే ఇస్తుందా.. లేక కొత్త రేషన్ కార్డులు వచ్చిన తర్వాత వాళ్లకు కూడా కలిసి ఇస్తుందా అన్నది తెలియాల్సి ఉంది.

అయితే.. కొత్త రేషన్ కార్డు దరఖాస్తుల విషయంలో ప్రజలు ఇప్పటికే మీ-సేవా కేంద్రాల ముందు బారులు తీరుతున్నారు. కాగా.. ఇప్పటికే కొంత మంది అర్హుల జాబితాను సిద్ధం చేసిన ప్రభుత్వం.. మరి వారికి కొత్త రేషన్ కార్డులు ఎప్పుడు మంజూరు చేస్తుందన్నది కూడా ఇంకా క్లారిటీ రావాల్సిం ఉండగా.. కొత్తగా దరఖాస్తు చేసుకుంటున్న వారికి ఎప్పుడు వస్తాయనేది సర్వత్రా చర్చనీయాంశంగా మారింది. దీంతో.. ఈ సన్నబియ్యం పంపిణీ ప్రక్రియపై ప్రజలు ఎలా స్పందిస్తారన్నది చూడాలి.