అద్దె ఇంటి కోసం చూసే వారే టార్గెట్,,,హైదరాబాద్ నగరంలో సరికొత్త మోసం

ఈజీ మనీకి అలవాటుపడిన కొందరు మోసాల బాట పడుతున్నారు. ఇటీవల కాలంలో హైదరాబాద్ నగరంలో అద్దె ఇండ్ల పేరుతో మోసాలు వెలుగులోకి వస్తున్నాయి. అద్దె ఇంటి కోసం వెతికే వారిని టార్గెట్ చేసుకొని ఈజీగా బురిడీ కొట్టిస్తున్నారు. తాజాగా.. మరో మోసం వెలుగులోకి వచ్చింది. నగరంలో అద్దె ఇళ్ల పేరుతో జరుగుతున్న మోసాలపై ఓ వ్యక్తి రెడిట్ పోస్ట్‌లో వెల్లడించాడు. అనుమానాస్పదంగా కనిపించే అద్దె ప్రకటనలు, వాటి వెనుక జరుగుతున్న మోసపూరిత వ్యవహారాలను ఈ పోస్ట్ వెలుగులోకి తెచ్చింది.

ఓ వ్యక్తి తనకు ఎదురైన అనుభవాన్ని పంచుకుంటూ.. తాను చూసిన ఓ అద్దె ఇంటి ప్రకటనలో అద్దె చాలా తక్కువగా ఉందని తెలిపారు. ఆ నంబర్‌కు కాల్ చేయగా.. వారు ఓనర్ నంబర్ ఇచ్చి ఆయన్ను సంప్రదించమని సూచించారు. ఓనర్, అపార్ట్‌మెంట్‌ను చూడటానికి ముందుగా రూ.1,500 రిఫండబుల్ అని చెప్పి ఎంట్రీ ఛార్జ్‌గా డిమాండ్ చేశారు. రూ.1500 పే చేసిన తర్వాత ఓనర్ అని చెప్పుకున్న వ్యక్తి పత్తా లేకుండా పోయాడని తెలిపాడు. ఇది చాలా దారుణం అని.. ఇలాంటి మోసాలు ఉంటాయని తాను ఊహించలేదని పోస్టులో రాసుకొచ్చాడు.

ఈ పోస్ట్‌కు అనేక మంది యూజర్లు స్పందించారు. 'నా స్నేహితుడు కూడా ఇలాగే మోసపోయాడు. అది స్కామ్ అని తర్వాత తెలిసింది.' అని ఒకరు రిప్లయ్ ఇచ్చాడు. మరో యూజర్ లాన్కో హిల్స్‌లో 1 బీహెచ్‌కే ఫ్లాట్‌కు సంబంధించిన నకిలీ ప్రకటనతో తనకు ఎదురైన అనుభవాన్ని వివరించారు. 'వారు రూ. 2,000 అడిగారు. అదృష్టవశాత్తూ, నా మేనేజర్ అక్కడే నివసిస్తున్నారు, లాన్కో హిల్స్‌లో 1 బీహెచ్‌కే ఫ్లాట్‌లు అసలు ఉండవని, ఎంట్రీ ఫీజు వసూలు చేయరని నాకు చెప్పారు. ఇదే విషయాన్ని ఆ స్కామర్‌కు చెప్పాను. వెంటనే అతని ధోరణి మారిపోయింది. దాంతో ఆ కథ అక్కడితో ముగిసిపోయింది.' అని రాసుకొచ్చాడు.

అద్దె ఇళ్ల కోసం చూసేవారు తీసుకోవాల్సిన జాగ్రత్తలు:

మార్కెట్ ధర కంటే చాలా తక్కువ అద్దెకు ప్రకటనలు కనిపిస్తే అప్రమత్తంగా ఉండాలి.

ఇంటిని చూడటానికి ముందుగా 'ఎంట్రీ ఫీజు' లేదా 'రిఫండబుల్ డిపాజిట్' పేరుతో డబ్బు అడిగితే మోసం కావచ్చని గుర్తించాలి.

అద్దెకు తీసుకునే ముందు ఇంటి యజమాని, అపార్ట్‌మెంట్ వివరాలను క్షుణ్ణంగా పరిశీలించాలి. వీలైతే, స్థానికులతో మాట్లాడటం, గేటెడ్ కమ్యూనిటీల విషయంలో మేనేజ్‌మెంట్‌ను సంప్రదించడం మంచిది.

సోషల్ మీడియా, కొన్ని వెబ్‌సైట్‌లలో వచ్చే నకిలీ ప్రకటనల పట్ల అప్రమత్తంగా ఉండాలి.

హైదరాబాద్ పశ్చిమ ప్రాంతంలోని ప్రముఖ గేటెడ్ కమ్యూనిటీలలో 1 బీహెచ్‌కే ఫ్లాట్‌లు అరుదుగా ఉంటాయనే విషయాన్ని గుర్తుంచుకోవాలి.