పారిస్‌ ఒలింపిక్స్‌లో హిరానో చేతిలో మనిక బాత్రా ఓటమి

పారిస్‌ ఒలింపిక్స్‌ 2024లో టేబుల్‌ టెన్నిస్‌ మహిళల సింగిల్స్‌లో ప్రీ క్వార్టర్స్‌ చేరిన తొలి ఇండియన్‌గా నిలిచిన మనికా బాత్రా  ప్రీక్వార్టర్స్‌ మ్యాచ్‌లో జపాన్‌కు చెందిన మియు హిరానో చేతిలో 1-4 తేడాతో ఓటమి పాలైంది. దీంతో ఒలింపిక్స్‌లో తన పోరాటాన్ని ముగించింది. 47 నిమిషాలపాటు సాగిన మ్యాచ్‌లో మనికా బాత్రాపై 6-11, 9-11, 14-12, 8-11, 6-11 తేడాతో జపాన్‌ అమ్మాయి మియు హిరానో గెలుపొందింది.

  తొలి గేమ్‌ ఒక దశలో 3-3 స్కోరు నమోదైంది. కానీ ఈ సమయంలో జోరు పెంచిన మియు హిరానో.. దూకుడుగా ఆడింది. దీంతో మనికా బాత్రా ఆమెకు పోటీ ఇవ్వలేకపోయింది. తొలి గేమ్‌ కోల్పోయిన తర్వాత రెండో గేమ్‌ను దూకుడుగా ప్రారంభించిన మనికా. ఓ దశలో 5-1తో ఆధిక్యంలో నిలిచింది. కానీ మరోసారి టాప్‌గేర్‌ వేసిన జపాన్‌ హిరానో.. స్కోరును 9-9తో సమం చేసింది. ఆ తర్వాత కూడా చాకచక్యం ప్రదర్శించి రెండో గేమ్‌ను సైతం గెలుచుకుంది.

రెండో గేమ్‌ మాదిరిగానే మూడో గేమ్‌ ఆరంభంలోనూ మనికా బాత్రా ఆశలు రేపింది. ధాటిగా ఆడి 7-2తో ముందంజలో నిలిచింది. ఆ తర్వాత హిరానో మళ్లీ గట్టిపోటీ ఇచ్చింది. కానీ ఈసారి మాత్రం గేమ్‌ను సొంతం చేసుకుంది. కానీ ఆ తర్వాత హిరానో.. మనికాకు ఏమాత్రం అవకాశం ఇవ్వలేదు. వరుసగా రెండు గేమ్‌లను గెలుచుకుని.. క్వార్టర్స్‌కు అర్హత సాధించింది. పారిస్ ఒలింపిక్స్‌లో మహిళల టేబుల్‌ టెన్నిస్‌లో ప్రీక్వార్టర్‌ చేరిన తొలి ఇండియన్‌గా నిలిచిన మనికా బాత్రా.. సింగిల్స్‌ విభాగంలో పతకం లేకుండానే విశ్వక్రీడల నుంచి నిష్క్రమించింది.

ఇక హైదరాబాద్‌కు చెందిన ఆకుల శ్రీజ సైతం టేబుల్‌ టెన్నిస్‌లో ప్రీక్వార్టర్‌ చేరింది. బుధవారం జరిగిన మ్యాచ్‌లో సింగపూర్‌కు చెందిన జెంగ్‌పై విజయం సాధించింది. దీంతో మనికా బాత్రా తర్వాత ఒలింపిక్స్‌లో టేబుల్‌ టెన్నిస్‌లో ప్రీక్వార్టర్‌ చేరిన రెండో ఇండియన్‌గా రికార్డు సృష్టించింది.

ఇక టోక్యో ఒలింపిక్స్‌లో 69 కేజీల విభాగంగా కాంస్యం సాధించిన బాక్సర్‌ లవ్లీనా బోర్గోహెయిన్‌.. మరో పతకానికి అడుగుదూరంలో నిలిచింది. పారిస్ ఒలింపిక్స్‌లో 75 కేజీల విభాగంలో పాల్గొంటున్న ఆమె.. రౌండ్‌ 16 మ్యాచ్‌లో 5-0 తేడాతో నార్వేకు చెందిన సునీవాను చిత్తు చేసింది. ఆమె ఆగస్టు 4న మధ్యాహ్నం 3:02 గంటలకు క్వార్టర్స్‌లో చైనాకు చెందిన లి కియాన్‌తో తలపడనుంది. లి కియాన్‌ను లవ్లీనా ఓడిస్తే.. భారత్‌కు మరో పతకం ఖాయం అవుతుంది. అయితే లి కియాన్‌ టోక్యో ఒలింపిక్స్‌లో రజతం, 2016 రియో ఒలింపిక్స్‌లో కాంస్యం పతకం సాధించడం గమనార్హం.