మంత్రి వర్గ విస్తరణ ఇప్పట్లో కానట్లేనా... ఢిల్లీ వెళ్లిన రాని క్లారిటీ

సీఎం రేవంత్ రెడ్డి ఢిల్లీలో అధిష్ఠానంతో భేటీ అయ్యారు. కాంగ్రెస్ అగ్రనేత రాహుల్ గాంధీతో సమావేశమయ్యారు. కేబినెట్ విస్తరణ, పీసీసీ క్యార్గవర్గం కూర్పు గురించి అధిష్ఠానంతో చర్చించేందుకే ఢిల్లీ వచ్చారన్న ఊహాగానాలు సీఎం రేవంత్ రెడ్డి కొట్టిపారేశారు. కేబినెట్ విస్తరణ అంశం హైకమాండ్ చూసుకుంటుందని మరోసారి రేవంత్ రెడ్డి స్పష్టం చేశారు. దీంతో.. కాంగ్రెస్ శ్రేణులు మరోసారి నిరాశకు గురయ్యారు. ఎన్నో ఆశలు పెట్టుకున్న నేతలు నిరుత్సాహానికి లోనైననట్టు తెలుస్తోంది.

ఇదిలా ఉంటే.. పార్టీ ఫిరాయింపుల అంశంపైన కూడా సీఎం రేవంత్ రెడ్డి మాట్లాడారు. పార్టీ ఫిరాయింపు ఎమ్మెల్యేలపై కోర్టు ఉత్తర్వుల ప్రకారమే నడుచుకుంటామని రేవంత్ రెడ్డి స్పష్టం చేశారు. కోర్టులు చేసే పనిని కేటీఆర్ చేయాలనుకుంటున్నారని.. ఉపఎన్నికలు వస్తాయో రావో కేటీఆరే చెప్పేస్తున్నారని మండిపడ్డారు. గతంలో సబితా ఇంద్రారెడ్డి, తలసాని శ్రీనివాస్ యాదవ్ ఏ బీ ఫామ్ మీద గెలిచారు..? ఎవరి మంత్రి వర్గంలో పనిచేశారు..? అని రేవంత్ రెడ్డి ప్రశ్నించారు.

కులగణన, ఎస్సీ వర్గీకరణలో కమిషన్లు ఇచ్చే నివేదికలు చట్టబద్ధం చేస్తామని సీఎం రేవంత్ రెడ్డి తెలిపారు. వీటిలో ఎక్కడా రాజకీయ జోక్యం ఉండదని తెలిపారు. రాజకీయ జోక్యం ఉండకూడదు అనే ఉద్దేశంతోనే కమిషన్ ఏర్పాటు చేస్తున్నామని స్పష్టత ఇచ్చారు. 42 శాతం బీసీ రిజర్వేషన్లపై అసెంబ్లీలో తీర్మానం చేసి పార్లమెంట్‏కు పంపుతామని రేవంత్ రెడ్డి పేర్కొన్నారు. బడ్జెట్ సమావేశాల్లో కులగుణన, ఎస్సీ వర్గీకరణ చట్టరూపంలో తీసుకొచ్చి ఆమోదం తెలిపి కేంద్రానికి పంపుతామని చెప్పుకొచ్చారు.