ఆగస్టు నెలలో విద్యార్థులకు వరుస సెలవులు

జులై నెల ముగిసిన.. ఆగస్టు ఆరంభం కాగానే విద్యార్థుల్లో ఒక సరికొత్త ఉత్సాహం నిండనుంది. ఎందుకంటే.. రాబోయే నెలలో వారికి ఏకంగా వారం రోజుల పాటు వరుస సెలవులు లభించనున్నాయి. తెలంగాణ, ఆంధ్రప్రదేశ్‌లోని పాఠశాలలు, కళాశాలల విద్యార్థులతో పాటు ప్రభుత్వ ఉద్యోగులకు కూడా ఈ ఆగస్టులో పండగలు, ప్రత్యేక దినాల కారణంగా అనేక సెలవులు రాబోతున్నాయి. రోజువారీ చదువుల ఒత్తిడిలో మునిగిపోయిన విద్యార్థులకు ఈ సెలవుల సమయం నిజంగా ఒక పెద్ద ఉపశమనం అనే చెప్పాలి. ఆ సెలవుల వివరాలను ఇప్పుడు పరిశీలిద్దాం.

ఆగస్టు నెల తొలి వారం నుంచే సెలవుల పరంపర మొదలవుతుంది. ఆగస్టు 3న ఆదివారం కావడంతో అది సాధారణ సెలవు దినం. ఆ తర్వాత నాలుగు రోజులకు... అంటే ఆగస్టు 8న వరలక్ష్మి వ్రతం సందర్భంగా తెలంగాణ, ఆంధ్రప్రదేశ్‌ రాష్ట్ర ప్రభుత్వాలు ఐచ్ఛిక సెలవును ప్రకటించాయి. ప్రభుత్వ ఉద్యోగులు ఈ రోజున వేతనంతో కూడిన సెలవును వినియోగించుకోవచ్చు.

అనంతరం.. ఆగస్టు 9న రెండో శనివారం, రాఖీ పండుగ ఒకే రోజు రావడం విశేషం. ప్రతి నెలలో రెండో శనివారం అన్ని విద్యాసంస్థలకు సాధారణంగా సెలవు ఉంటుంది. ఆ మరుసటి రోజు.. ఆగస్టు 10న ఆదివారం కావడంతో దేశవ్యాప్తంగా సాధారణ సెలవు ఉంటుంది. ఇలా ఆగస్టు 8, 9, 10 తేదీల్లో వరుసగా మూడు రోజులు సెలవులు లభిస్తాయి.

ఈ మూడు రోజుల విరామం తర్వాత.. ఆగస్టు 11 నుంచి 14 వరకు పాఠశాలలు తెరిచి ఉన్నప్పటికీ.. తరగతులు పెద్దగా జరగకపోవచ్చు. దీనికి ప్రధాన కారణం ఆగస్టు 15న స్వాతంత్య్ర దినోత్సవం ఉండటం. స్వాతంత్య్ర దినోత్సవ వేడుకల కోసం పాఠశాలల్లో నాలుగైదు రోజుల ముందు నుంచే ఆటలు, అలంకరణలు, సాంస్కృతిక కార్యక్రమాల రిహార్సల్స్‌ వంటి సందడి వాతావరణం నెలకొంటుంది. దీంతో ఆ రోజుల్లో పెద్దగా తరగతి బోధన ఉండకపోవచ్చు. విద్యార్థులు సరదాగా గడిపే అవకాశం ఉంటుంది.

ఈ లెక్కన చూసుకుంటే.. ఆగస్టు 8 నుంచి ఆగస్టు 15 వరకు దాదాపు వారం రోజుల పాటు విద్యార్థులకు విద్యా సంస్థల నుంచి విరామం లభిస్తుంది. ఇక వీటితో పాటు.. ఆగస్టు 16న కృష్ణాష్టమి, తర్వాత రోజు ఆదివారం రావడంతో ఇక్కడ రెండు రోజులు సెలవులు వచ్చాయి. తర్వాత ఆగస్టు 27వ తేదీన వినాయక చవితి సందర్భంగా పబ్లిక్ హాలిడే ఉండనుంది. ఆగస్టు 3(ఆదివారం), 8, 9, 10, 15, 16, 17(ఆదివారం), ఆగస్టు 24(ఆదివారం), ఆగస్టు 27, 31(ఆదివారం).. ఇలా మొత్తంగా చూసుకుంటే ఆగస్టు నెలలో 10 రోజులు సెలవులు రానున్నాయి.