షర్టులు విప్పేసి వెళ్లండి.. 80 మంది విద్యార్థినులను అలాగే ఇంటికి పంపిన ప్రిన్సిపాల్!

బడిలో చదివే విద్యార్థులను శుభ్రంగా ఉండమని చెప్పడంతో పాటు బాగా చదవమని ప్రోత్సహిస్తారు ఉపాధ్యాయులు. వారు చినిగిన బట్టలు వేసుకొచ్చినా వాటిని కుట్టుకుని శుభ్రంగా ఉతుక్కొమని వివరిస్తుంటారు. ముఖ్యంగా ఆడ పిల్లలకు అయితే మరీ మరీ జాగ్రత్తలు చెబుతుంటారు. అలాగే విద్యాబుద్ధులు నేర్పిస్తూ వారిని ఉన్నత స్థాయికి తీసుకు వెళ్లేందుకు నిరంతరం కృషి చేస్తారు. కానీ మనం ఇప్పుడు చూడబోయే ప్రధానోపాధ్యాయుడు మాత్రం అమ్మాయిలకు మంచి బుద్ధులు నేర్పి.. పద్ధతిగా ఉండమని చెప్పాల్సింది పోయి వారిచేతనే షర్టులు విప్పించాడు. ఇదెక్కడ జరిగిందో మనం ఇప్పుడు తెలుసుకుందాం.

ఝార్ఖండ్ ధన్‌బాద్‌లో జోరాపోకర్ పోలీస్ స్టేషన్ పరిధిలో ఓ పేరున్న పాఠశాల ఉంది. అక్కడ తమ పిల్లలను చదివించేందుకు అనేక మంది తల్లిదండ్రులు పోటీ పడుతుంటారు. అయితే తాజాగా బడిలో సంక్రాంతికి ముందు నిర్వహించే అర్థ సంవత్సర పరీక్షలు నిర్వహించారు. అవి ముగిసిన తర్వాత అంటే డిసెంబర్ 11వ తేదీ శుక్రవారం రోజున పదో తరగతికి చెందిన విద్యార్థినీ విద్యార్థులు అంతా "పెన్ డే" చేసుకున్నారు. "పెన్ డే" అంటే ఒకరి షర్టులపై మరొకరు మెసేజ్‌లు రాయడం. ఇందులో పదో తరగతికి చెందిన మొత్తం 80 మంది విద్యార్థినులు పాల్గొన్నారు.

అయితే ఇది ఆ పాఠశాల ప్రిన్సిపాల్‌కు నచ్చలేదు. దాంతో వారందరినీ పిలిచి ఆ షర్టులు విప్పేయాలని చెప్పాడు. విద్యార్థినులు ఎంత బతిమాలినా అతడు మాత్రం వినలేదు. ఆ షర్టులు విప్పేసి కేవలం బ్లేజర్ల మీద మాత్రమే పిల్లలంతా ఇంటికి వెళ్లాలని ఆదేశాలు జారీ చేశాడు. పిల్లలు కూడా చేసేదేం లేక అలాగే ఇంటికి వెళ్లారు. అయితే విషయం గుర్తించిన పలువురు విద్యార్థినుల తల్లిదండ్రులు.. దీనిపై ఆగ్రహం వ్యక్తం చేశారు. ప్రధానోపాధ్యాయుడు ఇలా ఎలా చేస్తారంటూ మరుసటి రోజు బడికి వచ్చి గొడవ చేశారు.

ఆపై నేరుగా పోలీస్ స్టేషన్‌కు వెళ్లి ఫిర్యాదు చేశారు. కేసు నమోదు చేసుకున్న పోలీసులు దర్యాప్తు ప్రారంభించారు. ఈ విషయం తెలుసుకున్న ధన్‌బాద్ డిప్యూటీ కమిషనర్ మాధ్వీ మిశ్రా.. వెంటనే రంగంలోకి దిగారు. దీనిపై విచారణ జరిపేందుకు ఓ విచారణ కమిటీని ఏర్పాటు చేసినట్లు వివరించారు. అయితే అందులో మొత్తం నలుగురు సభ్యులు ఉంటారని తెలిపారు. డివిజనల్ మేజిస్ట్రేట్, జిల్లా విద్యాశాఖాధికారి, జిల్లా సాంఘిక సంక్షేమ అధికారి, సబ్ డివిజనల్ పోలీస్ అధికారి విచారణ చేయనున్నారు.

అయితే తల్లిదండ్రులు పోలీసులకు ఫిర్యాదు చేయబోతుండగా.. విషయం తెలుసుకున్న ఝరియా ఎమ్మెల్యే రాగిణి సింగ్ కూడా వారి వెంట వెళ్లారు. ఉన్నత స్థాయిలో ఉన్న ఓ ప్రధానోపాధ్యాయుడు ఇలా ప్రవర్తించడం దురదృష్టకరం అని, సిగ్గు చేటని అభివర్ణించారు. ప్రస్తుతం రాష్ట్ర వ్యాప్తంగా సంచలనం రేపుతున్న ఈ ఘటన సోషల్ మీడియాలో తెగ వైరల్ అవుతోంది. దీనిపై తాజాగా ఆ పాఠశాల ప్రిన్సిపాల్ కూడా స్పందించారు. తాను విద్యార్థినుల చొక్కాలు విప్పి వెళ్లమనలేదని.. సరైన యూనిఫారమ్ మాత్రమే వేసుకోవాలని వివరించినట్లు వెల్లడించారు. చూడాలి మరి ఏం జరగనుంది అనేది.