సీఎం దేవేంద్ర ఫడ్నవీస్‌తో ఉద్ధవ్ ఠాక్రే భేటీ.. మహారాష్ట్ర రాజకీయాల్లో మరో సంచలనం

దేశం మొత్తం మీద.. మహారాష్ట్ర రాజకీయాలు ఎప్పుడూ ఆసక్తికరంగానే ఉంటాయి. రకరకాల ట్విస్ట్‌లు, టర్న్‌లతో హాట్ హాట్‌గా సాగుతుంటాయి. ఏ పార్టీ ఏ పార్టీతో ఎప్పుడు జట్టుకడుతుందో.. లేక ఎప్పుడు విడిపోతుందో తెలియదు. అంతేకాకుండా ఏ పార్టీ ఎప్పుడు చీలుతుందో.. పార్టీలో ఉన్న ఏ నేత ఆ పార్టీని చీల్చి మరే ఇతర పార్టీతో చేతులు కలుపుతారు అనేది చెప్పడం కాదు కదా కనీసం ఊహించడం కూడా రాజకీయ పండితులకు కష్టమే. ఎందుకంటే గత 5, 6 ఏళ్లలో మహారాష్ట్ర రాజకీయాల్లో చోటు చేసుకున్నన్ని మార్పులు, సంచలనాలు.. దేశంలోనే ఏ రాష్ట్రంలో జరగలేదంటే.. మహారాష్ట్ర రాజకీయాలు ఏ రేంజ్‌లో ఉంటాయో అర్థం చేసుకోవచ్చు. అయితే ఇటీవల జరిగిన మహారాష్ట్ర అసెంబ్లీ ఎన్నికల్లో బీజేపీ-షిండే శివసేన-అజిత్ పవార్‌ ఎన్సీపీలతో కూడిన మహాయుతి కూటమి తిరిగి అధికారాన్ని దక్కించుకుంది. ముఖ్యమంత్రిగా దేవేంద్ర ఫడ్నవీస్ ప్రమాణ స్వీకారం చేయగా.. తాజాగా మంత్రివర్గ విస్తరణ కూడా పూర్తయింది.

ఇక మహారాష్ట్ర ముఖ్యమంత్రిగా మరోసారి ప్రమాణ స్వీకారం చేసిన తర్వాత తొలిసారి దేవేంద్ర ఫడ్నవీస్‌ను శివసేన(యూబీటీ) అధినేత ఉద్ధవ్ ఠాక్రే కలవడం మహారాష్ట్ర రాజకీయాలు మరోసారి దేశంలో హాట్ టాపిక్‌గా మారాయి. ఉద్ధవ్ ఠాక్రేతో పాటు ఆయన కుమారుడు ఆదిత్య ఠాక్రే.. తన వర్గం ఎమ్మెల్యేలు అనిల్ పరబ్, వరుణ్ దేశాయ్ సహా పలువురు సీఎంతో భేటీ అయ్యారు. ప్రస్తుతం నాగ్‌పూర్‌లో మహారాష్ట్ర అసెంబ్లీ సమావేశాలు జరుగుతుండగా.. విధాన్ భవన్‌లోని ముఖ్యమంత్రి దేవేంద్ర ఫడ్నవీస్ ఛాంబర్‌లో ఈ సమావేశం జరిగింది.

అయితే ఈ భేటీ ఇప్పుడు హాట్ టాపిక్‌గా మారింది. మహారాష్ట్ర డిప్యూటీ సీఎం, షిండే శివసేన అధినేత ఏక్‌నాథ్ షిండే అసంతృప్తిగా ఉన్నారని వస్తున్న ఆరోపణల వేళ ఫడ్నవీస్-ఠాక్రే సమావేశం జరగడం ప్రాధాన్యం సంతరించుకుంది. ముఖ్యమంత్రిగా ప్రమాణ స్వీకారం చేసిన దేవేంద్ర ఫడ్నవీస్‌ను ఉద్ధవ్ ఠాక్రే అభినందించారు. ఈ భేటీ తర్వాత ఆదిత్య ఠాక్రే మీడియాకు వివరాలు వెల్లడించారు. మహారాష్ట్ర ప్రజల ఆకాంక్షల కోసం ప్రభుత్వంతో కలిసి పనిచేస్తామని తెలిపారు. ఈ క్రమంలోనే తమ పార్టీ చీఫ్ ఉద్ధవ్ ఠాక్రే.. సీఎం దేవేంద్ర ఫడ్నవీస్, అసెంబ్లీ స్పీకర్ రాహుల్ నార్వేకర్‌ను కలిసినట్లు చెప్పారు. మహారాష్ట్ర ప్రభుత్వం కోసం పనిచేస్తూ దేశ, రాష్ట్ర ప్రయోజనాల దృష్ట్యా అధికార, ప్రతిపక్ష పార్టీలు కలిసి పనిచేయాలని.. అందుకు రాజకీయ పరిపక్వత ఉండాలని ఆదిత్య ఠాక్రే తెలిపారు.

మొదట్లో బీజేపీ, శివసేన కలిసి కూటమిలో ఉండగా.. 2019లో బీజేపీతో తెగదెంపులు చేసుకున్న ఉద్ధవ్ ఠాక్రే.. కాంగ్రెస్, ఎన్సీపీల మద్దతుతో మహారాష్ట్ర సీఎం అయ్యారు. మహారాష్ట్ర ముఖ్యమంత్రి పదవి విషయంలో వచ్చిన విబేధాల కారణంగా ఉద్ధవ్ ఠాక్రే బీజేపీని కాదని.. కాంగ్రెస్, ఎన్సీపీల వైపు వెళ్లారు. ఈ క్రమంలోనే 2019లో మహారాష్ట్ర సీఎంగా ప్రమాణ స్వీకారం చేసిన ఉద్ధవ్ ఠాక్రే.. 2022 వరకు బాగానే ఉన్నారు. అయితే 2022లో ఆ పార్టీలో సీనియర్‌గా ఉన్న ఏక్‌నాథ్ షిండే తన వర్గం ఎమ్మెల్యేలతో కలిసి శివసేన నుంచి బయటికి వచ్చి.. బీజేపీకి మద్దతు ఇచ్చారు. దీంతో కాంగ్రెస్-శివసేన-ఎన్సీపీ కూటమి ప్రభుత్వం పడిపోయింది. బీజేపీ మద్దతుతో ఏక్‌నాథ్ షిండే మహారాష్ట్ర ముఖ్యమంత్రిగా ప్రమాణం చేశారు. ఆ తర్వాత ఎన్సీపీని చీల్చిన అజిత్ పవార్ తన వర్గం ఎమ్మెల్యేలతో కలిసి బీజేపీ-షిండే శివసేన కూటమికి మద్దతు ఇచ్చారు. ఈ మూడు పార్టీలతో ఏర్పడిన మహాయుతి కూటమి ఇటీవలి ఎన్నికల్లో కలిసి పోటీ చేసి.. విజయం సాధించి తిరిగి అధికారాన్ని నిలబెట్టుకుంది.