సమయానికి ఆఫీస్‌కు రాలేదని.. ఒక రోజు జీతం కట్

ప్రజా సేవలో సమయపాలన, నిబద్ధత ఎంత ముఖ్యమో నిరూపిస్తూ.. సిద్దిపేట జిల్లా కలెక్టర్ కె.హైమావతి మంగళవారం ఆకస్మిక తనిఖీలు చేపట్టారు. ఇటువంటి చర్యల కారణంగా ప్రభుత్వ ఉద్యోగుల్లో బాధ్యత పెరిగి.. ప్రజలకు మెరుగైన సేవలు అందుతాయని ఆమె స్పష్టం చేశారు. కలెక్టర్ కె.హైమావతి గజ్వేల్ మండలంలోని అహ్మదీపూర్ ప్రాథమిక ఆరోగ్య కేంద్రాన్ని ఆకస్మికంగా సందర్శించారు.

ఉదయం 9:34 నిమిషాలైంది.. ప్రభుత్వ కార్యాలయాలు, ఆరోగ్య కేంద్రాలు ఉదయం 9 గంటలకు ప్రారంభం కావాల్సి ఉంటుంది. కానీ.. కేంద్రాన్ని సందర్శించే సమయానికి, ఆసుపత్రి హెచ్ఈఓ సత్యనారాయణ రెడ్డి , ఒక ఆయమ్మ మాత్రమే విధులకు హాజరయ్యారు. ఆసుపత్రి మెడికల్ ఆఫీసర్‌తో సహా మిగిలిన ముఖ్యమైన వైద్య సిబ్బంది ఎవరూ కార్యాలయానికి రాకపోవడంతో కలెక్టర్ తీవ్ర ఆగ్రహం వ్యక్తం చేశారు.

కలెక్టర్ వెంటనే హాజరు రిజిస్టర్‌ను పరిశీలించి.. గైర్హాజరైన సిబ్బంది వివరాలను నమోదు చేశారు. వారిపై వెంటనే చర్యలు తీసుకున్నారు. ఒక రోజు జీతం కోత విధించాలని జిల్లా వైద్య ఆరోగ్య శాఖాధికారికి ఫోన్ ద్వారా కఠిన ఆదేశాలు జారీ చేశారు. సమయానికి రాకుండా విధుల్లో నిర్లక్ష్యం వహిస్తే.. భవిష్యత్తులో మరింత కఠిన చర్యలు తీసుకోవాల్సి ఉంటుందని ఆమె హెచ్చరించారు. ఇలాంటి ఆకస్మిక తనిఖీలు, కఠిన చర్యలు తీసుకోవడం వల్ల ప్రజా సేవారంగంలో అనేక సానుకూల మార్పులు వస్తాయని పరిపాలనా నిపుణులు అభిప్రాయపడుతున్నారు.

కలెక్టర్ చర్యల వల్ల మిగిలిన ఉద్యోగులు కూడా భయం, బాధ్యతతో సమయానికి కార్యాలయానికి వచ్చి.. వెంటనే తమ పనులు ప్రారంభించే అవకాశం ఉంటుంది. దీనివల్ల ప్రజలకు వేచి ఉండే సమయం తగ్గుతుంది. ముఖ్యంగా ఆరోగ్య కేంద్రాలు, పాఠశాలలు వంటి ప్రాథమిక సేవా రంగాల్లో సిబ్బంది సకాలంలో హాజరు కావడం వల్ల నాణ్యమైన సేవలు అందించడానికి వీలవుతుంది. ఉన్నతాధికారులు నిత్యం అప్రమత్తంగా ఉండి.. ఇలాంటి తనిఖీలు కొనసాగిస్తే, నిర్లక్ష్యం తగ్గి పారదర్శకమైన, బాధ్యతాయుతమైన పాలన ప్రజలకు అందుబాటులోకి వస్తుంది. ఈ చర్యలు ప్రజా సేవకుల్లో మంచి ప్రవర్తనను ప్రోత్సహిస్తాయి.