రేవంత్ రెడ్డి రియల్ హీరో.. సీనియర్ నటుడు సుమన్ ప్రశంసల జల్లు

తెలంగాణలో రాజకీయాలు రోజురోజుకు రసవత్తరంగా మారుతున్నాయి. మొన్నటివరకు హాట్ హాట్‌గా సాగిన అసెంబ్లీ సమావేశాల తర్వాత.. హైదరాబాద్ సెంట్రల్ యూనివర్సిటీ పక్కనున్న 400 ఎకరాల భూములకు సంబంధించిన వ్యవహారం ఇప్పుడు రాష్ట్రంలో అగ్గిరాజేస్తోంది. ఇదే సమయంలో.. బీసీ రిజర్వేషన్ల పెంపుపై దేశ రాజధాని ఢిల్లీలో బీసీ సంఘాలు మహాధర్నా నిర్వహిస్తున్నాయి. ఈ మహాధర్నాకు తెలంగాణ సీఎం రేవంత్ రెడ్డి సంఘీభావం తెలిపారు. ఈ సందర్భంగా రేవంత్ రెడ్డిపై సీనియర్ నటుడు, హీరో సుమన్.. ప్రశంసల జల్లు కురిపించారు.

బీసీలకు రిజర్వేషన్లు ఎక్కడ వస్తాయని అందరూ అనుమానాలు వ్యక్తం చేస్తే.. సీఎం రేవంత్ రెడ్డి మాత్రం రాష్ట్రంలో బీసీలకు విద్య, ఉద్యోగాలు, రాజకీయల్లో 42 శాతం రిజర్వేషన్లు అమలు చేసేలా బిల్లును తీసుకొచ్చి చూపించారని సుమన్ అభినందించారు. ఇచ్చిన మాట మేరకు.. బీసీలకు రిజర్వేషన్లు తీసుకువచ్చిన సీఎం రేవంత్ రెడ్డి రియల్ హీరో అని సుమన్ కొనియాడారు.

బీసీ సంక్షేమ సంఘం జాతీయ కమిటీ ఆధ్వర్యంలో జంతర్ మంతర్ వేదికగా జరుగుతున్న బీసీ మహాధర్నాకు సుమన్ సంఘీభావం తెలిపారు. ఈ సందర్భంగా మాట్లాడిన సుమన్.. బీసీలమంతా రేవంత్ రెడ్డికి మద్దతుగా ఉంటామని తెలిపారు. ఏజెన్సీ ప్రాంతాల్లో బీసీలు, గౌడ్లు ఉన్నారని.. రేవంత్ రెడ్డి పెద్దమనసు చేసుకుని వారికి ఎస్టీ స్టేటస్ ఇవ్వాలని సుమన్ కోరారు. ఈ డిమాండ్ చాలా కాలంగా ఉందని.. ఇది నెరవేరిస్తే మీరే మాకు దేవుడు అవుతారంటూ సుమన్ చెప్పుకొచ్చారు. ప్రధాని నరేంద్ర మోదీ.. బీసీలకు రిజర్వేషన్లు అమలు చేయాలని సుమన్ విజ్ఞప్తి చేశారు.

 బీసీ రిజర్వేషన్లను 42 శాతానికి పెంచుతూ తెలంగాణ అసెంబ్లీ ఆమోదించిన బిల్లును పార్లమెంట్‌లోనూ ఆమోదించి అమలు చేయడంతో పాటు దేశవ్యాప్తంగా కులగణన, 33 శాతం మహిళా రిజర్వేషన్లలో బీసీ మహిళలకు సబ్ కోటా కేటాయించాలని డిమాండ్ చేస్తూ ఢిల్లీలో బీసీ సంఘాలు నిర్వహిస్తున్న మహాధర్నా కొనసాగుతోంది. ఈ ధర్నాకు తెలంగాణ ముఖ్యమంత్రి రేవంత్‌రెడ్డితో పాటు ఎంఐఎం అధ్యక్షుడు అసదుద్దీన్ ఒవైసీ, ఎంపీలు కనిమొళి, సుప్రియా సూలే తదితరులు ధర్నాకు మద్దతు తెలిపారు.

తెలంగాణ మంత్రులు కొండా సురేఖ, పొన్నం ప్రభాకర్, టీపీసీసీ చీఫ్ మహేశ్ కుమార్ గౌడ్, ప్రభుత్వ విప్ ఆది శ్రీనివాస్, ఎమ్మెల్సీ కోదండరాం, కాంగ్రెస్ నేత వీహెచ్, సినీ నటుడు సుమన్, జాజుల శ్రీనివాస్ గౌడ్ తదితరులు ఈ మహాధర్నా హాజరయ్యారు. బీసీ పోరు గర్జన సభకు రావాలని బీజేపీ, బీఆర్ఎస్ పార్టీలను బీసీ సంఘాలు ఆహ్వానించినా రెండు పార్టీలు ధర్నాకు దూరంగా ఉండటం గమనార్హం.