₹36 వేల కోట్ల బకాయిలు.. తెలంగాణ ప్రభుత్వానికి బిల్డర్స్ అసోసియేషన్ ఆఫ్ ఇండియా అల్టిమేటం

తెలంగాణ రాష్ట్ర ప్రభుత్వంపై ఆర్థిక భారం మరింత పెరగనుంది. గత రెండేళ్లుగా పెండింగ్‌లో ఉన్న సుమారు ₹36,000 కోట్ల బిల్లులను ఈ నెలాఖరులోగా చెల్లించకపోతే, డిసెంబర్ 1 నుంచి రాష్ట్రవ్యాప్తంగా అన్ని ప్రభుత్వ శాఖల పరిధిలోని సివిల్ వర్క్స్ (నిర్మాణ పనులు)ను నిలిపివేస్తామని బిల్డర్స్ అసోసియేషన్ ఆఫ్ ఇండియా (BAI) రాష్ట్ర ప్రభుత్వానికి తీవ్ర హెచ్చరిక జారీ చేసింది. దీని ద్వారా రోడ్లు, భవనాలు, సాగునీరు వంటి కీలకమైన అభివృద్ధి పనులకు ఆటంకం కలిగే ప్రమాదం ఉంది. ఇప్పటికే ఆర్థిక సవాళ్లను ఎదుర్కొంటున్న ప్రభుత్వానికి ఈ పరిణామం మరింత తలనొప్పిగా మారింది.
ప్రభుత్వం నుంచి సకాలంలో బిల్లులు రాకపోవడంతో కాంట్రాక్టర్లు తీవ్ర ఆర్థిక ఇబ్బందుల్లో కూరుకుపోయారు. ప్రజా పనులను పూర్తి చేయడానికి చాలా మంది కాంట్రాక్టర్లు తమ వ్యక్తిగత ఆస్తులను తాకట్టు పెట్టి, వడ్డీలకు అప్పులు చేసి పనులు చేశారని BAI నాయకులు ఆవేదన వ్యక్తం చేశారు. బిల్లులు ఆలస్యం కావడంతో బ్యాంకుల నుంచి రుణాల రికవరీ నోటీసులు వస్తున్నాయని, చాలా మంది చిన్న, మధ్య తరహా కాంట్రాక్టర్లు దివాలా అంచున ఉన్నారని తెలిపారు. వారి ఆర్థిక కష్టాలను దృష్టిలో ఉంచుకుని, ప్రభుత్వం వెంటనే బకాయిలను విడుదల చేయాలని BAI డిమాండ్ చేసింది.
ప్రభుత్వం తమ డిమాండ్‌ను పట్టించుకోకపోతే, డిసెంబర్ 1వ తేదీ నుంచి అన్ని శాఖల్లోని పనులను నిలిపివేసి, రాష్ట్రవ్యాప్తంగా ఆందోళన కార్యక్రమాలు చేపడతామని బిల్డర్స్ అసోసియేషన్ స్పష్టం చేసింది. రాజకీయాలకు తమకు ఎలాంటి సంబంధం లేదని, ఏ ప్రభుత్వం అధికారంలో ఉన్నా తాము ప్రజా పనులు చేస్తామని, తమకు రాజకీయాలు ఆపాదించవద్దని అసోసియేషన్ నాయకులు ప్రభుత్వాన్ని కోరారు. ఇది కేవలం కాంట్రాక్టర్ల సమస్య మాత్రమే కాదని, రాష్ట్ర అభివృద్ధి వేగాన్ని పూర్తిగా అడ్డుకునే సమస్యగా మారుతుందని హెచ్చరించారు.
పెండింగ్ బిల్లుల చెల్లింపు విషయంలో ప్రభుత్వం ఆచితూచి వ్యవహరిస్తోంది. రాష్ట్రంలో వివిధ పథకాల అమలుకు, ఇతర చెల్లింపులకు నగదు సర్దుబాటు చేయలేక ప్రభుత్వం తర్జనభర్జన పడుతున్నట్లు సమాచారం. కాంట్రాక్టర్లే కాక, ప్రైవేట్ కళాశాలల నిర్వహకులు, ఆసుపత్రులు సైతం తమ బకాయిలు చెల్లించాలని ప్రభుత్వాన్ని డిమాండ్ చేస్తున్న తరుణంలో, బిల్డర్స్ అసోసియేషన్ అల్టిమేటం ప్రభుత్వంపై అదనపు ఒత్తిడి పెంచుతోంది. ఈ నేపథ్యంలో, ప్రభుత్వం ఈ భారీ ఆర్థిక సంక్షోభాన్ని అధిగమించడానికి, నిర్మాణ పనులు నిలిచిపోకుండా ఉండటానికి ఎటువంటి నిర్ణయం తీసుకుంటుందో వేచి చూడాలి.