సివిల్ వివాదాలను క్రిమినల్ కేసులుగా మార్చొద్దు.. పోలీసులకు సుప్రీంకోర్టు వార్నింగ్

తరుచూ సివిల్ వివాదాలను క్రిమినల్ కేసులుగా మార్చి సాధారణ పౌరులను వేధింపులకు గురిచేస్తోన్న పోలీస్ అధికారులను కట్టడి చేయాలని ఉత్తర్ ప్రదేశ్ డీజీపీకి సర్వోన్నత న్యాయస్థానం స్పష్టం చేసింది. ఆ పద్ధతికి స్వస్తి చెప్పకపోతే డీజీపీ తన జీవితాంతం గుర్తుండిపోయేలా ఆదేశాలు జారీ చేస్తామని సుప్రీంకోర్టు గురువారం హెచ్చరించింది. డజనుకుపైగా క్రిమినల్ కేసులు నమోదైన ఓ వ్యక్తి మందస్తు బెయిల్ పిటిషన్ విచారణ సందర్భంగా జస్టిస్ సూర్యకాంత్, జస్టిస్ ఉజ్జల్ భూయన్‌ల ధర్మాసనం ఈ మేరకు వ్యాఖ్యలు చేసింది. వివిధ భూ వివాదాలకు సంబంధించి క్రిమినల్ కేసులు పెట్టి తనను, తన కుటుంబ సభ్యులను పోలీసులు వేధిస్తున్నారని అతడు వాపోయాడు. అతడిపై డజనుకిపైగా క్రిమినల్ కేసులను నమోదైన విషయం ధర్మాసనం దృష్టికి రావడంతో న్యాయమూర్తులు విస్తుపోయారు.

యూపీ ప్రభుత్వం తరఫున సీనియర్ న్యాయవాది రాణా ముఖర్జీ వాదనలు వినిపిస్తూ. ‘ఒకవైపు నిందితులు విచారణకు సహకరించడం లేదని, మరోవైపు అరెస్టు నుంచి రక్షణ కోరుతున్నారు’ అని అన్నారు. ఈ సందర్భంగా ధర్మాసనం జోక్యం చేసుకుంటూ.. అతడ్ని అరెస్టు చేయకుండా తాము కాపాడినప్పటికీ.. పోలీసుల ముందు హాజరైన మరుక్షణం నమోదైన తాజా కేసులో అరెస్టు చేస్తారనే భయంతో పిటిషినర్ ఉన్నట్టు కనినిపించిందని పేర్కొంది. ఈ సందర్భంగా యూపీ పోలీసుల తీరుపై ఆగ్రహం వ్యక్తం చేసింది.

‘యూపీ పోలీసులు ప్రమాదకర ప్రాంతంలోకి ప్రవేశిస్తున్నారు.. పూర్తిగా సివిల్ వివాదాలపై క్రిమినల్ కేసులు నమోదుచేస్తున్నారు.. డీజీపీకి మేము చెప్పిదే ఒకటే ఈ పద్దతి పోలీసులు తక్షణమే మార్చుకోకుంటే.. మీకు జీవితాంతం గుర్తిండిపోయే ఆదేశాలు ఇస్తాం’ అని తీవ్ర స్వరంతో న్యాయమూర్తులు హెచ్చరించారు. దీనికిపై లాయర్ ముఖర్జీ మాట్లాడుతూ.. పోలీసులు కోర్టు ఆదేశాలను పట్టించుకోకపోతే, కేసును ప్రభుత్వానికి తిరిగి పంపుతానని చెప్పారు. తమ వ్యాఖ్యలు పోలీసుల ప్రవర్తనకు సంబంధించనవని, సుప్రీంకోర్టు సందేశాన్ని మీ ద్వారా పంపాలని లాయర్‌కు సూచించింది.

అలాగే, ఆరోపణలు ఎదుర్కొంటున్న పిటిషనర్‌ మొబైల్ ఫోన్‌కు సమన్లు పంపి.. విచారణ అధికారి ఎదుటు హాజరయ్యే తేదీ, ప్రదేశం స్పష్టంగా అందులో పేర్కొనాలని యూపీ పోలీసులను ఆదేశించింది. అంతేకాదు, తమ అనుమతి లేకుండా అతడిపై ఎటువంటి కొత్త కేసు నమోదుచేసి.. కస్టడీలోకి తీసుకోరాదని ధర్మాసనం తేల్చిచెప్పింది.