వైజాగ్ లారీడ్రైవర్ అమర ప్రేమ,,,ప్రేయసి భర్తకు ప్రియుడి విజ్ఞాపన..

వైజాగ్‌కి చెందిన భార్యభర్తలు హైదరాబాద్‌లోని రహమత్ నగర్ ప్రాంతంలోని యాదగిరినగర్‌లో నివాసముంటున్నారు. వీరిద్దరూ సినిమా పరిశ్రమలో జూనియర్ ఆర్టిస్టులుగా పని చేస్తున్నారు. అయితే.. ఆ మహిళకు విశాఖకు చెందిన లారీ డ్రైవర్ సూర్యనారాయణతో ఆరేళ్ల క్రితం పరిచయం ఏర్పడింది. ఆ పరిచయం కాస్త పెరిగి స్నేహంగా మారింది. ఆ స్నేహాం తర్వాతి స్థాయికి చేరుకుంది. ఆమెను వదిలి ఉండలేకపోయాడో ఏమో.. ఐదు రోజులు క్రితం సూర్యనారాయణ సరాసరికి తన ప్రేయసి ఇంటికి వచ్చేశాడు. బయటి ప్రపంచానికి స్నేహితులుగా తెలియటంతో.. వాళ్ల ఇంట్లోనే ఉన్నాడు. ఈ సందర్భంగా.. తన భార్య, కొడుకు, కూతురు తనను పట్టించుకోవడం లేదంటూ ప్రేయసితో పాటు ఆమె భర్తతో తన బాధ చెప్పుకున్నాడు.

బాధలో ఉన్న సూర్యనారయణను కాస్త ఓదార్చటంతో.. కాస్త చనువు పెరిగింది. ఇదే ఛాన్స్ అనుకుని.. ఆమెపై తాను పెంచుకున్న ప్రేమను ఆమె భర్త ముందు బయటపెట్టాడు సూర్యనారాయణ. "నీ భార్య అంటే నాకు ప్రేమ.. ఇద్దరం కలిసి ఉండాలనుకుంటున్నాం.. నీ భార్యను నాకు ఇచ్చేయ్.. బాగా చూసుకుంటా.." అని మహిళ భర్తతో సూర్యనారాయణ చెప్పేశాడు. దీంతో.. మొదట షాక్ అయిన ఆమె భర్త.. ఆ తర్వాత కోపోద్రిక్తుడయ్యాడు. ఇద్దరి మధ్య గొడవ జరిగింది. సూర్యనారాయణను ఇంట్లో నుంచి బయటికి గెంటేశాడు.

అయినప్పటికీ.. పట్టువదలని విక్రమార్కుడిలా సూర్యనారాయణ.. రాత్రంతా తన ప్రేయసి ఇంటి ముందే పడుకున్నాడు. ఆమెపై తనకు ఎంత ప్రేముందో చూపించాలనుకున్నాడో లేక ఆమె లేకపోతే బతకలేను నిరూపించాలనుకున్నాడో కానీ.. తెల్లవారుజామునే యూసఫ్ గూడలోని పెట్రోల్ బంక్‌కు వెళ్లి పెట్రోల్ తెచ్చుకున్నాడు. ప్రియురాలి ఇంటి ముందే ఒంటిపై పెట్రోల్ పోసుకుని ఆత్మహత్యకు యత్నించాడు. అందరూ భయపెడతాడు కావోచ్చు అనుకున్నారు కానీ.. నిజంగానే అంటించుకున్నాడు.

వెంటనే అప్రమత్తమైన స్థానికులు పోలీసులకు, అంబులెన్స్‌కు సమాచారం అందించారు. అప్పటికే స్థానికులు మంటలు ఆర్పే ప్రయత్నం చేశారు. ఘటనా స్థలికి చేరుకున్న పోలీసులు.. గాయపడిన సూర్యనారాయణను గాంధీ ఆస్పత్రికి తరలించారు. అప్పటికే తీవ్రంగా గాయపడిన సూర్య నారాయణ చికిత్స పొందుతూ మృతి చెందాడు.