శ్రీవారి భక్తులకు అలర్ట్.. తిరుమలలో బ్రేక్ దర్శనాలు రద్దు

 తిరుమల శ్రీవారి భక్తులకు అలర్ట్.. జనవరి 7వ తేదీన తిరుమల శ్రీవారి ఆలయంలో కోయిల్ ఆళ్వార్ తిరుమంజనం నిర్వహించనున్నారు. వైకుంఠ ఏకాదశి పర్వదినాన్ని పురస్కరించుకుని 2025 జనవరి 10 నుంచి 19వ తేదీ వరకు తిరుమలలో వైకుంఠ ద్వార దర్శనాలు కల్పించనున్నారు. వైకుంఠ ద్వార దర్శనాలను పురస్కరించుకుని జనవరి 7వ తేదీ మంగళవారం శ్రీవారి ఆలయంలో కోయిల్ ఆళ్వార్ తిరుమంజనం నిర్వహించనున్నారు. సాధారణంగా తిరుమలలో ఏడాదికి నాలుగుసార్లు కోయిల్‌ ఆళ్వార్‌ తిరుమంజనం నిర్వహించడం ఆనవాయితీ. ఉగాది పర్వదినం, ఆణివార ఆస్థానం, శ్రీవారి వార్షిక బ్రహ్మోత్సవాలు, వైకుంఠ ఏకాదశికి ముందు వచ్చే మంగళవారం ఆలయ శుద్ధి కార్యక్రమాన్ని టీటీడీ నిర్వహిస్తోంది.

కోయిల్ ఆళ్వార్ తిరుమంజనంలో భాగంగా.. జనవరి ఏడో తేదీ ఉదయం ఆరు గంటల నుంచి 10 గంటల వరకు అర్చకులు ఆలయ శుద్ధి కార్యక్రమాన్ని ఆగమోక్తంగా నిర్వహిస్తారు. ఆనంద నిలయం నుంచి బంగారు వాకిలి వరకు, శ్రీవారి ఆలయం లోపల ఉన్న ఉప దేవాలయాలు, ఆలయ ప్రాంగణం, పోటు, గోడలు, పైకప్పు, పూజాసామాగ్రి వంటి వస్తువులను నీటితో శుభ్రపరుస్తారు. ఆలయ శుద్ధి సమయంలో శ్రీవారి మూల విరాట్టును వస్త్రంతో పూర్తిగా కప్పి ఉంచుతారు. ఆలయ శుద్ధి అనంతరం ఆలయంలో సంప్రోక్షణ చేపడతారు. నామకోపు, శ్రీచూర్ణం, కస్తూరి పసుపు, పచ్చాకు, గడ్డ కర్పూరం, గంధం పొడి, కుంకుమ, కిచిలిగడ్డ తదితర సుగంధ ద్రవ్యాలు కలగలిపిన జలాన్ని ఆలయమంతటా ప్రోక్షణం చేస్తారు.

ఆలయ శుద్ధి, సంప్రోక్షణ కార్యక్రమాలు పూర్తైన తర్వాత శ్రీవారి మూల విరాట్టుకు కప్పిన వస్త్రాన్ని తొలగించి ప్రత్యేక పూజలు చేస్తారు. నైవేద్యం సమర్పిస్తారు. ఈ కార్యక్రమం పూర్తైన తర్వాత.. భక్తులను సర్వదర్శనానికి అనుమతిస్తారు. మరోవైపు తిరుమలలో కోయిల్ ఆళ్వార్ తిరుమంజనం కారణంగా జనవరి 7వ తేదీన బ్రేక్ దర్శనాలు రద్దు చేసినట్లు టీటీడీ తెలిపింది. ఈ నేపథ్యంలో జనవరి ఆరో తేదీన సిఫార్సు లేఖలు స్వీకరించబోమని ఓ ప్రకటనలో తెలిపింది. ఈ విషయాన్ని దృష్టిలో ఉంచుకుని భక్తులు సహకరించాలని టీటీడీ కోరింది.