సంక్రాంతి వేళ ‘చైనా మాంజా’ మృత్యుపాశం.. పసివాళ్ల ప్రాణాలతో చెలగాటం!

సంక్రాంతి పండుగ వేళ గాలిపటాల సందడి ఉండాల్సింది పోయి, ప్రాణాంతకమైన 'చైనా మాంజా' ప్రకంపనలు సృష్టిస్తోంది. నిషేధం ఉన్నప్పటికీ బహిరంగ మార్కెట్లో విచ్చలవిడిగ విక్రయిస్తున్న ఈ సింథటిక్ దారాలు సామాన్య ప్రజల పాలిట యమపాశాలుగా మారుతున్నాయి. పండుగ పూట ఆనందంగా గడపాల్సిన కుటుంబాల్లో ఈ దారాలు ఊహించని విషాదాన్ని నింపుతున్నాయి. కేవలం వినోదం కోసం వాడే ఈ మాంజా, దారపు పోగులా కాకుండా పదునైన కత్తిలా ప్రాణాలను బలితీసుకునే ప్రమాదకర ఆయుధంగా మారింది.
ఇటీవల జరిగిన వరుస ఘటనలు చూస్తుంటే ఈ ప్రమాదం తీవ్రత అర్థమవుతోంది. హైదరాబాద్ శివారులోని కీసర ప్రాంతంలో జశ్వంత్ అనే యువకుడు బైక్‌పై వెళ్తుండగా, గాలిలో వేలాడుతున్న చైనా మాంజా అతని మెడకు చుట్టుకుంది. ఈ ప్రమాదంలో అతని మెడ తీవ్రంగా కోసుకుపోవడంతో వైద్యులు ఏకంగా 19 కుట్లు వేయాల్సి వచ్చింది. తృటిలో ప్రాణాపాయం తప్పినప్పటికీ, ఆ యువకుడు పడుతున్న నరకయాతన చూసి స్థానికులు భయాందోళనలకు గురవుతున్నారు.
మరో హృదయవిదారక ఘటన జగిత్యాల జిల్లా మెట్‌పల్లిలోని దుబ్బవాడలో చోటుచేసుకుంది. శ్రీహాన్ అనే నాలుగేళ్ల చిన్నారి మెడకు ఈ ప్రమాదకర మాంజా దారం కోసుకుపోవడంతో ఆ బాలుడు విలవిలలాడిపోయాడు. గాయం తీవ్రత ఎక్కువగా ఉండటంతో ఆ చిన్నారికి వైద్యులు 16 కుట్లు వేశారు. అభం శుభం తెలియని పసివాడు ఇలాంటి ప్రమాదానికి గురికావడం తల్లిదండ్రులను కలిచివేస్తోంది. ఎక్కడ నుండి ఏ దారం వచ్చి మెడకు చుట్టుకుంటుందోనని వాహనదారులు, పాదచారులు ఇప్పుడు రోడ్డు మీదకు రావాలంటేనే వణికిపోతున్నారు.
ప్రభుత్వం చైనా మాంజాపై నిషేధం విధించినా, క్షేత్రస్థాయిలో దాని అమలు నామమాత్రంగానే కనిపిస్తోంది. పర్యావరణానికే కాకుండా పక్షులకు, మనుషులకు ప్రాణసంకటంగా మారిన ఈ దారాల అమ్మకాలను అరికట్టడంలో యంత్రాంగం కఠినంగా వ్యవహరించాల్సిన అవసరం ఉంది. ప్రజలు కూడా బాధ్యతగా వ్యవహరించి, సింథటిక్ మాంజాలను కాకుండా సాధారణ నూలు దారాలను మాత్రమే వాడాలి. అప్పుడే పండుగలు ప్రాణాలు తీయకుండా, సంతోషాలను పంచేవిగా మిగులుతాయి.