ఇల్లు తాకట్టు పెట్టి.. ఎస్బీఐ రూ.10 లక్షల లోన్ తీసుకుంటే.. ఈఎంఐ ఎంత కట్టాలి?

బ్యాంకులు చాలా రకాల లోన్స్ ఇస్తుంటాయని తెలిసిందే. అందులో ఆస్తిపై రుణం కూడా ఒకటి. అంటే ఇల్లు, ఫ్లాట్, ప్లాట్ తాకట్టు పెట్టి లోన్ తీసుకోవడం. ఇలాంటి రుణాలు సరసమైన వడ్డీ రేట్లు, కనీస డాక్యుమెంట్‌తోనే పొందే అవకాశం ఉంటుంది. ఆస్తులను తనఖా పెట్టి రుణాలు తీసుకోవాలనుకున్నప్పుడు బ్యాంకులు సైతం వేగంగానే రుణాలు మంజూరు చేస్తుంటాయి. వీటిని సెక్యూర్డ్ లోన్స్‌గా చెబుతారు. లోన్ తిరిగి చెల్లించలేనప్పుడు తనఖా పెట్టిన ఆస్తిని వేలం వేసి తమ డబ్బులను బ్యాంకులు రికవరీ చేసుకుంటాయి. దేశీయ అతిపెద్ద బ్యాంక్ అయిన స్టేట్ బ్యాంక్ ఆఫ్ ఇండియాలో ఆస్తిపై రుణాలకు వడ్డీ రేట్లు ఎలా ఉన్నాయి? రూ.10 లక్షల లోన్ తీసుకుంటే నెల నెలా ఈఎంఐ ఎంత కట్టాల్సి వస్తుంది? అనేది ఓసారి తెలుసుకుందాం.

ఇల్లు, ఫ్లాట్ తాకట్టు పెట్టి రుణం కోసం దరఖాస్తు చేసే ముందు కొన్ని విషయాలు కచ్చితంగా తెలుసుకోవాలి. మీరు తనఖా పెట్టే ఆస్తి ఎలాంటి వివాదాల్లో ఉండకూడదు. చట్టబద్ధంగా ఉండాలి. ఆస్తికి అన్ని ఆమోదాలు ఉండాలి. ఆస్తి, రుణం తీసుకునే వ్యక్తి పేరుతోనే ఉండాలి. మంచి క్రెడిట్ స్కోర్ కలిగి ఉన్న వారికి లోన్ వేగంగా వస్తుంది. వడ్డీ రేటు సైతం తక్కువగా ఉంటుంది. ఈ రుణాలను 7 సంవత్సరాల నుంచి 20 ఏళ్ల లోపు వరకు తిరిగి చెల్లించే కాలక వ్యవధి ఎంచుకోవచ్చు. క్రెడిట్ స్కోర్, బ్యాంకుతో సత్సంబంధాలు, ఎంచుకునే టెన్యూర్ వంటి వివిధ అంశాలు వడ్డీ రేటును నిర్ణయించడంలో ప్రభావితం చేస్తుంటాయి.

 మీరు స్టేట్ బ్యాంక్ ఆఫ్ ఇండియాలో మీ ఇంటిని తాకట్టు పెట్టి లోన్ తీసుకోవాలని భావిస్తున్నారు అనుకుందాం. ప్రస్తుతం ఎస్‌బీఐలో ప్రాపర్టీ రుణాల వడ్డీ రేట్లు 10.60 శాతం నుంచి 11.30 శాతం వరకు ఉన్నాయి. అంటే మంచి క్రెడిట్ స్కోర్ కలిగి ఉండి బ్యాంకుతో సత్సంబంధాలు కలిగి ఉన్న వారికి కనిష్ఠ వడ్డీ విధిస్తుంటాయి. మీ ప్రాపర్టీని బట్టి మీరు రూ.7 కోట్ల వరకు లోన్ తీసుకోవచ్చు. రుణ మొత్తంపై 1 శాతం ప్రాసెసింగ్ ఫీజు, సర్వీస్ ట్యాక్స్ ఉంటుంది. ఇది గరిష్ఠంగా రూ.50 వేల వరకు ఉంటుంది. అలాగే లోన్ టూ వాల్యూ రేషియో 65 శాతంగా ఉంది. అంటే మీ ఆస్తిపై 65 శాతం వరకు లోన్ మంజూరు చేస్తారు. లోన్ టెన్యూర్ 7 ఏళ్ల నుంచి 20 ఏళ్ల వరకు ఎంచుకోవచ్చు.

మీరు మీ ఇంటిని తాకట్టు పెట్టి రూ.10 లక్షల రుణం తీసుకున్నారు అనుకుందాం. అప్పుడు మీకు నెల నెలా ఈఎంఐ ఎంత పడుతుందనేది ఆన్‌లైన్ కాలిక్యులేటర్ ద్వారా తెలుసుకోవచ్చు. మీరు 15 సంవత్సరాల కాల వ్యవధి ఎంచుకున్నారు అనుకుందాం. మీ క్రెడిట్ స్కోర్ ఎక్కువ ఉండి 10.60 శాతం వడ్డీ నిర్ణయించారు అనుకుందాం. అప్పుడు మీరు నెలకు రూ.11,116 చొప్పున ఈఎంఐ కట్టాలి. 15 ఏళ్లలో మొత్తం వడ్డీ రూ.10 లక్షలు అవుతుంది. అంటే మొత్తం రూ.20 లక్షలు కట్టాలి. లేదు మీరు 10 సంవత్సరాలే టెన్యూర్ ఎంచుకున్నారు అనుకుందాం. అప్పుడు మీకు నెలవారీ ఈఎంఐ రూ.13,550 వరకు పడుతుంది. అప్పుడు మీ వడ్డీ మొత్తం రూ.6.25 లక్షలు అవుతుంది. అంటే మీకు రూ.3.75 లక్షల వరకు ఆదా అవుతుంది. మీకు ఏది అనువైనదో దానిని ఎంచుకుని లోన్ త్వరగా పూర్తి చేసేలా ప్లాన్ చేసుకోవడం మంచిది.