గోల్డ్ డిపాజిట్ స్కీమ్‌లో చేరుతున్నారా? అసలు ఈ స్కీమ్స్‌తో లాభమా? నష్టమా?

బంగారం ధరలు చూస్తే రోజు రోజు పెరుగుతూనే ఉన్నాయి. అప్పుడప్పుడు కాస్త తగ్గినప్పటికీ అది నామమాత్రమేనని చెప్పాలి. ప్రస్తుతం స్వచ్ఛమైన బంగారం ధర 10 గ్రాములకు రూ.80 వేలు దాటింది. పండగలు, శుభకార్యాలు, పెళ్లిళ్ల సీజన్‌లో బంగారం భారీగా కొనుగోలు చేస్తారు. అయితే, నగదు ఇబ్బంది లేని వారు ఒకేసారి చెల్లించి కావాల్సిన నగలు, బంగారం తీసుకుంటారు. కానీ, కొంత మంది అంత పెద్ద మొత్తం ఒకేసారి కట్టలేక వెనకడుగు వేస్తుంటారు. అలాంటి వారందరినీ ఆకర్షించేందుకు జువెలరీ సంస్థలు ప్రత్యేక గోల్డ్ స్కీమ్స్ ప్రవేశపెడుతుంటాయి. నెల నెల తక్కువ మొత్తంలో కట్టి కొన్ని నెలల తర్వాత మీకు నచ్చిన నగ తీసుకోండి అంటూ ప్రకటనలు ఇస్తుంటాయి. దీంతో ఈ గోల్డ్ డిపాజిట్ పథకంలో చేరుతున్న వారి సంఖ్య పెరుగుతోంది. మరి ఇందులో ఇన్వెస్ట్ చేయడం లాభమేనా?

సాధారణంగా గోల్డ్ డిపాజిట్ పథకాల వ్యవధి 12 నెలలుగా ఉంటుంది. నెల నెలా కొంత చెల్లించాలి. ఈ సమయం గడిచిన తర్వాత జమ చేసిన డబ్బులకు సమానమైన బంగారు నగలు తీసుకోవచ్చు. ఇలా నెల నెలా వాయిదా పద్ధతిలో చెల్లించిన వారికి ఆభరణాల తరుగు రద్దు చేయడం లేదా తగ్గించడం వంటి ఆఫర్లు ఇస్తుంటాయి జువెలరీ దుకాణాలు. అలాగే కొన్ని దుకాణాలు 11 నెలల వాయిదాలు చెల్లించండి ఒక నెల మేమే కడతాం అంటుంటాయి. అంటే 11 నెలలు చెల్లించి ఆగితే 12వ నెల తర్వాత అప్పటి సొమ్ముకు సమానమైన బంగారం తీసుకోవచ్చు. అలాగే కొన్ని షాపులు నగదు చెల్లించిన రోజున ఉన్న ధరను బట్టి బంగారం గ్రాముల్లో రికార్డ్ చేస్తాయి. ఏడాది తర్వాత ఎన్ని గ్రాముల బంగారం జమ అయితే అన్ని గ్రాములు ఇస్తుంటాయి.

 లాభమా? నష్టమా?

బంగారం ధరతో పాటు తరుగు, తయారీ ఛార్జీలు వినియోగదారులు చెల్లించాల్సి ఉంటుంది. ప్రతి నగకు ఒకే విధంగా ఉండదు. జువెలరీ షాపు వాళ్లకు లాభం వచ్చేది ఇక్కడే. స్కీమ్‌లో చెప్పో జీరో వేస్టేజీ, జీరో మేకింగ్ ఛార్జీల వంటి ఆఫర్లు కొన్ని డిజైన్లకు, మోడళ్లకు మాత్రమే అందిస్తుంటారు. అది గమనించాలి. మీరు ఇతర డిజైన్లను తీసుకుంటే ఛార్జీలన్నీ కట్టాల్సి వస్తుంది. దీంతో మీరు అనుకున్న రాబడిలో కాస్త తగ్గిపోతుందని గమనించాలి. అంటే స్కీమ్‌లో చేరే ముందే అన్ని విషయాలు క్షుణ్నంగా తెలుసుకోవాలి. అలాగే స్కీమ్ ఇచ్చే షాపులోనే నగలు కొనాల్సి ఉంటుంది. మీ డిపాజిట్లను డబ్బుగా ఇవ్వరు. నగల రూపంలోనే తీసుకోవాలి.

అందుకే బంగారం కొనేటప్పుడే స్వచ్ఛత, తరుగు, తయారీ ఛార్జీల వంటి వాటిపై స్పష్టమైన అవగాహన ఉండాలి. బీఐఎస్ హాల్ మార్కింగ్ చెక్ చేయాలి. నగలు సాధారణంగా 22 క్యారెట్లది ఉంటుంది. ఉదాహరణకు 22 క్యారెట్ల ఒక గ్రాము ధర రూ.7600 ఉందనుకుంటే 20 క్యారెట్ల బంగారం ధర తక్కువగా ఉంటుంది. ఇలా క్యారెట్లు తగ్గినప్పుడు ధర సైతం తగ్గుతుంది. అందుకే మీరు తీసుకునే నగ ఎన్ని క్యారెట్ల బంగారం అనేది తెలుసుకోవాలి. లేదంటే నష్టపోయే ప్రమాదం ఉంటుంది. అలాగే స్కీమ్ మధ్యలోనే మానేస్తే ఎలాంటి కండీషన్లు ఉంటాయో తెలుసుకోవాలి. జువెలరీ షాప్ ఆర్థిక పరిస్థితి, ట్రాక్ రికార్డులను పరిశీలించాలి. పూర్తి విషయాలు తెలుసుకున్నాకే డిపాజిట్ స్కీమ్‌లో చేరడం ద్వారా నష్టపోకుండా చూసుకోవచ్చు.