గచ్చిబౌలి ఏఐజీ ఆస్పత్రికి మాజీ సీఎం కేసీఆర్

బీఆర్ఎస్ అధినేత, మాజీ సీఎం కేసీఆర్.. హైదరాబాద్లోని గచ్చిబౌలి ఏఐజీ ఆసుపత్రికి వెళ్లారు. సాధారణ వైద్య పరీక్షల కోసం గురువారం (ఫిబ్రవరి 20న) ఉదయం ఏఐజీ ఆస్పత్రికి.. సతీమణి శోభతో కలిసి వెళ్లారు. ఆస్పత్రికి వెళ్లిన కేసీఆర్‌కు వైద్యులు పలు వైద్య పరీక్షలు నిర్వహించినట్టు తెలుస్తోంది. ఈ సమయంలో కేసీఆర్ వెంట సంతోష్ రావు కూడా ఉన్నారు. అయితే.. ఉన్నట్టుండి గులాబీ బాస్ కేసీఆర్ ఆస్పత్రికి వెళ్లటంపై రకరకాల అనుమానాలు వ్యక్తమవుతున్నాయి. కేసీఆర్ ఆరోగ్య పరిస్థితి విషయంలో గులాబీ శ్రేణులు కాస్త ఆందోళనకు లోనవుతున్నాయి.

అయితే.. కేసీఆర్ ప్రస్తుతం ఆరోగ్యంగానే ఉన్నప్పటికీ సాధారణ వైద్య పరీక్షల్లో భాగంగానే.. ఏఐజీకి వెళ్లినట్టు తెలుస్తోంది. ఇదే క్రమంలో.. మరో ఆసక్తికర వాదన కూడా వినిపిస్తోంది. మాజీ సీఎం కేసీఆర్.. అమెరికా వెళ్లాలలనే యోచనలో ఉన్నారని.. అందుకోసమే ముందుగా వైద్య పరీక్షలు చేపించుకునేందుకు ఏఐజీ హాస్పటల్‌కు వెళ్లినట్టు తెలుస్తోంది. అయితే.. బుధవారం (ఫిబ్రవరి 20న) రోజున సికింద్రాబాద్ రీజినల్ పాస్ పోర్టు ఆఫీస్‌కు వెళ్లి తన పాస్‌పోర్టు రెన్యూవల్ చేయించుకోవంట ఈ వాదనకు బలం చేకూరుస్తుంది.

అయితే.. మనుమరాలు, కేటీఆర్ కుమార్తె అలేఖ్యకు కూడా అమెరికాలో సీటు రావడంతో ఆమెతో పాటు కేసీఆర్ అమెరికా వెళ్లేందుకు సిద్ధమవుతున్నారని ప్రచారం నడుస్తోంది. ఇందులో భాగంగానే తన పాస్ పోర్టు రెన్యూవల్ చేయించుకున్నారని.. డిప్లమాట్ పాస్ పోర్టును సాధారణ స్థితికి మార్చుకున్నారనే టాక్ నడుస్తోంది. అయితే.. మొన్నటి వరకు అమెరికాలో చదువుకున్న కేటీఆర్ కుమారుడు హిమాన్షు.. ప్రస్తుతం సింగపూర్‌లో చదువుకుటున్నాడు.

అమెరికాలో ఉన్నప్పుడు తాత (కేసీఆర్) మీద బెంగతో పదే పదే ఇండియా వస్తుండటంతో.. అమెరికా నుంచి సింగపూర్ కు మార్చినట్టుగా తెలుస్తోంది. కాగా.. అటు మనవరాలితో కొద్ది రోజులు ఉన్న తర్వాత.. మనుమడి వద్ద కొంత కాలం ఉండేందుకు సింగపూర్‌కు కూడా వెళ్లనున్నట్టు చెప్తున్నారు. అయితే.. ఈసారి మాత్రం కేసీఆర్ ఫారిన్ టూర్ పక్కా అన్నట్టుగా వార్తలు వైరల్ అవుతున్నాయి. ఆ మధ్య కూడా హిమాన్షు అమెరికాలో చదువుకుంటున్న సమయంలో.. తన మనవడి దగ్గరికి వెళ్తారంటూ వార్తల వచ్చాయి. కాగా.. ఇప్పుడు మళ్లీ అలాంటి వార్తలే వస్తుంటాయి. అయితే.. ఈసారి నిజంగానే.. ఫారిన్ వెళ్తున్నారా అన్నది ఇప్పుడు సర్వత్రా చర్చనీయాంశంగా మారింది.