టాటా గ్రూప్‌లో కీలక పరిణామం.. ఆ 2 కంపెనీల విలీనం
business | Suryaa Desk | Published : Tue, Sep 10, 2024, 10:45 PM
దేశీయ వ్యాపార రంగంలో దిగ్గజ సంస్థ అయిన టాటా గ్రూప్‌లో పలు రంగాలకు చెందిన కంపెనీలు సేవలందిస్తున్నాయి. తాజాగా టాటా కంపెనీలకు సంబంధించి కీలక పరిణామం చోటు చేసుకుంది. ప్రముఖ ఆటోమొబైల్ కంపెనీ టాటా మోటార్స్‌కు చెందిన టాటా మోటార్స్ ఫైనాన్స్ సంస్థను టాటా క్యాపిటల్‌తో విలీనం చేయాలనే నిర్ణయానికి కేంద్ర ప్రభుత్వం నుంచి ఆమోదం లభించింది. భారతదేశ కాంపిటిషన్ వాచ్‌డాగ్ సీసీఐ ఈ రెండు కంపెనీల విలీనానికి ఆమోదం తెలిపింది. ఇప్పటికీ ఈ కంపెనీ విలీనంపై టాటా మోటార్స్ గత జూన్ నెలలోనే ప్రకటన చేసిన సంగతి తెలిసిందే. ఇప్పుడు సీసీఐ నుంచి ఆమోదం లభించింది.
కాంపిటిషన్ కమిషన్ ఆఫ్ ఇండియా (సీసీఐ) ఇవాళ సెప్టెంబర్ 10, 2024 మంగళవారం రోజు ఆమోదం తెలిపినట్లు టాటా మోటార్స్ వెల్లడించింది. ఈ క్రమంలో టాటా క్యాపిటల్‌లో టాటా మోటార్స్ ఫైనాన్స్ విలీనానికి మార్గం సుగమమైనట్లు తెలిపింది. ఈ విలీనం తర్వాత టాటా మోటార్స్ ఫైనాన్స్ సంస్థ ఉండదు. టాటా క్యాపిటల్‌లో కలిసిపోనుంది. టాటా మోటార్స్ ఫైనాన్స్ అనేది టాటా మోటార్స్‌కు చెందిన వెహికల్ ఫైనాన్స్ సంస్థ. ప్రధానంగా తమ సంస్థ వాహనాలకు రుణాలు ఇస్తుంటుంది. ఇప్పటికే తన ప్యాసింజర్ కార్ల వ్యాపారం, వాణిజ్య వాహనాల బిజినెస్ రెండు వేరు వేరుగా చేసిన సంగతి తెలిసిందే. ఇప్పుడు టాటా మోటార్స్ ఫైనాన్స్‌ను విలీనం చేయండం గమనార్హం.
షేర్ స్వాప్ డీల్ కింద టాటా మోటార్స్ ఫైనాన్స్‌ను నాన్ బ్యాంకింగ్ ఫైనాన్షియల్ సంస్థ అయిన టాటా క్యాపిటల్‌లో విలీనం చేయనున్నారు. ఈ విలీనం ద్వారా కంపెనీలు, వారి కస్టమర్లు ఇరువురికి ప్రయోజనం ఉంటుంది టాటా మోటార్స్ తెలిపింది. టాటా మోటర్స్ పైనాన్స్ షేర్ హోల్డర్లకు ప్రతి 100 ఈక్విటీ షేర్లకు టాటా క్యాపిటల్‌కు చెందిన 37 ఈక్విటీ షేర్లు రానున్నాయి. ఈ విలీన ప్రక్రియ 2025, జూన్ లోపు పూర్తయ్యే అవకాశం ఉన్నట్లు తెలుస్తోంది. నాన్ కోర్ బిజినెస్ నుంచి బయటకు వచ్చి ప్రధాన ఆటోమొబైల్ బిజినెస్‌పై ఫోకస్ పెట్టాలనే లక్ష్యంతోనే ఈ విలీన ప్రక్రియ చేపట్టినట్లు తెలుస్తోంది.
|
|