ఈత కొట్టాలని సరదాగా నదిలో దూకిన హైదరాబాద్ లేడీ డాక్టర్.. కట్ చేస్తే కొట్టుకుపోయింది

వృత్తిపరంగా రోజూ పని ఒత్తిడికి గురయ్యే చాలా మంది.. అప్పుడప్పుడు విధుల నుంచి కాస్త బ్రేక్ తీసుకుని వివాహయాత్రలకు వెళ్లి రీఫ్రెష్ అవుతుంటారు. మానసిక ఉల్లాసాన్ని పొంది.. రెట్టింపు ఉత్సాహంతో తిగిరి విధులు నిర్వహిస్తుంటారు. అటు మెదడుకు, ఇటు మనసుకు రిఫ్రెషింగ్‌గా ఉంటుందని వెళ్లే కొన్ని విహారయాత్రలు ఒక్కోసారి విషాదంగా మారుతుంటాయి. అచ్చంగా అలాంటి ఘటనే జరిగింది. హైదరాబాద్‌కు చెందిన యువ వైద్యుల బృందం సరదాగా చేపట్టిన విహారయాత్రలో తీవ్ర విషాదం చోటుచేసుకుంది.

హైదరాబాద్‌కు చెందిన ఓ ప్రముఖ డాక్టర్ కుమార్తె, యువ వైద్యురాలు అనన్య రావు, మరో ఇద్దరు స్నేహితులు సాత్విన్, హషితతో కలిసి కర్ణాటకలోని హంపీకి టూర్‌కు వెళ్లారు. అక్కడున్న పర్యాటక ప్రదేశాలను చూసిన వీళ్లు.. మంగళవారం (ఫిబ్రవరి 18న) రాత్రి సణాపుర గ్రామంలోని ఓ గెస్ట్ హౌస్‌లో బస చేశారు. బుధవారం (ఫిబ్రవరి 19న) మధ్యాహ్నం సమయంలో తుంగభద్ర నదికి వెళ్లారు. అక్కడికి వెళ్లిన అనన్యరావు.. సరదాగా ఈత కొట్టాలనుంది. అందుకోసం.. సుమారు 25 అడుగుల ఎత్తు గల బండరాయి నుంచి అనన్యరావు నదిలో దూకింది.

కాసేపు సరదాగా ఈత కొడుతూ ఆనందించిన అనన్యరావు.. కాసేపటికే నదిలో నీటి ప్రవాహం పెరగడంతో కొట్టుకుపోయింది. అనన్యరావు కొట్టుకుపోతుండటాన్ని గమనించిన స్నేహితులు.. ఆమెను రక్షించేందుకు ప్రయత్నించారు. కానీ.. ప్రవాహం ఎక్కువగా ఉండటంతో చూస్తుండగానే.. అనన్యరావు కనిపించకుండాపోయింది. అప్రమత్తమైన ఆమె స్నేహితులు.. వెంటనే పోలీసులకు సమాచారం ఇచ్చారు.

వెంటనే రంగంలోకి దిగిన పోలీసులు.. హుటాహుటిన సంఘటనా స్థలికి చేరుకుని గాలింపు చర్యలు చేపట్టారు. అనన్యరావు దూకిన ప్రదేశంలో.. తుంగభద్ర నది రాతి గుహల్లో ప్రవహిస్తూ ఉంటుంది. అయితే.. అనన్యరావు గుహల్లో చిక్కుకు పోయింటారని పోలీసులు అనుమానించారు. స్థానిక గజ ఈతగాళ్లు, అగ్నిమాపక సిబ్బంది సాయంత్రం వరకు ప్రయత్నించినా ఆమె జాడ కనిపించలేదు. కాగా.. గురువారం (ఫిబ్రవరి 20న) రోజు కూడా గాలింపు చర్యలు చేపట్టగా.. అనన్యరావు మృతదేహం లభించింది.

దీంతో.. అనన్యరావు కుటుంబంలో తీవ్ర విషాదం అలుముకుంది. కుటుంబసభ్యులు, ఆమె స్నేహితులు బోరున విలపించారు. అయితే.. అనన్య రావు నదిలో దూకిన దృశ్యాలను ఆమె స్నేహితులు వీడియో తీయగా.. ఆ వీడియోలు సోషల్‌ మీడియాలో వైరల్‌గా మారాయి. మరోవైపు.. అనన్య రావు తండ్రి మెహన్‌ రావు కూడా డాక్టరే కాగా.. ఆమె వీకేసీ ఆస్పత్రిలో విధులు నిర్వహిస్తున్నట్టు తెలిసింది.