క్రిస్మస్ వేడుకల డ్రోన్ షోలో అపశృతి.. ప్రజలపై కూలిన వందల డ్రోన్లు, వీడియో వైరల్

ప్రస్తుతం ప్రపంచవ్యాప్తంగా క్రిస్మస్ వేడుకలు జరుగుతున్నాయి. ఒక్కో దగ్గర ఒక్కో విధంగా క్రిస్మస్ సంబరాలను నిర్వహించుకుంటున్నారు. కొన్ని ప్రాంతాల్లో భారీగా లైటింగ్ షోలు, డ్రోన్ షోలు, సంగీత కచేరీలు సహా రకరకాల ఈవెంట్లు నిర్వహిస్తూనే ఉన్నారు. అయితే తాజాగా అమెరికాలో నిర్వహించిన డ్రోన్ షోలో అపశృతి చోటు చేసుకుంది. గాల్లో ఎగురుతూ అబ్బురపరుస్తున్న వందలాది డ్రోన్లు.. ఒకదాన్ని మరొకటి ఢీకొన్నాయి. దీంతో ఆ డ్రోన్లు నేలకూలాయి. ఆ డ్రోన్ షో చూసేందుకు వచ్చిన ప్రజలపై పడటంతో పలువురు గాయపడ్డారు. ఇందులో కొందరి పరిస్థితి విషమంగా ఉన్నట్లు మీడియా కథనాలు వెలువడ్డాయి. ఈ ప్రమాదానికి కారణం ఏంటి అనే విషయాలపై అధికారులు రంగంలోకి దిగి.. ఆరా తీస్తున్నారు.

అమెరికాలోని ఫ్లోరిడా రాష్ట్రంలో జరిగిన ఈ డ్రోన్ ప్రమాదానికి సంబంధించిన వీడియోలు సోషల్ మీడియాలో చక్కర్లు కొడుతున్నాయి. ఫ్లోరిడాలోని ఇయోలా సరస్సుపై క్రిస్మస్‌ వేడుకల సందర్భంగా కొన్ని ఈవెంట్లు నిర్వహించారు. ఇందులో భాగంగా ఏరియల్ లైట్ షో అక్కడికి వచ్చిన వారిని ఆకట్టుకుంది. ఆకాశంలో వందలాది డ్రోన్లు ఎగురుతూ రంగురంగుల ప్రదర్శన అక్కడి వారిని మంత్రముగ్ధుల్ని చేసింది. ఇక ఈ ఏరియల్ లైట్ షోను చూసేందుకు భారీగా ప్రజలు తరలివచ్చారు. అయితే అప్పుడే అనుకోని ప్రమాదం ఎదురైంది. డ్రోన్ షో జరుగుతున్న సమయంలో అనుకోకుండా గాలిలో ఎగురుతున్న వందలాది డ్రోన్లు ఒకదాన్ని ఇంకొకటి ఢీకొట్టుకున్నాయి.

ఆ డ్రోన్లు గాల్లో ఎగురుతూ.. ఢీకొనడంతో అతి వేగంగా వచ్చి అక్కడికి వచ్చిన ప్రేక్షకులపై పడ్డాయి. దీంతో ఈ ఘటనలో 7 ఏళ్ల బాలుడు సహా పలువురు ప్రేక్షకులకు గాయాలు అయ్యాయి. ఇక గాయపడిన ఆ బాలుడి పరిస్థితి తీవ్ర విషమంగా ఉన్నట్లు అధికారులు వెల్లడించారు. ఇక గాల్లో ఎగురుతున్న డ్రోన్లు కూలిపోతున్న దృశ్యాన్ని అక్కడే ఉన్న ఓ వ్యక్తి వీడియో తీసి సోషల్‌ మీడియాలో పోస్ట్ చేయడంతో ఆ వీడియో కాస్తా ఇప్పుడు తెగ వైరల్‌గా మారింది. ఓర్లాండో సిటీతో కలిసి స్కై ఎలిమెంట్స్ అనే సంస్థ ఈ డ్రోన్ షోను ఏర్పాటు చేసినట్లు అధికారులు వెల్లడించారు. ఈ కార్యక్రమానికి ఫెడరల్ ఏవియేషన్ అడ్మినిస్ట్రేషన్ అనుమతి కూడా ఉందని తెలిపారు. అయితే ఈ డ్రోన్ల ప్రమాదానికి కారణం ఏంటో తెలుసుకునేందుకు అధికారులు రంగంలోకి దిగి దర్యాప్తు ప్రారంభించారు.