దెబ్బ అదుర్స్‌ కదూ.. స్టోక్స్‌పై రివేంజ్ తీర్చుకున్న అయ్యర్! ఎలాగంటే

భారత్-ఇంగ్లాండ్ జట్ల మధ్య టెస్టు సిరీస్ నువ్వా నేనా అన్నట్లు సాగుతోంది. తొలి టెస్టులో ఇంగ్లాండ్ గెలుపొందగా.. రెండో టెస్టులో గెలిచిన భారత్ లెక్కసరిచేసింది. దీంతో రెండు మ్యాచులు ముగిసే సరికి సిరీస్ 1-1తో సమంగా మారింది. దీంతో మిగతా మూడు మ్యాచులు ఎలా ఉండబోతున్నాయి అనేది ఆసక్తికరంగా మారింది.

రెండు పటిష్ట జట్ల మధ్య క్రికెట్ మ్యాచ్ అంటే సాధారణంగా ప్రతీ ప్రేక్షకుడూ ఇష్టపడతాడు. ముఖ్యంగా భారత్‌లో ఇది మరీ ఎక్కువ. ఎందుకంటే ఇక్కడ క్రికెట్ అంటే కేవలం ఆట మాత్రమే కాదు.. అంతకుమించి. దీంతో మైదానంలో భారత్ తరఫున బరిలోకి దిగే ఆటగాళ్లు నూటికి నూరు శాతం తమ ప్రదర్శనను ఇచ్చేందుకు ప్రయత్నిస్తుంటారు. ప్రత్యర్థుల కవ్వింపులకు సైతం గట్టిగా బదులు ఇస్తుంటారు. తాజాగా భారత్ ఇంగ్లాండ్ జట్ల మధ్య రెండో టెస్టులోనూ అదే జరిగింది.

ఈ మ్యాచులో భారత్ రెండో ఇన్నింగ్స్‌లో ఇది మొదలైంది. భారీ షాట్ ఆడేందుకు ప్రయత్నించిన శ్రేయస్ అయ్యర్.. బంతిని గాల్లోకి లేపాడు. వేగంగా పరిగెత్తుకుంటూ వెళ్లిన ఇంగ్లాండ్ కెప్టెన్ బెన్ స్టోక్స్ అద్భుతమైన రీతిలో ఆ క్యాచ్ అందుకున్నాడు. అంతేకాదు క్యాచ్ అందుకున్న వెంటనే స్టోక్స్ చేసుకున్న సెలబ్రేషన్స్ అయ్యర్‌కు కోపం తెప్పిచింది. అయితే శ్రేయస్ అయ్యర్‌కు రివేంజ్ తీర్చుకునేందుకు సమయం రానే వచ్చింది. ఇంగ్లాండ్ రెండో ఇన్నింగ్స్‌లో బ్యాటింగ్ సందర్భంగా అయ్యర్ వేసిన మెరుపు త్రోకు బెన్ స్టోక్స్ రనౌట్ అయ్యాడు. దీంతో తాను ఔటైనప్పుడు బెన్ స్టోక్స్ చేసుకున్న సెలబ్రేషన్స్ గుర్తొచ్చాయో ఏమోగానీ.. అతడి తరహాలోనే అయ్యర్ సెలబ్రేట్ చేసుకున్నాడు. స్టోక్స్ మాదిరిగా వేలు చూపిస్తూ కనిపించాడు. "బ్రో నువ్వు ఇచ్చింది మళ్లీ నీకు తిరిగి ఇచ్చేశా" అన్నట్లుగా లుక్ ఇచ్చాడు. ఇందుకు సంబంధించిన ఫొటోలు ప్రస్తుతం సోషల్ మీడియాలో వైరల్‌గా మారాయి. ఈ ఫొటోలను చూసిన నెటిజన్లు.. మావాళ్లతో పెట్టుకుంటే మామూలుగా ఉండదు అని కామెంట్లు చేస్తున్నారు. కోపం అయినా, సంతోషమైన మా వాళ్లు తిరిగి ఇచ్చేస్తారు అని పేర్కొంటున్నారు.