కొత్త వైరస్‌పై భయాందోళనలు.. ఏపీ ప్రజారోగ్యశాఖ కీలక సూచనలు

కొత్త వైరస్ వ్యాప్తిపై ప్రస్తుతం దేశవ్యాప్తంగా చర్చ జరుగుతోంది. చైనా, జపాన్ దేశాలలో హెచ్ఎంపీవీ వైరస్ కేసులు భారీగా నమోదవుతున్న తరుణంలో కేంద్ర, రాష్ట్ర ప్రభుత్వాలు కూడా అప్రమత్తమయ్యాయి. ప్రస్తుతానికి మన దేశంలో కొత్త వైరస్ కేసులు నమోదు కాలేదని.. ఆందోళన అవసరం లేదని అధికారులు చెప్తున్నారు. అయితే కొవిడ్ తరహాలోనే కొత్త వైరస్ లక్షణాలు ఉంటాయని ఏపీ ప్రజారోగ్యశాఖ డైరెక్టర్ పద్మావతి తెలిపారు. ప్రస్తుతానికి ఎలాంటి కేసులు నమోదు కాలేదని.. రోగ నిరోధక శక్తి తక్కువగా ఉన్నవాళ్లు జాగ్రత్తలు తీసుకోవాలని సూచించారు.

హెచ్ఎంపీవీ వైరస్.. పూర్తిగా చెప్పాలంటే హ్యూమన్ మెటా న్యూమో వైరస్.. గత కొన్ని రోజులుగా దేశ ప్రజలను ఆందోళన పరుస్తున్న అంశమిది. చైనాలో ఈ వైరస్ కేసులు భారీగా నమోదవుతున్న నేపథ్యంలో.. కరోనా తరహాలో మరో మహమ్మారి తప్పదా అనే ఆందోళన వ్యక్తమవుతోంది. చైనాతో పాటుగా జపాన్‌లోనూ భారీగా కేసులు నమోదవుతున్న వేళ.. ఈ భయం మరింత ఎక్కువైంది. ఇక ఇప్పటికే కొవిడ్ మహమ్మారి విలయ తాండవాన్ని చూసిన దేశం, కేంద్ర ప్రభుత్వం.. ముందస్తు జాగ్రత్తలు తీసుకుంటోంది. ఈ కొత్త వైరస్ గురించి ఎప్పటికప్పుడు సమీక్షలు జరుపుతోంది. ప్రస్తుతానికి మన దేశంలో ఈ కొత్త వైరస్ కేసులేవీ నమోదు కాలేదని.. ఆందోళన అక్కర్లేదని అధికారులు చెప్తున్నారు.

ఈ నేపథ్యంలోనే హెచ్ఎంపీవీ వైరస్ గురించి ఏపీ ప్రజారోగ్య, కుటుంబ సంక్షేమ శాఖ డైరెక్టర్ పద్మావతి కీలక వ్యాఖ్యలు చేశారు. హెచ్ఎంపీవీ వైరస్ సోకిన తర్వాత మూడు నుంచి 10 రోజుల్లోగా వ్యాధి లక్షణాలు బయటపడుతాయని చెప్పారు. సాధారణ జలుబు లక్షణాలే ఈ వైరస్ సోకిన వారికి కూడా ఉంటాయన్న ఏపీ ప్రజారోగ్యశాఖ డైరెక్టర్.. దగ్గు, గొంతు నొప్పి, ముక్కు కారడం, ముక్కు దిబ్బెడ వంటి సమస్యలు కన్పిస్తాయని తెలిపారు. అయితే ప్రస్తుతం ఆంధ్రప్రదేశ్‌లో హెచ్ఎంపీవీ కేసులు లేవని పద్మావతి తెలిపారు. దేశంలోనూ ఎలాంటి కేసులు నమోదు కాలేదని వివరించారు. కొత్త వైరస్ గురించి ప్రజలు ఎవరూ భయపడాల్సిన పనిలేదన్నారు.

  కొత్త వైరస్ న్యూమో విరిలే కుటుంబానికి చెందినదని.. కొవిడ్ తరహాలోనే ఒకరి నుంచి మరొకరికి వ్యాపిస్తుందన్నారు. వృద్ధులు, చిన్నపిల్లలు. రోగ నిరోధక శక్తి తక్కువగా ఉన్న వారిపై వైరస్ ప్రభావం ఎక్కువగా ఉంటుందని ఏపీ ప్రజారోగ్యశాఖ డైరెక్టర్ పద్మావతి వెల్లడించారు. వైరస్ సోకిన వ్యక్తులు దగ్గినప్పుడు, తుమ్మినప్పుడు వారి నోటి నుంచి వెలువడే తుంపర్లు ద్వారా ఈ వైరస్ వ్యాపిస్తుందన్నారు. వ్యాధి సోకిన వారితో షేక్ హ్యాండ్స్, సన్నిహితంగా మెలగడం ద్వారా వైరస్ విస్తరించే అవకాశం ఉందన్నారు. వైరస్ సోకిన వారిలో సాధారణ ఫ్లూ లక్షణాలే ఉంటాయని.. కొన్నిసార్లు న్యూమోనియా, బ్రాంకైటిస్ (ఆస్తమా) వంటి శ్వాసకోశ సమస్యలు కూడా వచ్చే అవకాశం ఉందన్నారు.

హెచ్ఎంపీవీ వైరస్ నియంత్రణ కొవిడ్ సమయంలో పాటించిన జాగ్రత్తలనే పాటించాలని డాక్టర్ పద్మావతి సూచించారు. సబ్బు నీటితో చేతులు శుభ్రపరుచుకోవడం, కర్చీఫ్ వాడటం, రద్దీగా ఉండే ప్రదేశాలకు దూరంగా ఉండటం, ఒకరి వస్తువులను మరొకరు వాడకుండా ఉండటం వంటి చర్యల ద్వారా వైరస్ వ్యాప్తిని నిరోధించవచ్చని సూచించారు. అలాగే వైరస్ లక్షణాలు కనిపిస్తే క్వారంటైన్‌లో ఉండడం మంచిదని సూచించారు. వైద్యుల సలహా మేరకు మందులు వాడాలని పద్మావతి సూచించారు. కేంద్ర, రాష్ట్ర ప్రభుత్వాలు అప్రమత్తంగా ఉంటూ పరిస్థితికి అనుగుణంగా చర్యలు తీసుకుంటామని వివరించారు.