పోర్న్‌స్టార్‌ కేసు, దోషిగా తేలిన డొనాల్డ్ ట్రంప్.. ఈనెల 26న తుది తీర్పు, ఏం జరగనుంది

అమెరికా పీఠంపై త్వరలోనే డొనాల్డ్ ట్రంప్ కూర్చోనున్నారు. అయితే గత కొన్నేళ్లుగా ఆయనను ఎన్నో కేసులు వేధిస్తున్నాయి. కొన్ని కేసుల్లో ఆయన దోషిగా కూడా తేలారు. ట్రంప్‌పై నమోదైన పలు సివిల్, క్రిమినల్ కేసులు.. ఆయనకు పెద్ద తలనొప్పిగా మారాయి. ఒకానొక దశలో ఆ కేసుల కారణంగా.. అమెరికా అధ్యక్ష ఎన్నికల్లో పోటీకే ఆయన అనర్హుడు అని తీర్పువచ్చింది. దీంతో ఆయన వెంటనే పై కోర్టును ఆశ్రయించి ఉపశమనం తెచ్చుకున్నారు. ఈ క్రమంలోనే కొన్ని రోజుల క్రితమే.. హాష్ మనీ కేసులో డొనాల్డ్ ట్రంప్‌ను కోర్టు దోషిగా తేల్చింది. అయితే ఈ కేసులో తుది తీర్పును నవంబర్ 26వ తేదీన వెలువరిస్తామని కోర్టు స్పష్టం చేసింది. ఇప్పుడు ట్రంప్ అధ్యక్షుడిగా గెలిచిన నేపథ్యంలో అసలు ఈ కేసు తీర్పు ఎలా ఉండబోతోంది అనేది తీవ్ర ఆసక్తిని రేకెత్తిస్తోంది.

2020 అమెరికా అధ్యక్ష ఎన్నికల తర్వాత డొనాల్డ్ ట్రంప్ తన ఓటమిని అంగీకరించలేదు. ఈ నేపథ్యంలోనే ఆయన మద్దతుదారులు, రిపబ్లికన్లు దేశంలో పెద్ద ఎత్తున ఆందోళనలు చేశారు. వీటిని ట్రంప్ ప్రోత్సహించారని పలు కేసులు నమోదయ్యాయి. వీటితోపాటు మరికొన్ని క్రిమినల్ కేసులు కూడా ట్రంప్ మెడకు చుట్టుకున్నాయి. ఇక 2020 ఎన్నికల తర్వాత వరుసగా ఎన్నో కేసులు ఎదుర్కొన్నారు. ఒక కేసులో ట్రంప్ అరెస్ట్ కూడా అయ్యారు. ఇక ఒక కేసులో కోర్టు కూడా ఆయనను దోషిగా తేల్చింది. ఈ నేపథ్యంలోనే మరోసారి అమెరికా అధ్యక్షుడిగా బాధ్యతలు చేపట్టనున్న ట్రంప్.. తనపై నమోదైన కేసులను ఏ విధంగా ఎదుర్కొంటారు అనే విషయం ప్రస్తుతం ఆసక్తికరంగా మారింది.

పోర్న్‌స్టార్‌కు డబ్బులు చెల్లించిన కేసులో (హష్‌ మనీ) న్యూయార్క్‌లోని కోర్టు డొనాల్డ్ ట్రంప్‌ను దోషిగా తేల్చింది. ఈ కేసుకు సంబంధించి నవంబర్‌ 26వ తేదీన న్యూయార్క్ కోర్టు శిక్ష విధించనుంది. అయితే ఇప్పుడు ఆయన ఎన్నికల్లో గెలిచి దేశాధ్యక్షుడిగా ఎన్నికైన సందర్భంగా ఈ కేసు తీర్పుపై సర్వత్రా ఉత్కంఠ నెలకొంది. అయితే ఈ హష్ మనీ కేసును వాయిదా వేయాలని డొనాల్డ్ ట్రంప్‌ తరఫు లాయర్లు.. న్యూయార్క్ కోర్టు జడ్జిని కోరే అవకాశాలు ఉన్నాయని నిపుణులు అంచనా వేస్తున్నారు.

ఇక వాషింగ్టన్‌ డీసీ, ఫ్లోరిడా రాష్ట్రాల్లో నమోదైన 2 క్రిమినల్‌ కేసులు కూడా ట్రంప్‌పై ప్రభావం చూపే అవకాశాలు ఉన్నట్లు సమాచారం. దీంతో ఆ రెండు క్రిమినల్ కేసుల విచారణను కూడా కొంతకాలం వాయిదా పడేలా చూసేందుకు ట్రంప్ లాయర్లు ప్రయత్నాలు చేస్తున్నారు. అలా జరిగితే.. స్పెషల్‌ కౌన్సిల్ జాక్‌ స్మిత్‌పై వేటు వేయవచ్చని ట్రంప్‌ సన్నిహితులు ఆలోచిస్తున్నట్లు తెలుస్తోంది. స్మిత్‌ను తొలగించే ఆలోచన ఉందని.. తద్వారా తనపై నమోదైన కేసులకు ముగింపు పలకాలని భావిస్తున్నట్లు డొనాల్డ్‌ ట్రంప్‌ కూడా అనేకసార్లు బహిరంగంగానే చెప్పడం గమనార్హం. అయితే డొనాల్డ్‌ ట్రంప్ వచ్చే ఏడాది జనవరి 20వ తేదీన అధ్యక్ష బాధ్యతలు చేపట్టనున్నారు. దానికి మరింత సమయం ఉన్నందున ఆ లోపు ఎలాంటి పరిణామాలు చోటు చేసుకోనున్నాయి అనేది ప్రస్తుతం తీవ్ర ఆసక్తిగా మారింది.