యూపీలో భారీ ఎన్‌కౌంటర్.. ముగ్గురు ఖలీస్థానీ ఉగ్రవాదులు హతం

ఉత్తర్ ప్రదేశ్‌లోని ఫిలిబిత్‌లో జరిగిన ఎదురుకాల్పుల్లో ముగ్గురు ఖలీస్థానీ ఉగ్రవాదులు హతమయ్యారు. పంజాబ్‌ గురుదాస్‌పూర్‌లో పోలీసులపై గ్రనేడ్ దాడిలో నిందితులుగా ఉన్న ముగ్గుర్ని అరెస్ట్ చేయడానికి ప్రయత్నించగా.. వారు పోలీసులుపై కాల్పులు జరిపారు. దీంతో పోలీసులు ఎదురుకాల్పులు జరపడంతో గుర్వీందర్ సింగ్, వీరేంద్ర సింగ్, జసన్‌ప్రీత్ సింగ్‌ మృతిచెందినట్టు అధికారులు తెలిపారు. వారి వద్ద నుంచి ఏకే సరీస్ రైఫిల్స్ రెండు, గ్లోక్ పిస్టల్స్ స్వాధీనం చేసుకున్నట్టు చెప్పారు. ఈ ముగ్గురూ పాక్ ప్రేరేపిత ఖలీస్థాన్ జిందాబాద్ ఫోర్స్‌కు చెందినవారని పంజాబ్ పోలీసులు వెల్లడించారు.

‘పంజాబ్ సరిహద్దుల్లోని పోలీస్ స్టేషన్లు, ఔట్‌పోస్ట్‌లపై గ్రనేడ్ దాడుల వెనుక వీరి హస్తం ఉంది.. గురుదాస్‌పూర్‌లో పోలీసులపై దాడి కేసులో వీరు నిందితులు.. ఫిలిబిత్‌ జిల్లా పీఎస్ పురాన్‌పుర పోలీస్ స్టేషన్ పరిధిలో జరిగిన ఎన్‌కౌంటర్‌లో యూపీ, పంజాబ్ పోలీసులు పాల్గొన్నారు..’ అని పంజాబ్ డీజీపీ గౌరవ్ యాదవ్ తెలిపారు. ఉగ్రవాదుల కార్యకలాపాలపై పూర్తిస్థాయి విచారణ కొనసాగుతోంది అని తెలిపారు.

ఈ ఎన్‌కౌంటర్‌ను సాహసోపేతమైన చర్యగా యూపీ డీజీపీ ప్రశాంత్ కుమార్ అభివర్షించారు. పంజాబ్, యూపీ పోలీసులు మధ్య సమన్వయానికి ఇదో మంచి ఉదాహరణ అని వ్యాఖ్యానించారు. వారం వ్యవధిలోనే పంజాబ్‌లో మూడు పోలీస్ స్టేషన్లపై దాడులు జరగడంతో దీనిని ఖలీస్థానీ ఉగ్రవాదుల చర్యగా భద్రతా బలగాలు అనుమానించాయి. మంగళవారం అమృత్‌సర్‌లోని ఇస్లామాబాద్ పోలీస్ స్టేషన్, శుక్రవారం గురుదాస్‌పూర్ బంగర్, బక్షీవాల్ స్టేషన్ల వద్ద పేలుళ్లు చోటుచేసుకున్నాయి. ఈ ఘటనలో ఎవరికీ ఎటువంటి గాయాలు కాలేదు. అయితే, ఈ దాడులకు బాధ్యతవహిస్తూ ఖలీస్థాన్ జిందాబాద్ ఫోర్స్ సోసల్ మీడియాలో పోస్ట్ చేసింది.

గురుదాస్‌పూర్‌కు 750 కిలోమీటర్ల దూరంలోని ఫిలిభిత్‌‌లో సిక్కు సామాజిక వర్గం జనాభా ఎక్కువగా ఉండటంతో ఉగ్రవాదులు అక్కడకు వచ్చినట్టు విశ్వసనీయ వర్గాలు పేర్కొన్నాయి. కానీ, యూపీ పోలీసులు మాత్రం స్థానికుల నుంచి వారికి పూర్తి మద్దతు ఉందని తెలిపారు. గత రెండు సంవత్సరాలుగా పంజాబ్‌లో మరోసారి ఖలీస్థానీలు ఉనికి చాటుకునే ప్రయత్నాలు చేస్తున్న విషయం తెలిసిందే.