డాలర్ పెరగడం, అంతర్జాతీయ పరిణామాల నేపథ్యంలో.... భారీగా పడిపోతున్న బంగారం, వెండి ధరలు

కొండెక్కిన బంగారం అన్న మాటలే మనం వినివుంటాం. కానీ తాజాగా కొండనుంచి భూమి మీదకు దిగతున్న బంగారం ధర గురించి తాజాగా వింటున్నాం. కొద్ది రోజుల క్రితం వరకు ఆకాశాన్నంటిని బంగారం, వెండి ధరలు ఇప్పుడు దిగివస్తున్నాయి. ఇందుకు అంతర్జాతీయ పరిస్థితులు, డాలర్ విలువ ప్రధాన కారణంగా చెప్పుకోవచ్చు. ఫెడ్ వడ్డీ రేట్ల పెంపు అంచనాల నేపథ్యంలో డాలర్ బలపడుతుండడంతో బంగారం, వెండి ధరలు భారీగా పతనమవుతున్నాయి. అమెరికా డాలర్ విలువ మూడు నెలల గరిష్ఠానికి చేరింది. దీంతో బంగారం ధరలు ఇవాళ ఎంసీఎక్స్ మార్కెట్లో 24 క్యారెట్ల స్వచ్ఛమైన బంగారం 10 గ్రాములకు రూ.55,000 దిగివకు పడిపోయింది. జీవితకాల గరిష్ఠ స్థాయి రూ.58,847 నుంచి ఏకంగా రూ.4000 పడిపోయింది. మరోవైపు.. వెండి ధర ఇవాళ్టి ట్రేడింగ్‌లో కిలోకు రూ.61,580లకు పడిపోయింది. వెండి జీవన కాల గరిష్ఠ స్థాయి రూ.77,949 నుంచి ఏకంగా రూ.16,500 పడిపోవడం గమనార్హం.

స్టాక్ మార్కెట్ నిపుణుల ప్రకారం గోల్డ్, సిల్వర్ ధరలు ఇవాళ ఒత్తిడికి లోనవుతున్నాయి. డాలర్ ఇండెక్స్ బుధువారం 105 స్థాయిని తాకింది. ఇవాళ అది 105 స్థాయికిపైన కొనసాగుతోంది. దీంతో గోల్డ్ వంటి ఇతర విలువైన మెటల్స్‌పై ప్రభావం చూపుతోంది. ఇవాళ్టి ట్రేడింగ్‌లో అంతర్జాతీయంగా స్పాట్ గోల్డ్ 1,810 డాలర్ల వద్ద మద్దతు లభించే అవకాశం ఉంది. అలాగే దేశీయ మార్కెట్లో 24 క్యారెట్ల స్వచ్ఛమైన 10 గ్రాముల బంగారం రూ.54,500 వద్ద మద్దతు లభించొచ్చు. ఒకవేళ ఆస్థాయిలను సైతం దాటి మరింత పడిపోయే దేశీయ మార్కెట్లో రూ.53,800కు పడిపోయే అవకాశాలు ఉన్నాయి. అంతర్జాతీయ మార్కెట్లోనూ ఔన్సుకు 1,790కి దిగివస్తాయి.

మరోవైపు.. వెండి ధరలు ఇవాళ్టి ట్రేడింగ్‌లో కిలోకు రూ.61,000 స్థాయి నుంచి రూ.58,000 స్థాయి మధ్య మద్దతు పొందే వీలుంది. అంతర్జాతీయ మార్కెట్లో ఔన్సు వెండికి 19.50 నుంచి 18.80 డాలర్ల వద్ద మద్దతు లభించొచ్చు. మరోవైపు.. ఒకవేళ ధరలు పెరిగినట్లయితే 21, 21.70 డాలర్ల వద్ద రెసిస్టెన్స్ కనబడుతుంది.

ఇదిలావుంటే  బంగారం ధరలు గరిష్ఠ స్థాయులకు చేరినప్పుడు సైతం చిన్న నగరాల్లో విక్రయాలు ఆ మేర జరగలేదని బులియన్ అసోసియేషన్ ప్రముఖులు పేర్కొంటున్నారు. ఇప్పుడు ధర మరింత తగ్గే అవకాశం ఉన్నట్లు తెలిపారు. అంతర్జాతీయంగానూ ఔన్సు బంగారం ధర మరో 40 నుంచి 50 డాలర్లు తగ్గొచ్చని దాంతో దేశీయ మార్కెట్లోనూ 10 గ్రాముల స్వచ్ఛమైన బంగారం ధర రూ.55 వేల దిగివకు చేరుకుంటుందని అభిప్రాయం వ్యక్తం చేశారు. మరోవైపు.. వెండి కిలో ధర రూ.61 వేల దిగువకు వచ్చే అవకాశాలు కనిపిస్తున్నాయని చెప్పారు. ముంబాయి బులియన మార్కెట్ వ్యాపారులు సైతం ఇదే అంచనాలను వెల్లడిస్తున్నారు. ఈ క్రమంలో నిత్యం ధరలను గమనిస్తూ తమకు అనువైన ధర వచ్చినట్లు కొనుగోలు చేయడం మంచిది.

దేశీయ మార్కెట్లో 22 క్యారెట్ల బంగారం ధర హైదరాబాద్‌లో 10 గ్రాములకు రూ.50,900 మార్క్ వద్దకు చేరింది. ఇక 24 క్యారెట్ల స్వచ్ఛమైన బంగారం ధర తులానికి రూ.55,530కి చేరింది. దేశ రాజధాని దిల్లీలో 22 క్యారెట్ల 10 గ్రాముల బంగారం ధర రూ. 51, 050 వద్ద ఉంది. 24 క్యారెట్ల మెలిమి బంగారం రూ.55 వేల 680 వద్ద కొనసాగుతోంది.