బంగారం ధరలు భారీగా పెరుగుతాయ్.. కీలక రిపోర్ట్.. తులం రేటు ఎంతకు చేరుతుందంటే

బంగారం ధర ఆకాశాన్నంటుతోంది. గత ఏడాది కాలంగా చూసుకుంటే భారీగా పెరిగింది. మధ్య తరగతి ప్రజలు బంగారం కొనుగోలు చేయలేని స్థాయికి ఎగబాకింది. ఎప్పుడు తగ్గుతుందా అని చాలా మంది చూస్తున్నారు. అయితే, బంగారం ధరల పెరుగుదల ఇక్కడితో ఆగదని, వచ్చే ఏడాది ఇంకా భారీగానే పెరిగే అవకాశం ఉందని అంతర్జాతీయ కన్సల్టెన్సీ, పెట్టుబడుల సేవల సంస్థ గోల్డ్ మ్యాన్ శాక్స్ అంచనా వేసింది. వచ్చే ఏడాది చివరి నాటికి ఔన్సు బంగారం (31.10 గ్రాములు) ధర 3,150 డాలర్లకు చేరుకునే అవకాశాలు ఉన్నాయని తెలిపింది. అంటే గ్రాము ప్యూర్ గోల్డ్ 24 క్యారెట్ల బంగారం రేటు మన దేశీయ కరెన్సీలో గ్రాముకు రూ.8,553 కావచ్చని అంచనా వేస్తింది.

ప్రస్తుతం అంతర్జాతీయ మార్కెట్లో ఔన్సు బంగారం రేటు 2650 డాలర్ల స్థాయిలో ట్రేడింగ్ అవుతోంది. ఇక హైదరాబాద్ బులియన్ మార్కెట్లో 24 క్యారెట్ల మేలిమి గోల్డ్ ధర గ్రాముకు రూ. 7800 స్థాయిలో ఉంది. ఇక 22 క్యారెట్ల బంగారం ధర గ్రాముకు రూ. 7100 వద్ద ట్రేడింగ్ అవుతోంది. దీర్ఘకాలంలో బంగారం దరలు భారీగా పెరుగుతాయని అంచనా వేస్తున్నారు. వచ్చే ఏడాది చివరి నాటికి 19 శాతం వృద్ధితో 24 క్యారెట్ల పసిడి ధర తులానికి రూ. 85,530 వరకు చేరుకోవచ్చని గోల్డ్ మ్యాన్ శాక్స్ అంచనా వేసింది. ఇక 22 క్యారెట్ల బంగారం ధర 10 గ్రాములకు రూ. 75,000 మార్క్ దాటవచ్చని అభిప్రాయపడింది.

రష్యా- ఉక్రెయిన్, ఇరాన్- ఇజ్రాయెల్ వంటి వివిధ దేశాల మధ్య భౌగోళిక ఉద్రిక్తతలు, యుద్ధాలు పసిడి గిరాకీకి ప్రధాన కారణంగా నివేదిక తెలిపింది. అలాగే పెరుగుతున్న ద్రవ్యోల్బణం, పలు దేశాల కేంద్ర బ్యాంకులు బంగారం నిల్వలు భారీగా పెంచుకుంటుండడం గోల్డ్ రేట్లు పెరిగేందుకు కారణమవుతున్నట్లు గోల్డ్ మ్యాన్ శాక్స్ నివేదిక విశ్లేషించింది. మరోవైపు.. యూబీఎస్ సంస్థ సైతం బంగారం ధరలు భారీగా పెరిగే అవకాశం ఉందని అంచనా వేస్తింది. ఔన్సు బంగారం ధర వచ్చే నెలలోనే 2900 డాలర్లు దాటవచ్చని తెలిపింది. వచ్చే ఏడాది చివరకు ఇది 3 వేల డాలర్ల మార్క్ దాటుతుందని అంచనా వేసింది. ప్రస్తుత స్థాయి కంటే బంగారం ధరలు మరింత కిందకు దిగే అవకాశాలు చాలా తక్కువగా ఉన్నట్లు వివరించింది.