నియంతపాలనకు ముగింపు.. అసద్ తండ్రి విగ్రహాలు ఈడ్చిపడేసిన రెబల్స్

గత పదమూడేళ్లుగా కొనసాగుతోన్న సిరియా అంతర్యుద్ధం కీలక దశకు చేరుకుంది. వారం రోజుల నుంచి తిరుగుబాటుదారులు ఒక్కొక్క నగరాన్ని స్వాధీనం చేసుకుంటూ రాజధాని డమాస్కస్‌‌ దిశగా సాగుతున్నారు. ప్రస్తుతం రాజధాని శివారు ప్రాంతాలు వారి అధీనంలోకి వెళ్లాయి. దీంతో సిరియా అధ్యక్షుడు బషర్ అల్‌- అసద్‌ దేశం విడిచి వెళ్లిపోయారనే ప్రచారం జరుగుతోంది. ఈ విషయాన్ని తిరుగుబాటుదారులు వెల్లడిస్తూ.. నిరంకుశ పాలన నుంచి సిరియా విముక్తి పొందిందని ప్రకటించారు. ఇదే సమయంలో అసద్ తండ్రి, సిరియా మాజీ అధ్యక్షుడు హఫేజ్ అల్ అసద్ విగ్రహాలను పెకలించి, రోడ్లపై ఈడ్చుకెళ్తున్న వీడియోలు వైరల్ అవుతున్నాయి. డమాస్కస్ నగరంలోని ఉన్న విగ్రహాలను ధ్వంసం చేసిన ఆందోళనకారులు.. సాయుధ తిరుగుబాటుదారులకు స్వాగతం పలుకుతున్నారు.

‘‘నిరంకుశ పాలకులు దేశం విడిచి పారిపోవడంతో.. సిరియాకు విముక్తి లభించింది... వీరి పాలనలో 50ఏళ్ల అణచివేత, 13 ఏళ్ల దౌర్జన్యం వల్ల ఎందరో సిరియన్లు ప్రాణాలు అరచేతుల్లో పట్టుకుని ఇతర దేశాలకు వెళ్లిపోయారు. ఈ రోజుతో ఈ చీకటి కాలానికి మేము ముగింపు పలుకుతున్నాం. సిరియాలో నవశకం ప్రారంభమైంది. విదేశాల్లో ఉన్న సిరియన్లు స్వదేశానికి తిరిగి రావాలని కోరుతున్నాం’’ అని రెబల్స్ సోషల్‌ మీడియా వేదికగా ప్రకటించారు.

సిరియాలో అసద్ కుటుంబ పాలన 1970లో మొదలైంది. తిరుగుబాటుతో అధికారం దక్కించుకున్న హఫేజ్ - అసద్‌.. సిరియా ప్రధాని మంత్రిగా.. అనంతరం అధ్యక్షుడిగా 2000లో చనిపోయేవరకూ కొనసాగారు. మూడు దశాబ్దాల ఆయన పాలన నిరంకుశంగా సాగినప్పటికీ.. సిరియాకు స్థిరత్వం అంధించింది. పశ్చిమాసియాలో ప్రధాన శక్తిగా సిరియా స్థిరపడింది. ఆయన మారణానంతరం కుమారుడు బషర్ అసద్ పగ్గాలు చేపట్టారు. దశాబ్దం తర్వాత 2011లో మొదటిసారి తిరుగుబాటు మొదలైంది.

వారికి వ్యతిరేకంగా ప్రజలు వీధుల్లోకి వచ్చారు. ఈ ఉద్యమాన్ని అణచివేయడానికి ప్రయత్నించడంతో అంతర్యుద్ధం ప్రారంభమైంది. గత రెండు, మూడేళ్లుగా తగ్గిన రెబల్స్.. తాజాగా మళ్లీ పోరాటం మొదలుపెట్టారు. గడచిన 13 ఏళ్లుగా సిరియా అంతర్యుద్దంలో 6 లక్షల మందికి పైగా పౌరులు చనిపోయారు. నగరాలకు నగరాలే ధ్వంసమయ్యాయి. పలు పట్టణాలు, గ్రామాలతో పాటు ప్రభుత్వానికి సంబంధించిన కీలకమైన భవనాలను తిరుగుబాటుదారులు అధీనంలోకి తీసుకున్నారు.

సిరియా రాజధానిని చుట్టుముట్టిన ‘హయాత్‌ తహరీర్‌ అల్‌ షమ్‌’ (హెచ్‌టీఎస్‌) నేతృత్వంలోని తిరుగుబాటుదళాలు.. చివరి ఆపరేషన్ శనివారం ప్రారంభించాయి. ఆదివారం మధ్యాహ్నానికి రాజధాని డమాస్కస్‌లోకి ప్రవేశించడంతో.. ‘ఎస్‌వైఆర్‌9218’ అనే రష్యా తయారీ ఐఎల్‌-76 విమానంలో అసద్ దేశం వదిలి వెళ్లినట్లు సంబంధిత అధికారులు పేర్కొన్నారు. దీంతో రెబల్స్‌ సిరియాకు స్వేచ్ఛను ప్రకటించారు.