బంగారం ఇచ్చిన జోష్.. ఒక్కరోజే 20 శాతం వరకు పెరిగిన జువెల్లరీ స్టాక్స్

స్టాక్ మార్కెట్లలో పెట్టుబడులు పెట్టే వారికి ఏ స్టాక్ ఎప్పుడు పెరుగుతుందనేది కాస్తయినా అవగాహన ఉండాలి. ఆయా కంపెనీల పనితీరు, ఫలితాలు, ప్రకటనలు, పెట్టుబడి వ్యూహాలు, ప్రణాళికలు ఇలా అన్నింటినీ జాగ్రత్తగా పరిశీలిస్తూ ఆర్థిక నిపుణుల సలహా తీసుకొని ఇన్వెస్ట్ చేస్తుండాలి. ఇంకా.. వీటితో ప్రత్యక్షంగా లేదా పరోక్షంగా సంబంధం ఉన్న ప్రకటనలు వచ్చినా.. ఈ స్టాక్స్‌ ప్రభావితం అవుతుంటాయని చెప్పొచ్చు. ఇవాళ కూడా అదే జరిగింది. స్టాక్ మార్కెట్లు సెషన్ ఆద్యంతం లాభనష్టాల్లోనే ఊగిసలాడినప్పటికీ.. కొన్ని స్టాక్స్ మాత్రం చెలరేగాయి. ఒక్కసారిగా దూసుకెళ్లాయి. దీని వెనుక ఒక కారణం ఉందండోయ్. ద్రవ్యోల్బణం తగ్గుతున్న క్రమంలో.. కేంద్ర బ్యాంకులు ఒక్కసారిగా వడ్డీ రేట్లను తగ్గించనున్నట్లు సంకేతాలు ఇస్తుండటంతో.. బంగారం ధరలు దేశీయంగా, అంతర్జాతీయంగా ఇవాళ భారీగా పెరిగాయి.

దీంతో ఇన్వెస్టర్ సెంటిమెంట్ బలపడటం, డిమాండ్ పెరగడం వల్ల గోల్డ్ రేట్లు అంతర్జాతీయ మార్కెట్లో జీవన కాల గరిష్టాలకు చేరాయి. ప్రస్తుతం స్పాట్ గోల్డ్ రేటు ఔన్సుకు ఏకంగా 2578 డాలర్లకు చేరింది. స్పాట్ సిల్వర్ రేటు 30.65 డాలర్ల వద్ద కొనసాగుతోంది. మరోవైపు డాలర్ పడిపోయిన క్రమంలో.. రూపాయి విలువ పెరిగింది. ప్రస్తుతం డాలర్‌తో పోలిస్తే మారకం విలువ రూ. 83.90 వద్ద ఉంది.

యూఎస్ ఫెడరల్ రిజర్వ్.. ఇప్పుడు సెప్టెంబర్ సమీక్షలోనే వడ్డీ రేట్లను తగ్గించనుంది. దీనిపై ఎప్పటినుంచో చెబుతూనే ఉంది. ఫెడ్ వడ్డీ రేట్లను తగ్గిస్తే.. బంగారం ధరలు ఇంకా పెరుగుతాయని చెప్పొచ్చు. ఈ క్రమంలోనే బంగారానికి సంబంధించిన స్టాక్స్.. అంటే జువెల్లరీ స్టాక్స్ దూసుకెళ్తున్నాయి.

శుక్రవారం సెషన్లో ట్రిభోవందస్ భీమ్‌జీ జవేరీ, కల్యాణ్ జువెల్లర్స్, సెన్కో గోల్డ్, మోతీసన్స్ జువెల్లర్స్, పీసీ జువెల్లర్, థంగమాయిల్ జువెల్లరీ స్టాక్స్ కనీసం 4 శాతం నుంచి గరిష్టంగా 20 శాతం ఎగబాకాయి. దేశీయంగా బంగారం ధరలు పెరిగితే.. గోల్డ్ జువెల్లరీ కంపెనీలకు ఇంకా అడ్వాంటేజ్ అని చెప్పొచ్చు. పండగ సీజన్ కాబట్టి డిమాండ్ ఎలాగూ ఉంటుంది.. దీంతో రేట్లు పెరగడం ఒకవైపు ఉండగా.. కొనుగోళ్లు కూడా ఆశాజనకంగా ఉంటే లాభాల పంట పండుతాయని చెప్పొచ్చు. దీంతోనే సంబంధిత స్టాక్స్ పెరుగుతున్నాయి.

టీబీజెడ్ స్టాక్ అత్యధికంగా 20 శాతం పెరగడం విశేషం. కిందటి సెషన్లో రూ. 273 వద్ద ముగియగా.. ఇవాళ ఒక్కరోజులోనే 20 శాతం పుంజుకొని రూ. 327.60 వద్ద స్థిరపడింది. ఇదే స్టాక్ 52 వారాల గరిష్ట విలువ కావడం విశేషం. ఇంకా.. మోతీసన్స్ జువెల్లర్స్ స్టా్క్ కూడా ఇంట్రాడేలో 10 శాతానికిపైగా పెరిగి చివరికి 7.50 శాతం లాభంతో రూ. 268.50 వద్ద స్థిరపడింది. ఇంట్రాడేలో 52 వారాల గరిష్టాన్ని తాకింది. థంగమాయిల్ స్టాక్ కూడా ఇంట్రాడేలో 8 శాతానికిపైగా పెరగ్గా.. సెన్కో గోల్డ్ షేరు 5 శాతానికిపైగా పెరిగింది. పీసీ జువెల్లర్స్ స్టాక్ 5 శాతం అప్పర్ సర్క్యూట్ కొట్టింది. కల్యాణ్ జువెల్లర్స్ స్టాక్ ధర కూడా ఇంట్రాడేలో 8 శాతానికి మించి పెరిగింది. చాలా వరకు స్టాక్స్ అన్నీ 52 వారాల గరిష్ట విలువల్ని నమోదు చేయడం గమనార్హం.