గుజరాత్‌లో ఘోర విషాదం
national | Suryaa Desk | Published : Tue, Nov 05, 2024, 12:19 PM
గుజరాత్‌లో ఘోర విషాదం జరిగింది. ఒకే కుటుంబానికి చెందిన నలుగురు చిన్నారులు ఆడుకోవడానికి కారెక్కగా, కారు డోర్‌ లాక్‌ పడి ఊపిరాడక ఆ నలుగురు చిన్నారులు మృతి చెందారు.పోలీసుల కథనం మేరకు … మధ్యప్రదేశ్‌లోని ధార్‌ జిల్లాకు చెందిన దంపతులు గుజరాత్‌ రాష్ట్రం ఆమ్రేలీ జిల్లాలోని రంధియా గ్రామంలో కూలీపనులు చేసుకుంటూ జీవనం కొనసాగిస్తున్నారు. గత ఆదివారం వారి ఏడుగురు పిల్లలను ఇంటి దగ్గర విడిచి పెట్టి పనికి వెళ్లారు. ఈ క్రమంలోనే నలుగురు చిన్నారులు ఆడుకుంటూ ఇంటికి సమీపంలో పార్క్‌ చేసిన ఓ కారులోకి వెళ్లారు. ఈ సమయంలో కారు డోర్‌ లాక్‌ అయింది.దీంతో నలుగురు చిన్నారులు ఊపిరాడక కారులోనే మరణించారు. ఆరోజు సాయంత్రం తల్లి దండ్రులు ఇంటికి తిరిగి రాగా వారి పిల్లలు కనిపించలేదు. స్థానికుల సాయంతో చుట్టుపక్కల వెతకగా కారులో చిన్నారులు మృతి చెంది కనిపించారు. విషయం తెలుసుకున్న పోలీసులు ఘటనా స్థలానికి చేరుకుని మృతదేహాలను స్వాధీనం చేసుకున్నారు.మృతుల్లో ఇద్దరు బాలురు, బాలికలు ఉన్నారు. ప్రాణాలు కోల్పోయినవారిని సునీత (7), సావిత్రి (4), కార్తీక్‌ (2), విష్ణు (2)గా గుర్తించారు. దీనిపై కేసు నమోదు చేసి దర్యాప్తు చేపట్టారు. మృతదేహాలను వారి స్వగ్రామానికి తరలించేందుకు ఏర్పాట్లు చేశారు.
|
|