సిరియా మాజీ అధ్యక్షుడికి షాకిచ్చిన భార్య.. విడాకుల కోసం దరఖాస్తు

ఇటీవలే తిరుగుబాటుదారులు సిరియాను వారి అధీనంలోకి తీసుకోవడంతో అధ్యక్షుడు బషర్ అల్ అసద్ అక్కడి నుంచి పారిపోయారు. ముఖ్యంగా రష్యాకు వెళ్లి ప్రస్తుతం అక్కడే తలదాచుకుంటున్నారు. దేశాధ్యక్ష పదవి పోవడంతో ప్రస్తుతం అనేక ఆంక్షల మధ్య జీవనం సాగిస్తున్న ఈయనకు.. తాజాగా ఆయన భార్య షాక్ ఇచ్చింది. మాస్కోలో సంతోషంగా ఉండలేకపోతున్న ఆమె.. అసద్‌కు విడాకులు ఇవ్వాలని నిర్ణయించుకుందట. ఈక్రమంలోనే విడాకుల కోసం కూడా ఇప్పటికే దరఖాస్తు చేసుకున్నట్లు తెలుస్తోంది. ఆ పూర్తి వివరాలు ఏంటో మనం ఇప్పుడు తెలుసుకుందాం.

డిసెంబర్ 8వ తేదీన సిరియా రాజధాని డమాస్కన్‌ని తిరుగుబాటుదారులు చేజిక్కించుకోవడంతో అధ్యక్షుడు బషర్ అల్ అసద్ దేశం విడిచి పారిపోయారు. కుటుంబంతో సహా రష్యాకు వెళ్లి జీవనం సాగిస్తున్నారు. అయితే అనేక ఆంక్షలతో అక్కడ ఏమాత్రం సంతోషంగా గడపలేకపోతున్న అసద్ భార్య అస్మా అసద్.. రష్యా కోర్టులో విడాకుల కోసం దరఖాస్తు చేసుకున్నట్లు తెలుస్తోంది. విడాకులు పొందిన వెంటనే ఆమె లండన్ వెళ్లిపోవాలని చూస్తోందట.

అస్మా ఇంగ్లాండ్ రాజధాని లండన్‌లోనే జన్మించింది. అక్కడే తన కుటుంబ సభ్యులతో కలిసి గడిపింది. చదువు కూడా అక్కడే పూర్తి చేసుకుంది. దీంతో ఆమెకు యూకేతో పాటు సిరియన్ పౌరసత్వం కూడా లభించింది. ఇలా ద్వంద్వ పౌరసత్వం కల్గిన ఈమె.. 25 ఏళ్ల వయసులో అసద్‌ను ప్రేమించి పెళ్లి చేసుకుంది. ముఖ్యంగా ఆమె జేపీ మోర్గాన్‌లో పని చేస్తున్న సమయంలో.. అసద్ లండన్‌లో చదువుకుంటున్నాడు. అక్కడే వారిద్దరూ కలుసుకోగా స్నేహం మొదలైంది. అదే ఆ తర్వాత ప్రేమగా మారడంతో.. 2000 సంవత్సరంలో పెళ్లి చేసుకుని ఒక్కటయ్యారు. ఇక ఆ తర్వాత నుంచి భర్తతో పాటు సిరియాలోనే ఉంది అస్మా అసద్.

కానీ కొన్నేళ్ల క్రితమే అస్మా అసద్‌కు బ్రెస్ట్ క్యాన్సర్ వచ్చింది. ఎన్నో చికిత్సల తర్వాత ఆమె దాని నుంచి 2019లో బయట పడింది. ఇక జీవితమంతా హాయిగా, ఆరోగ్యంగా బతకొచ్చని అనుకుంది. కానీ ఆమె ఆశ ఎంతో కాలం నిలవలేదు. ఎందుకంటే బ్రెస్ట్ క్యాన్సర్ నుంచి బయట పడిన మూడేళ్లకే ఆమెకు ల్యుకేమియా ఉన్నట్లు తెలిసింది. 2024 మే నెలలో వైద్యులు ల్యుకేమియా ఉన్నట్లు నిర్ధారించారు. ఇక అప్పటి నుంచి ఆమె చికిత్స పొందుతూనే ఉంది. ప్రస్తుతం మాస్కోలో ఉన్న ఆమె.. అస్సలే సంతోషంగా గడపలేకపోతుందట. ఈక్రమంలోనే భర్తతో విడాకులకు ధరఖాస్తు చేసుకుంది. ఇదంతా ఇలా ఉండగా.. రష్యా అధికారులు అసద్ ఆస్తులను స్తంభింపజేశారు. 270 కిలోల బంగారంతో పాటు 2 బిలియన్ల డాలర్ల డబ్బును ఆయన వాడుకోనీయకుండా చూస్తున్నారు. ఇవి మాత్రమే కాకుండా అసద్‌కు మాస్కోలో మొత్తం 18 అపార్ట్‌మెంట్లు ఉన్నాయి.