పీఎఫ్ ఖాతాదారులకు లాస్ట్ ఛాన్స్.. ఈపీఎఫ్ఓ కీలక ప్రకటన.. డిసెంబర్ 15 వరకు గడువు పొడిగింపు!

ఉద్యోగులకు సంబంధించిన యూనివర్సల్ అకౌంట్ నంబర్ యాక్టివేషన్‌ సంబంధించి కీలక ప్రకటన చేసింది ఉద్యోగుల భవిష్యనిధి సంస్థ ఈపీఎఫ్ఓ. యూఏఎన్ యాక్టివేషన్ గడువును పొడిగిస్తున్నట్లు తెలిపింది. డిసెంబర్ 15వ తేదీ వరకు గడువు ఇస్తున్నట్లు వెల్లడించింది. వాస్తవానికి యూఏఎన్ యాక్టివేషన్ గడువు నవంబర్ 30వ తేదీతో ముగిసింది. ఈ క్రమంలో ఉద్యోగులు, కంపెనీల యాజమాన్యాల నుంచి ఫిర్యాదులు అందిన క్రమంలో తాజాగా ఈ గడువును డిసెంబర్ 15వ తేదీ వరకు పొడిగించినట్లు తెలుస్తోంది.

ప్రస్తుతం ఆర్థిక సంవత్సరంలో ఉద్యోగాల్లో చేరిన వారి యూఏఎన్ యాక్టివ్‌గా ఉండాలని తెలిపింది. 'యూఏఎన్ యాక్టివేషన్, బ్యాంక్ ఖాతాతో ఆధార్ లింక్ సంబంధించిన గడువును డిసెంబర్ 15 వరకు పొడిగించాం. ప్రస్తుత ఆర్థిక ఏడాదిలో ఉద్యోగాల్లో చేసిన వారి యూఏఎన్ యాక్టివ్‌లో ఉండేలా చూడాలి. అప్పుడే ఈఎల్ఐ పథకాల ప్రయోజనాలు అందుతాయి' అని కంపెనీల యాజమాన్యాలకు సూచించింది ఈపీఎఫ్ఓ. గడువు చివరి నిమిషం వరకు వేచి ఉండకుండా వీలైనంత త్వరగా యూఏఎన్ యాక్టివేషన్ పూర్తి చేయాలని స్పష్టం చేసింది.

 ఈ ఏడాది ప్రవేశపెట్టిన వార్షిక బడ్జెట్‌లో కేంద్ర ప్రభుత్వం మూడు ఈఎల్ఐ పథకాలను ప్రకటించిన సంగతి తెలిసిందే. స్కీమ్-ఏలో భాగంగా మొదటి సారి ఉద్యోగాల్లో చేరిన వారిని ఈపీఎఫ్ఓ ఖాతాల ద్వారా గుర్తించి వారికి ఒక నెల వేతనాన్ని ప్రోత్సాహకంగా ఇస్తామని తెలిపింది. రూ.15 వేల వరకు మూడు విడతల్లో అందించనుంది. గరిష్ఠంగా నెలకు రూ.1 లక్ష లోపు శాలరీ ఉన్న వారే అర్హులు.

అలాగే స్కీమ్-బీలో ఉత్పాదక రంగంలో ఉపాధి కల్పనకు ప్రోత్సహించేందుకు ఉద్యోగితో పాటు కంపెనీ యాజమాన్యానికి సైతం ప్రోత్సాహకాలు ఉంటాయి. మొదటి సారి ఉద్యోగంలో చేరే వారికి, కంపెనీలకు తొలి నాలుగేళ్ల పాటు నిర్ధేశిత వేతన స్కేళ్లలో ఈపీఎఫ్‌లో చందాలను ప్రోత్సాహకంగా అందిస్తారు. ఇక స్కీమ్ -సీ ద్వారా ప్రతి ఉద్యోగికి ఈపీఎఫ్ఓ వాటాగా యజమానులు చెల్లించేందుకు రెండేళ్ల పాటు నెలకు రూ.3 వేలు అందిస్తారు. ఈ డిసెంబర్, 2024 నెలాఖరు నుంచే ఈ పథకాన్ని అమలు చేసే అవకాశాలు కనిపిస్తున్నాయి.