నెతన్యాహు అనూహ్య నిర్ణయం.. ఇజ్రాయేల్ రక్షణ మంత్రికి ఉద్వాసన

పశ్చిమాసియాలో ఉద్రిక్తతలు కొనసాగుతున్న తరుణంలో ఇజ్రాయేల్ ప్రధాని బెంజమిన్ నెతన్యాహు తీసుకున్న నిర్ణయం విస్మయానికి గురిచేస్తోంది. రక్షణశాఖ మంత్రి యోవ్‌ గాలంట్‌‌కు ఉద్వాసన పలికారు. గతేడాది అక్టోబరులో గాజాలో యుద్ధం మొదలైప్పటి నుంచే ఇద్దరి మధ్య విభేదాలు కొనసాగుతున్నాయి. గాజాలో కాల్పుల విరమణ, బందీల విడుదలలో నెతన్యాహు, గాలంట్ మధ్య అభిప్రాయబేధాలు తలెత్తాయి. అయితే, ఇంత వరకూ గాలంట్‌పై నెతన్యాహు ఎలాంటి చర్యలు తీసుకోలేదు. కానీ, మంగళవారం అర్ధరాత్రి అనూహ్యంగా తన నిర్ణయాన్ని ప్రకటించారు.

‘‘యుద్ధం సమయంలో ప్రధానికి, రక్షణశాఖ మంత్రికి మధ్య పూర్తి నమ్మకం అవసరం.. మొదట్లో అలాంటి నమ్మకమే ఉండేది.. ఎన్నో సానుకూల ఫలితాలు సాధించాం.. దురదృష్టవశాత్తు ఇప్పుడది కరవైంది.. ఇద్దరి మధ్య అంతరాలు పెరిగాయి. విశ్వాసం సన్నగిల్లింది’ అని నెతన్యాహు పేర్కొన్నారు. గాలంట్‌ స్థానంలో తనకు అత్యంత నమ్మకస్తుడు, విదేశాంగ మంత్రి ఇజ్రాయెల్‌ కాట్జ్‌ను నియమించనున్నారు. విదేశాంగ శాఖ బాధ్యతలను ఇటీవల తన క్యాబినెట్‌లో చేరిన మాజీ ప్రత్యర్ధి గిడియాన్‌ సార్‌కు అప్పగించారు.

ఇదిలా ఉండగా, గత ఏడాది మార్చిలోనూ గాలంట్‌ను పదవి నుంచి తొలగించేందుకు నెతన్యాహు ప్రయత్నించి.. విఫలమయ్యారు. నెతన్యాహుకు వ్యతిరేకంగా దేశవ్యాప్తంగా పెద్ద ఎత్తున నిరసనలు వెల్లువెత్తడంతో వెనక్కి తగ్గారు. ఇజ్రాయేల్‌ న్యాయవ్యవస్థలో మార్పుల కోసం నెతన్యాహు తీసుకొచ్చిన కొత్త చట్టాన్ని యోవ్‌ గాలంట్‌ తీవ్రంగా వ్యతిరేకించారు. దీంతో ఆయన్ను మంత్రి వర్గం నుంచి భర్తరఫ్‌ చేస్తున్నట్లు నెతన్యాహు ప్రకటించారు. ఈ నేపథ్యంలో ప్రధానికి వ్యతిరేకంగా వేలాది మంది వీధుల్లోకి వచ్చి జాతీయ జెండాలు పట్టుకుని నిరసనలు చేపట్టారు.

హమాస్‌పై యుద్ధం పేరుతో గాజాలో ఇజ్రాయేల్ కొనసాగిస్తోన్న నరమేధాన్ని గాలంట్ వ్యతిరేకించారు. ఈ విషయంలో నెతన్యాహు, గాలంట్ మధ్య వివాదం కొనసాగుతోంది. తనను మంత్రివర్గం నుంచి తొలగించిన తర్వాత గాలంట్ మాట్లాడుతూ... ఇజ్రాయేల్ భద్రత తన జీవిత లక్ష్యంగా మిగిలిపోతుందని అన్నారు. ఇక, ఏడాదికిపైగా కొనసాగుతోన్న హమాస్, ఇజ్రాయేల్ యుద్ధం ఇప్పటి వరకూ 43,391 మంది ప్రాణాలు కోల్పోయారు. వీరిలో ఎక్కువ శాతం మంది సాధారణ పౌరులే కావడం అత్యంత బాధాకరం.

గాజాతో పాటు లెబనాన్‌లోని హెజ్బొల్లా‌పై కూడా ఇజ్రాయేల్ దాడులు కొనసాగిస్తోంది. మంగళవారం గాజా, లెబనాన్‌లో ఇజ్రాయేల్ సైన్యం వైమానిక, భూతల దాడులు చేపట్టింది. లెబనాన్‌ వ్యాప్తంగా దాడులు జరిగాయని, ఈ ఘటనల్లో ఒకరు ప్రాణాలు కోల్పోగా.. 20 మంది గాయపడినట్టు ఆ దేశ అధికారులు తెలిపారు. దక్షిణ లెబనాన్‌, బేకన్ లోయలోనూ వైమానిక దాడులు జరిగాయి