చైనా బోర్డర్‌లో వీడిన ఉత్కంఠ.. భారత్ సైన్యం మొదటి పెట్రోలింగ్ సక్సెస్

తూర్పు లడ్డఖ్‎ సరిహద్దుల్లో భారత్, చైనాల మధ్య ఏర్పడిన ఉద్రిక్తతలు క్రమంగా తగ్గుముఖం పట్టి సాధారణ పరిస్థితి నెలకుంటోంది. ఇరు దేశాల మధ్య కుదిరిన అవగాహన ఒప్పందంలో భాగంగా వాస్తవాధీన రేఖ వెంబడి భారత్, చైనా సైనికులు సమన్వయ పెట్రోలింగ్ విజయవంతమైంది. మొదటి పెట్రోలింగ్ 2024 నవంబర్ 1న దేమ్‌చోక్‏లో భారత్, చైనా సైన్యాలు ప్రారంభించాయి. సోమవారం అత్యంత క్లిష్టమైన ప్రాంతం దెప్సాంగ్ భారత సైన్యం పెట్రోలింగ్ విజయవంతంగా పూర్తిచేసినట్టు అధికారులు వెల్లడించారు. ఈ మేరకు ఆర్మీ ఫైర్ అండ్ ఫ్యూరీ కార్ప్స్ ట్వీట్ చేసింది. దెస్పాంగ్‌లోని ఓ ప్రాంతంలో పెట్రోలింగ్ విజయవంతమైందని, సరిహద్దుల్లో శాంతికి ఇది సానుకూల ముందడగని పేర్కొంది.

‘సరిహద్దుల్లో బలగాలను ఉపసంహరించి, దెప్సాంగ్, దేమ్‌చుక్‌లో పెట్రోలింగ్ మొదలుపెట్టాలని భారత్, చైనాల మధ్య కుదిరిన అవగాహన ఒప్పందంలో భాగంగా దెస్పాంగ్‌లో పెట్రోలింగ్ విజయవంతంగా నిర్వహించాం.. వాస్తవాధీన రేఖ వద్ద శాంతి, ప్రశాంతతను కొనసాగించేందుకు ఇది మరో సానుకూల అడుగు’ అని తెలిపింది. దెప్సాంగ్ సాంప్రదాయ పెట్రోలింగ్ పాయింట్ల వద్ద పెట్రోలింగ్ జరిగింది. ఈ ప్రాంతాల్లో ముఖ్యంగా 2013, 2015లో భారత్, చైనా దళాల మధ్య అనేక ఘర్షణలు జరిగాయి. దెప్సాంగ్ కుడివైపున ఆక్సాయ్ చిన్ ఉంది. తూర్పు లడ్డఖ్‎లోని 2020 మే నుంచి ఇరు దేశాల మధ్య ఉద్రిక్తతలు మొదలయ్యాయి. గాల్వాన్ లోయ వద్ద భారత్, చైనా సైన్యాల మధ్య ఘర్షణ తలెత్తిన విషయం తెలిసిందే.

సరిహద్దుల్లో ఇరు దేశాల సైనికులు పరస్పరం దాడులకు దిగాయి. దీంతో అప్పటి నుంచి భారత్, చైనా మధ్య ఉద్రిక్త పరిస్థితులు నెలకొన్నాయి. ఎల్ఏసీ వెంబటి ఇరు దేశాలు భారీగా సైన్యాలను మోహరించాయి. ఇటీవల భారత్, చైనా అధికారులు చర్చలు జరిపి.. ఎల్ఏసీ వెంబడి సాధారణ పరిస్థితులు తీసుకురావాలని ఒప్పందం చేసుకున్నాయి. గతంలో మాదిరిగానే సరిహద్దుల వెంబడి ఇరు దేశాల సైనిక బలగాలను ఉపసంహరించుకుని.. సమన్వయ పెట్రోలింగ్ నిర్వహించాలని అవగాహనకు వచ్చాయి.

మొదట దేమ్‌చోక్‏, దెప్సాంగ్ పాయింట్లలో సైన్యాన్ని ఉప-సంహరించి పెట్రోలింగ్ చేయాలని ఇరుదేశాలు సైనికాధికారులు నిర్ణయించారు. ఈ మేరకు..దేమ్‌చోక్‏, దెప్సాంగ్ పాయింట్లలో భారత్, చైనా బలగాలను ఉపసంహరణ పూర్తి అయ్యింది. దీంతో దేమ్‌చోక్ ఇరు దేశాల సైనికులు సమన్వయ పెట్రోలింగ్ నవంబరు 1న మొదలుపెట్టారు. తర్వాత సోమవారం దెస్పాంగ్‌లో పెట్రోలింగ్ ప్రారంభించారు.