హైదరాబాద్‌లో కొత్తగా 50 రేషన్ షాపులు

తెలంగాణలో కొత్త రేషన్ కార్డుల జారీ ఊపందుకుంది. చాలా ప్రాంతాల్లో కార్డుల మంజూరు మొదలయ్యింది. ఇక హైదరాబాద్ మహానగరంలో త్వరలోనే కొత్త రేషన్ కార్డులు ఇవ్వనున్నారు. నూతన కార్డుల మంజూరు తర్వాత లబ్ధిదారుల సంఖ్య భారీగా పెరిగే అవకాశం ఉందని భావిస్తున్న గ్రేటర్ అధికారులు.. కీలక నిర్ణయం తీసుకునేందుకు రెడీ అవుతున్నారు. హైదరాబాద్‌లో కొత్తగా 50 రేషన్ షాపులు ఏర్పాటు చేయాలని భావిస్తున్నారు. ఆ వివరాలు..

త్వరలోనే హైదరాబాద్‌లో కొత్త కార్డులు ఇవ్వనున్న నేపథ్యంలో.. ఆయా సర్కిళ్ల పరిధిలో ఎన్ని రేషన్ షాపులున్నాయి.. ఇప్పుడు కొత్తగా ఎన్ని షాపులు ఏర్పాటు చేయాల్సి ఉంది అనే విషయంపై అధికారులు లెక్కలు తీశారు. అంతేకాక గతంలో పలు కారణాతో నగరవ్యాప్తంగా దాదాపు 30 రేషన్ షాపులను తొలగించారు. ఈ క్రమంలో రద్దు చేసిన 30 షాపులతో పాటుగా.. మరో 50 కొత్త రేషన్ దుకాణాలను ఏర్పాటు చేయాలని అధికారులు నిర్ణయించుకున్నారు.

మరో లక్షన్నర మందికి కార్డులు..

ప్రస్తుతం గ్రేటర్‌లోని తొమ్మిది సర్కిళ్ల పరిధిలో రద్దు చేసిన 30 షాపులను తీసి వేస్తే.. మొత్తం 624 రేషన్ షాపులు ప్రజలకు సేవలందిస్తున్నాయి. ప్రస్తుతం హైదరాబాద్‌లో 6,39,451 రేషన్ కార్డులున్నాయి. తాజాగా కొత్త కార్డుల కోసం దాదాపు మరో 4 లక్షల మంది వరకూ దరఖాస్తు చేసుకున్నారు. ఇందులో రెండు సార్లు దరఖాస్తు చేసుకున్న వారిని తీసేస్తే.. సుమారు లక్షన్నర వరకు అర్హులు ఉండే అవకాశం ఉందని అధికారులు అంచనా వేస్తున్నారు.

అర్హులకు కార్డులు జారీ చేసిన తర్వాత.. ఒక్కో షాపుకు కార్డుల సంఖ్య పెంచాల్సి ఉంటుందని తెలుస్తోంది. అలా కాకుండా ఇప్పుడున్న విధానంలోనే కార్డుల సంఖ్యను కేటాయించి.. కొత్త షాపులను ఏర్పాటు చేస్తే బాగుంటుందని అధికారులు భావిస్తున్నట్లు వార్తలు వస్తున్నాయి. దీనిలో భాగంగానే ఖాళీగా ఉన్న 30 రేషన్ షాపులతో పాటుగా మరో 50 కొత్త షాపులను ఏర్పాటు చేయాలని అధికారులు భావిస్తున్నారు.

వారికే కేటాయించే అవకాశం..

ప్రస్తుతం తెలంగాణ సర్కార్ రేషన్ షాపుల ద్వారా సన్నబియ్యం పంపిణీ ప్రారంభించింది. దీంతో రేషన్ షాపులకు వెళ్లేవారి సంఖ్య బాగా పెరిగింది. అలానే రానున్న కాలంలో రేషన్ షాపుల ద్వారా మరికొన్ని ముఖ్యమైన నిత్యావసర వస్తువులు పంపిణీ చేసేందుకు ప్రభుత్వం ప్రణాళిక రచిస్తోంది. ఇదే జరిగితే రేషన్ షాపులకు మరింత మంది క్యూ కడతారు. ఈనేపథ్యంలో రేషన్ షాపుల్లో అక్రమాలు జరగకుండా ఉండాలంటే పరిమిత సంఖ్యలోనే కార్డులుండాలని అధికారులు భావిస్తున్నారు.

అలాగే, రేషన్ పోర్టబులిటీ సదుపాయం కూడా ఉండడంతో కొన్ని ప్రాంతాల్లో రేషన్ షాపులపై ఒత్తిడి పెరిగిందంటున్నారు అధికారులు. వీటన్నింటిని దృష్టిలో పెట్టుకుని.. కొత్త షాపులను ఏర్పాటు చేయాలని భావిస్తున్నారు. అంతేకాక కొత్త షాపుల నిర్వహణ బాధ్యతలను నిరుద్యోగ యువతీ యవకులు, స్వయం సంఘాల మహిళలకు.. ఉపాధి కల్పించేలా కేటాయించాలని ప్రభుత్వం భావిస్తున్నట్టు అధికారులు తెలిపారు.