మామ సినిమాపై అల్లుడి రియాక్షన్.. నారా లోకేష్ ఇంట్రెస్టింగ్ ట్వీట్

నందమూరి బాలకృష్ణ హీరోగా బాబీ దర్శకత్వంలో తెరకెక్కిన చిత్రం డాకు మహారాజ్. ఈ సినిమా జనవరి 12వ తేదీ విడుదలై హిట్ టాక్ తెచ్చుకుంది. దీంతో బాలయ్య అభిమానులు సంక్రాంతికి బాలకృష్ణ సూపర్ హిట్ కొట్టారంటూ సంబరాలు చేసుకుంటున్నారు. సోషల్ మీడియాలోనూ బాలకృష్ణ అభిమానుల హడావిడి కనిపిస్తోంది. ఈ క్రమంలోనే హీరో నందమూరి బాలకృష్ణ అల్లుడు, మంత్రి నారా లోకేష్ డాకు మహారాజ్ మూవీపై స్పందించారు. డాకు మహారాజ్ సినిమా హిట్ టాక్ తెచ్చుకున్న నేపథ్యంలో బాలకృష్ణకు అభినందనలు తెలియజేస్తూ నారా లోకేష్ ట్వీట్ చేశారు.

" డాకు మహారాజ్ రోరింగ్ సక్సెస్‌కు గానూ మైడియర్ బాలా మావయ్యకు హృదయపూర్వక అభినందనలు. మీ ఛరిష్మా, ఎనర్జీతో దేశ, విదేశాల్లో ఉన్న అభిమానులను మీరు మంత్రముగ్ధులను చేస్తూనే ఉన్నారు. ఈ సినిమాకు కూడా ప్రేక్షకులు బ్రహ్మరథం పడుతున్నారు. అన్నిచోట్లా రికార్డులను బద్ధలు కొడుతూ డాకు మహారాజ్ అద్భుతమైన విజయం సాధించింది. తెలుగు సినిమాకు మీరు సరికొత్త బెంచ్ మార్క్‌లు నెలకొల్పుతున్నందుకు నేను మిమ్మల్ని చూసి ఎంతో గర్వపడుతున్నా. జై బాలయ్య. #BlockbusterDakuMaharaj" అంటూ నారా లోకేష్ ట్వీట్ చేశారు,

మరోవైపు డాకు మహారాజ్ సినిమా హిట్ టాక్ తెచ్చుకున్న నేపథ్యంలో మేకర్స్ సక్సెస్ ఈవెంట్ ప్లాన్ చేస్తున్నారు. డాకు మహారాజ్ సక్సెస్ ఈవెంట్ అనంతపురంలో నిర్వహించనున్నట్లు సినిమా నిర్మాత నాగవంశీ తెలిపారు. వాస్తవానికి డాకు మహారాజ్ ప్రీ రిలీజ్ ఈవెంట్ అనంతపురంలో నిర్వహించాల్సి ఉండేది. కానీ తిరుపతి తొక్కిసలాట ఘటన నేపథ్యంలో ఆ కార్యక్రమం రద్దైంది. అనంతరం హైదరాబాద్‌లో డాకు మహారాజ్ ప్రీ రిలీజ్ ఈవెంట్ నిర్వహించారు. ఇప్పుడు సినిమా సక్సెస్ అయిన నేపథ్యంలో అనంతపురంలో డాకు మహారాజ్ సక్సెస్ ఈవెంట్ నిర్వహించనున్నట్లు నాగవంశీ తెలిపారు.

  డాకు మహారాజ్ సినిమాలో బాలకృష్ణతో పాటుగా ఊర్వశీ రౌతేలా, ప్రజ్ఞా జైశ్వాల్, శ్రద్ధా శ్రీనాథ్, రవికిషన్, బాబీడియోల్ వంటి స్టార్లు నటించారు. ఈ సినిమా జనవరి 12న ప్రపంచవ్యాప్తంగా విడుదలై హిట్ టాక్ తెచ్చుకుంది. దీంతో చిత్ర బృందం సక్సెస్ ఈవెంట్ నిర్వహించనుంది. అలాగే డాకు మహారాజ్ సినిమా నెట్ ఫ్లిక్స్ ఓటీటీలో ప్రసారం కానుంది.