అదే జరిగితే ఆసియాలోనే పొడవైన మెట్రో డెబుల్‌ డెక్కర్.. ఏపీలోనే

ఆంధ్రప్రదేశ్‌లో పలు మౌలిక వసతుల ప్రాజెక్టులు రూపుదిద్దుకుంటున్నాయి. ముఖ్యంగా ఏపీలో టీడీపీ కూటమి సర్కారు అధికారంలోకి వచ్చిన తర్వాత కేంద్ర ప్రభుత్వ సహకారంతో అనేక అభివృద్ధి పనులు జరుగుతున్నాయి. ఇదే క్రమంలో మరో ముఖ్యమైన ప్రాజెక్టుకు ఏపీ ప్రభుత్వం ప్రణాళికలు రచిస్తోంది. విశాఖపట్నం, విజయవాడలో మెట్రో రైల్ ప్రాజెక్టులు చేపట్టేందుకు ప్రణాళికలు రచిస్తున్నారు. ఈ క్రమంలోనే విశాఖపట్నం మెట్రోను డబుల్ డెక్కర్ తరహాలో నిర్మించాలని ఏపీ ప్రభుత్వం భావిస్తోంది. డబుల్ డెక్కర్ మెట్రో నిర్మాణం ద్వారా ట్రాఫిక్ రద్దీ సమస్య పరిష్కారమవుతుందని ప్రభుత్వం ఆలోచన. అందుకనే విశాఖ మెట్రోలో మధురవాడ నుంచి తాటిచెట్లపాలెం వరకు.. గాజువాక నుంచి స్టీల్‌ప్లాంట్ వరకూ డబుల్ డెక్కర్ తరహాలోనే మెట్రో నిర్మాణం చేపట్టాలని ప్రతిపాదించారు.

డబుల్ డెక్కర్ తరహా మెట్రో అంటే.. కింద వాహనదారుల కోసం రోడ్డు ఉంటుంది. అలాగే దానిపై ఫ్లైఓవర్ నిర్మిస్తారు. ఆపైన మెట్రో రైల్ కోసం మెట్రో ట్రాక్ ఏర్పాటు చేస్తారు. ప్రతిపాదనల ప్రకారం డబుల్ డెక్కర్ తరహాలో మెట్రో రైల్ నిర్మాణం పూర్తై అందుబాటులోకి వస్తే ఆసియాలోనే పొడవైన మెట్రో డబుల్‌ డెక్కరుగా విశాఖ మెట్రో గుర్తింపు పొందనుంది. మనదేశంలో ఇప్పటి వరకూ నాగపూర్, బెంగళూరు, చెన్నై మెట్రోలలో కొంత మేర ఇలా నిర్మించారు. నగరీకరణ కారణంగా నగరాల్లో జనాభా పెరుగుదల, అందుకు అనుగుణంగా వాహనాల రద్దీ పెరుగుతున్న నేపథ్యంలో ట్రాఫిక్ రద్దీ నియంత్రణకు ఇలాంటి డబుల్ డెక్కర్ మెట్రో నిర్మాణాలను ప్రతిపాదిస్తున్నారు.

నాగ్‌పూర్‌ మెట్రో ప్రస్తుతం ఆసియా ఖండంలోనే పొడవైన మెట్రో డబుల్ డెక్కర్‌గా ఉంది. విశాఖ మెట్రో అందుబాటులోకి వస్తే ఈ ఘనతను విశాఖపట్నం మెట్రో సొంతం చేసుకుంటుంది. మరోవైపు రాష్ట్ర ప్రభుత్వం ప్రతిపాదనలకు కేంద్ర ప్రభుత్వం ఆమోదం తెలిపి.. విశాఖ మెట్రో డబుల్ డెక్కర్ పూర్తయితే.. అద్భుత ప్రాజెక్టు అవుతుందని నిపుణులు చెప్తున్నారు. మరోవైపు విశాఖ మెట్రో ప్రాజెక్టును మొత్తం 140.13 కి.మీ. పొడవుతో నిర్మించాలని ప్రతిపాదించారు. మొదటి దశలో 46.23 కి.మీ. మేర మెట్రో ప్రాజెక్టు నిర్మాణం చేపట్టనున్నారు. ఇందులో 20.07 కి.మీ మేరకు డబుల్ డెక్కర్ మెట్రో నిర్మించనున్నారు. ఇక ప్రాజెక్టు అంచనా వ్యయం రూ. 11,498 కోట్లుగా ఉంది.