ఫిరాయింపు ఆరోపణలపై ఎమ్మెల్యేల విచారణ జోరుగా సాగుతోంది
Telangana Telugu | Suryaa Desk | Published : Wed, Oct 01, 2025, 02:05 PM
తెలంగాణ అసెంబ్లీలో ఎమ్మెల్యేల అనర్హత పిటిషన్లపై స్పీకర్ గడ్డం ప్రసాద్ సమక్షంలో విచారణ వేగంగా కొనసాగుతోంది. ఫిరాయింపు ఆరోపణలు ఎదుర్కొంటున్న ఎమ్మెల్యేలను బీఆర్ఎస్ తరఫున అడ్వకేట్ చింతా ప్రభాకర్ వివిధ ప్రశ్నలతో క్రాస్ ఎగ్జామినేషన్ చేస్తున్నారు. ఈ విచారణలు రాజకీయంగా ప్రాధాన్యం సంతరించుకున్నాయి.
ఈ క్రమంలో కాలే యాదయ్య పై ప్రత్యక్ష విచారణ ముగిసింది. అనంతరం మరో ఎమ్మెల్యే అయిన గూడెం మహిపాల్ రెడ్డి పై విచారణ ప్రారంభమైంది. అధికారిక రికార్డులు, పార్టీ మార్పుపై స్పష్టత తెచ్చే ప్రశ్నలు అడుగుతూ విచారణ కొనసాగుతోంది.
ఇదిలా ఉండగా, ఫిరాయింపు ఆరోపణలు ఎదుర్కొంటున్న నలుగురు ఎమ్మెల్యేల తరఫున ఉన్న న్యాయవాదులు, పిటిషన్ దారులైన బీఆర్ఎస్ ఎమ్మెల్యేలు పల్లా రాజేశ్వర్ రెడ్డి, కల్వకుంట్ల సంజయ్, చింతా ప్రభాకర్ను సెప్టెంబర్ 29న (సోమవారం) ప్రశ్నించిన సంగతి తెలిసిందే. వారి వాంగ్మూలాలను ఆధారంగా చేసుకుని ప్రస్తుతం ఆరోపణలు ఎదుర్కొంటున్న ఎమ్మెల్యేలపై విచారణ కొనసాగుతోంది.
రెండో విడత విచారణలో భాగంగా అక్టోబర్ 01న (బుధవారం) మరోసారి కీలకమైన ప్రశ్నలతో విచారణ జరుగుతోంది. ఈరోజు కూడా అసెంబ్లీలో ముందుగా విధించిన ఆంక్షలు కొనసాగుతున్నాయి. మీడియాకు అనుమతి లేకుండా, కేవలం సంబంధిత న్యాయవాదులు, అధికారుల సమక్షంలో విచారణ నిర్వహిస్తున్నారు.
|
|