3 పెళ్లిళ్లు చేసుకుని కోటీశ్వరురాలైంది.. ఈ మాయలేడి ప్లాన్ వేస్తే మామూలుగా ఉండదు మరి

మనం ఇప్పటి వరకు ఎంతోమంది నిత్య పెళ్లి కూతుర్లు, నిత్య పెళ్లికొడుకుల గురించి విన్నాం చూశాం. వీళ్లంతా ఒకరికి తెలియకుండా మరొకరిని పెళ్లి చేసుకుంటూ దొరికినకాడికి డబ్బు, నగలు దోచేసి తమ దారిన తాము వెళ్లిపోతుంటారు. కానీ మనం ఇప్పుడు చూడబోయే కేసు మాత్రం ఇందుకు కాస్త భిన్నంగా ఉంటుంది. ఈమె కూడా వాళ్లలాగే ఒకరికి తెలియకుండా ఒకరిని పెళ్లి చేసుకుంటుంది.. కాకపోతే వాళ్లలా చిన్న మొత్తంలో డబ్బులు దోచేయెదు. ఒక్క పెళ్లి కుంభస్థలాన్నే కొడుకుంది. లక్షల్లో డబ్బులు గుంజుతుంది. ఇలా మూడు పెళ్లిళ్లు చేసుకునే ఈమె కోటీశ్వరురాలైంది. ఎలా ఇదంతా సాధ్యం అయింది.. వారి వద్ద నుంచి ఇంత పెద్ద మొత్తంలో ఆమె డబ్బులు ఎలా గుంజగల్గుతుందో మనం ఇప్పుడు తెలుసుకుందాం.

డెహ్రాడూన్‌కు చెందిన 36 ఏళ్ల సీమా అగర్వాల్ అలియా నిక్కి అందంగా ఉంటుంది. అయితే ఈమె తొలిసారి ఆమె 26 ఏళ్ల వయసులో ఆగ్రాలోని ఓ వ్యాపారి కుమారుడిని పెళ్లి చేసుకుంది. 2013లో వీరి వివాహం జరగ్గా.. పెళ్లైన కొంత కాలానికే అతడితో విడిపోయింది. అయితే అతడు నచ్చకపోవడం వల్ల కాదిది. తన ప్లాన్‌లో భాగంగా. అతడు తనను తీవ్రంగా ఇబ్బంది పెడుతున్నాడని, గృహహింస చట్టం కింద కేసు కూడా పెట్టి మరీ.. భర్త వద్ద నుంచి 75 లక్షల రూపాయలు తీసుకుని వెళ్లిపోయింది. ఇక ఆ తర్వాత హాయిగా కొన్నేళ్లపాటు హాయిగా జీవనం సాగించిన ఆమె మరోసారి పెళ్లికి రెడీ అయింది.

ఈక్రమంలోనే మరోసారి మాట్రిమోనియల్ సైట్‌లో తన ఫొటోలు పెట్టింది. అప్పటికే పెళ్లై భర్త చనిపోయాడని.. తానిప్పుడు రెండో పెళ్లి చేసుకోవాలనుకున్నట్లు వివరించింది. ఈమె ప్రొఫైల్ నచ్చడంతో 2017లో గురుగ్రామ్‌లోని ఓ సాఫ్ట్‌వేర్ ఇంజినీర్ ఆమెను పెళ్లి చేసుకున్నాడు. కొన్నాళ్లు ఇతడితో బాగానే గడిపిన నిక్కి ఆ తర్వాత అతడితో విడిపోయింది. ముఖ్యంగా అతడు తనతో అసహజ శృంగారం చేస్తున్నాడని ఆరోపిస్తూ.. అతడిపై కూడా కేసులు పెట్టింది. వాటిని వెనక్కి తీసుకోవడానికి రూ.10 లక్షలు కావాలంటూ చెప్పింది. ఆమె నుంచి తప్పించుకోవడానికి అతడు.. నిక్కి అడిగిందంతా ఇచ్చాడు. ఈ పెళ్లి తర్వాత కూడా చాలా హాయిగా కాలం వెళ్లదీసింది.

అయితే 2023 ఫిబ్రవరి నెలలో ముచ్చటగా మూడో పెళ్లికి సిద్ధం అయింది. మూడో పెళ్లికి కూడా మాట్రిమోనియల్ సైట్‌ను ఉపయోగించింది. తాను వితంతువుని అని చెబుతూ... జొత్వారాకు చెందిన ఓ నగల వ్యాపారిని పెళ్లాడింది. కొంతకాలం అతడితో బాగానే ఉన్న ఆమె.. జులై నెలలో అదును చూసి 30 లక్షల రూపాయల విలువ చేసే బంగారు ఆభరణాలు, రూ.6.5 లక్షల నగదును తీసుకుని పారిపోయింది. అయితే విషయం గుర్తించిన సదరు వ్యాపారి పోలీసులకు ఫిర్యాదు చేయగా కేసు నమోదు చేసుకుని దర్యాప్తు చేశారు.

ఎట్టకేలకు ఈ మాయ లేడీని పోలీసులు అరెస్ట్ చేశారు. డెహ్రాడూన్‌లోని ఆమె స్వగ్రామానికి వెళ్లి మరీ పట్టుకున్నారు. ఎందుకిలా భర్తను మోసం చేసి డబ్బులు తీసుకెళ్లావని ప్రశ్నించగా.. అదే తన పని అని అంటూ ఆమె చెప్పుకొచ్చింది. తానో నిత్య పెళ్లి కూతురిని అని ముఖ్యంగా పదేళ్ల సమయంలో తాను ముగ్గురిని పెళ్లి చేసుకుని.. వారిపైనే రివర్స్ కేసులు పెడుతూ డబ్బులు గుంజినట్లు ఒప్పుకుంది. మొత్తంగా ముగ్గురి వద్ద నుంచి కోటి 20 లక్షలకు పైగా డబ్బులు దోచేసినట్లు స్పష్టం చేసింది. బాధితులు నిక్కిపై కేసులు పెట్టే వీలులేకుండా ఈమెనే వాళ్లపై కేసులు పెట్టి భయపెట్టడం గమనార్హం. నిజాలన్నీ బయటకు రాగా మరి ఇప్పుడు ఈమెకు ఎలాంటి శిక్ష పడుతుందో చూడాలి.