సెప్టెంబర్ 16 కాదు.. సెలవు తేదీ మార్చిన ఆర్‌బీఐ

దేశీయ కేంద్ర బ్యాంక్ అయిన రిజర్వ్ బ్యాంక్ ఆఫ్ ఇండియా కీలక ప్రకటన చేసింది. పబ్లిక్ హాలీడేను మార్చుతున్నట్లు తెలిపింది. మహారాష్ట్ర ప్రభుత్వం సెప్టెంబర్ 18, 2024 రోజున పబ్లిక్ హాలీడే ప్రకటించిన క్రమంలో అదే రోజున సెలవు ఇస్తున్నామని, ఆ రోజున ప్రభుత్వ సెక్యూరిటీలు, విదేశీ ఎక్స్చేంజ్ మార్కెట్లు, మనీ మార్కెట్లు, రూపీ ఇంట్రెస్ట్ రేట్ డెరివేటివ్స్ వంటి ట్రేడింగ్ ఉండదని తెలిపింది. మహారాష్ట్ర ప్రభుత్వం నెగోషియేబుల్ ఇన్‌స్ట్రూమెంట్ యాక్ట్ 1881లోని సెక్షన్ 25 ప్రకారం సెప్టెంబర్ 18వ తేదీని పబ్లిక్ హాలీడేగా ప్రకటించింది. ఈ క్రమంలోనే రిజర్వ్ బ్యాంక్ సైతం వివిధ ట్రేడింగ్ మార్కెట్లకు సెలవు ఇచ్చినట్లు పేర్కొంది.

ఈ మేరకు సెప్టెంబర్ 14వ తేదీన ఓ ప్రకటన జారీ చేసింది ఆర్‌బీఐ. దాని ప్రకారం.. ' సెప్టెంబర్ 18, 2024 రోజున గవర్నమెంట్ సెక్యూరిటీలు, ఫారెన్ ఎక్స్చేంజ్, మనీ మార్కెట్స్, రూపీ ఇంట్రెస్ట్ రేట్ డెరివేటివ్స్ ‌లో ఎలాంటి ట్రాన్సాక్షన్లు గానీ, సెటిల్మెంట్లు గానీ ఉండవు. సెప్టెంబర్ 18వ తేదీన జరగాల్సిన అన్ని సెటిల్మెంట్లు మరుసటి వర్కింగ్ డే సెప్టెంబర్ 19వ తేదీన ఉంటాయి.' అని వెల్లడించింది ఆర్‌బీఐ. అయితే, అంతకు ముందు ఆయా మార్కెట్లకు పబ్లిక్ హాలీడేగా సెప్టెంబర్ 16, 2024ను నిర్ణయించింది. తాజాగా దానిని రద్దు చేసి సెప్టెంబర్ 18వ తేదీకి మార్చుతున్నట్లు ప్రకటన జారీ చేసింది. మహారాష్ట్ర ప్రభుత్వం ఈద్ ఇ మిలాద్ హాలీడేను సెప్టెంబర్ 16 నుంచి 18వ తేదీకి మార్చుతూ నిర్ణయం తీసుకున్న క్రమంలో ఆర్‌బీఐ సైతం మార్చినట్లు తెలుస్తోంది.

సెలవు దినం మార్చిన క్రమంలో సెప్టెంబర్ 16వ తేదీన యధావిధిగా గవర్నమెంట్ సెక్యూరిటీ మార్కెట్, ఫారెన్ ఎక్స్చేంజ్ మార్కెట్, మనీ మార్కెట్, రూపీ డెరివేటివ్ మార్కెట్లు పని చేస్తాయని ఆర్‌బీఐ తెలిపింది. అలాగే ఆయా మార్కెట్లలో జరగాల్సిన సెటిల్మెంట్లు సెప్టెంబర్ 17వ తేదీన జరగుతాయని తెలిపింది. మరోవైపు.. సెప్టెంబర్ 13వ తేదీ శుక్రవారం నాటి మార్కెట్ ట్రేడింగ్ సెటిల్మెంట్లు సైతం సెప్టెంబర్ 17వ తేదీనే ఉంటాయని వెల్లడించింది. అయితే, స్టేట్ గవర్నమెంట్ సెక్యూరిటీల సెటిల్మెంట్లు సెప్టెంబర్ 17న జరగాల్సి ఉండగా.. అవి సెప్టెంబర్ 19వ తేదీన జరుగుతాయని వెల్లడించింది. వీటితో పాటు సెప్టెంబర్ 13వ తేదీ నాటి స్టాండింగ్ డిపాజిట్ ఫెసిలిటీ, మార్జినల్ స్టాండింగ్ ఫెసిలిటీలు సెప్టెంబర్ 16 సెలవు ఇచ్చినందున సెప్టెంబర్ 17న రివర్స్ చేయాల్సి ఉంది. అయితే ఇప్పుడు సెలవు దినం మార్చిన క్రమంలో సెప్టెంబర్ 16వ తేదీన జరుగుతాయని పేర్కొంది.