మీ జీతం నెలకు రూ. 25 వేలా? రూ. కోటి ఫండ్ ఎలా సృష్టించొచ్చు తెలుసా?

సగటు నెలవారీ జీతం పొందే ఉద్యోగి.. రూ. కోటి వరకు పెద్ద మొత్తంలో ఫండ్ సృష్టించడం సాధ్యమేనా? అంటే అవుననే సమాధానమే వినిపిస్తోంది. నెలకు రూ. 25 వేల జీతం ఉన్నా ఇది సాధ్యమవుతుందంట. అయితే అంత సింపుల్‌గా కాదు. ఆర్థిక క్రమశిక్షణతో సరైన ప్లాన్‌తో నెలకు కొంత మొత్తం ఇన్వెస్ట్ చేస్తూ పోతే ఇది కుదురుతుంది. ఇలా దీర్ఘకాలంలో అనుకున్న విధంగా పెద్ద ఫండ్ సృష్టించడం సాధ్యపడుతుంది. అయితే అందుకోసం మనం ఏం చేయాలి. నిపుణులు ఏం చెబుతున్నారు అనేది తెలుసుకుందాం. ఇందుకోసం మనం సరైన పెట్టుబడి సాధనాన్ని ఎంచుకోవాలి. సరైన ప్లాన్‌తో ఉండాలి.

డెట్ ఇన్‌స్ట్రుమెంట్లతో పోలిస్తే ఈక్విటీ ఇన్వెస్ట్‌మెంట్ల ద్వారా రాబడి ఎక్కువగా ఉంటుంది. అయితే ఇవి కాస్త రిస్క్‌తో కూడుకున్నవి అయినప్పటికీ లాంగ్ రన్‌లో ఇన్వెస్టర్లకు బంపర్ రిటర్న్స్ సాధించిపెట్టడం విశేషం. గత చరిత్ర చూస్తేనే ఇది అర్థం అవుతుంది.

ఇక మీరు సుదీర్ఘ కాలంలో రూ. కోటి వరకు నిధి సమకూర్చుకోవాలంటే ఈక్విటీ మ్యూచువల్ ఫండ్లలో సిస్టమేటిక్ ఇన్వెస్ట్‌మెంట్ ప్లాన్  విధానంలో పెట్టుబడి పెట్టాలని నిపుణులు చెబుతున్నారు. మ్యూచువల్ ఫండ్లలో సిప్ ద్వారా ప్రతి నెలా కూడా కొంత మొత్తం చొప్పున కొంత కాలానికి డిపాజిట్ చేయొచ్చు. చిన్న మొత్తాల్లో కూడా ఇక్కడ జమ చేయొచ్చు. ఇక్కడ ముఖ్యంగా కాంపౌండింగ్ (చక్రవడ్డీ) ఎఫెక్ట్‌తో అద్భుత రిటర్న్స్ మీ సొంతమవుతాయి.

ఇందుకోసం మీ నెలజీతంలో కనీసం 15 నుంచి 20 శాతం దీని కోసం పక్కన పెట్టాల్సి ఉంటుంది. అప్పుడు లాంగ్ టర్మ్ గోల్స్‌ను అందుకోవచ్చు. ఉదాహరణకు ఇప్పుడు నెలకు రూ. 4 వేలతో ఈక్విటీ మ్యూచువల్ ఫండ్లలో పెట్టుబడి పెడితే .. అప్పుడు వార్షిక ప్రాతిపదికన 12 శాతం రిటర్న్స్ లెక్కన 28 సంవత్సరాలు లేదా 339 నెలల్లో రూ. కోటి ఫండ్ సృష్టించొచ్చు. ఇది పెద్ద కష్టమేం కాదు. కానీ ముఖ్యంగా ఓపిక ఉండాలి. ఇదే ఏటా 5 శాతం చొప్పున పెట్టుబడి పెంచుకుంటూ పోతే 301 నెలల్లోనే కోటి సంపాదించొచ్చు. అదే 10 శాతం పెంచితే 264 నెలల్లోనే చేతికి రూ. కోటి వస్తుంది.

అదే నెలకు రూ. 5 వేల చొప్పున డిపాజిట్ చేస్తే .. ఇక్కడ కూడా 12 శాతం రిటర్న్స్ లెక్కన చూస్తే 317 నెలలు లేదా 26 నెలల్లో చేతికి రూ. కోటి వస్తుంది. గమనించాల్సింది ఏంటంటే.. పెట్టుబడి ఎక్కువ ఉంటే రూ. కోటి రిటర్న్స్ వచ్చే సమయం తగ్గుతుంది. నెలకు రూ. 7500 చొప్పున ఇన్వెస్ట్ చేస్తే.. 23 సంవత్సరాలు లేదా 276 నెలల్లోనే రూ. కోటి ఫండ్ సృష్టించే వీలు పడుతుంది. ఇక రూ. 10 వేల చొప్పున డిపాజిట్ చేసినట్లయితే 20 సంవత్సరాలు లేదా 248 నెలల్లో ఇంత ఫండ్ మీకు సొంతమవుతుంది.