ఈసారి గణతంత్ర దినోత్సవ వేడుకలకు ముఖ్య అతిథిగా ఎవరు రాబోతున్నారో తెలుసా?

మరికొన్ని రోజుల్లోనే భారత దేశం తన 76వ గణతంత్ర దినోత్సవ వేడుకలను ఘనంగా నిర్వహించుకునేందుకు సిద్ధం అవుతోంది. ముఖ్యంగా జనవరి 26వ తేదీన న్యూ ఢిల్లీలో నిర్వహించబోతున్న ఈ వేడుకలకు ముఖ్య అతిథిగా ఇండోనేసియా అధ్యక్షుడు ప్రబోవో సుబియాంటో హాజరు కాబోతున్నట్లు తెలుస్తోంది. కానీ ఇప్పటి వరకు భారత్ ఈ విషయాన్ని అధికారికంగా ప్రకటించలేదు. సాధారణంగా గణతంత్ర దినోత్సవ ముఖ్య అతిథి గురించి కొన్ని నెలల ముందే ప్రకటన వెలువడేది. కానీ ఈ ఏడాది మాత్రం ఈ విషయంలో జాప్యం జరుగుతోంది.

సుబియాంటో పాకిస్థాన్ పర్యటన వాయిదా పడినట్లేనా..?

ఇండోనేసియా అధ్యక్షుడు ప్రబోవో సుబియాంటో న్యూఢిల్లీ పర్యటన తర్వాత.. ఇండియా శత్రుదేశమైన పాకిస్థాన్‌కు వెళ్లాలని నిర్ణయించుకున్నట్లు గతంలో పాక్ మీడియా వెల్లడించింది. కానీ ప్రస్తుతం గణతంత్ర దినోత్సవ వేడుకలకు హాజరుకాబోతున్న సుబియాంటో.. పాకిస్థాన్ పర్యటనను వాయిదా వేసుకున్నారని ఇండోనేషియా మీడియా చెబుతోంది. ముఖ్యంగా భారత్ సలహా మేరకే ఆయన ఇస్లామాబాద్ పర్యటనను వాయిదా వేసుకున్నారని సమాచారం. మరి జనవరి 26వ జరగబోతున్న ఈ గణతంత్ర దినోత్సవ వేడుకలకు ఇండోనేషియా అధ్యక్షుడు ఏరోజు రాబోతున్నారు వంటి విషయాలు మాత్రం ఇంకా తెలియరాలేదు.

2024లో ముఖ్య అతిథిగా ఫ్రెంచ్ అధ్యక్షుడు ఇమ్మాన్యుయేల్ మక్రాన్

కానీ సుబియాంటో భారత్ పర్యటనలో భాగంగా ప్రధాని నరేంద్ర మోదీతో విస్తృత చర్యలు జరపనున్నారు. ఇరుదేశాల మధ్య సత్సంబంధాలకు సంబంధించి కీలక నిర్ణయాలు కూడా తీసుకునే అవకాశం ఉన్నట్లు తెలుస్తోంది. ఇదంతా ఇలా ఉండగా.. 1950 నుంచి భారత్ తన మిత్ర దేశాల నేతలను గణతంత్ర దినోత్సవ వేడుకలకు ఆహ్వానించడం ఆనవాయితీగా వస్తోంది. గతేడాది ఫ్రెంచ్ అధ్యక్షుడు ఇమ్మాన్యుయేల్ మక్రాన్ ముథ్య అతిథిగా రాగా.. 2023లో ఈజిప్టు అధ్యక్షుడు అబ్దెల్ ఫట్టా ఎస్-సిసిని అతిథిగా హాజరయ్యారు.

2021, 2022 సంవత్సరాల్లో తప్ప..

2021, 2022 సంవత్సరాల్లో కరోనా కారణంగా గణతంత్ర దినోత్సవ వేడుకలకు అతిథులను ఆహ్వానించలేదు. కానీ అంతకుముందు ఏడాది అంటే 2020లో బ్రెజిల్ మాజీ అధ్యక్షుడు జైర్ బోల్సోనారో వచ్చారు. 2019లో దక్షిణాఫ్రియా అధ్యక్షుడు సిరిల్ రామఫోసా ముఖ్య అతిథిగా హాజరయ్యారు. 2018లో అయితే ఆసియా దేశాలకు చెందిన 10 మంది నాయకులు వచ్చారు. 2017లో అబుదాలి క్రౌన్ ప్రిన్స్ షేక్ మహమ్మద్ బిన్ జాయెద్ అల్ నహ్యాన్ రాగా, 2016లో ఫ్రెంచ్ మాజీ అధ్యక్షుడు ఫ్రాంకోయిస్ హోలాండే, 2015లో అప్పటి అమెరికా అధ్యక్షుడు బరాక్ ఒబామాలు గణతంత్ర దినోత్సవ వేడుకల్లో ముఖ్య అతిథులుగా హాజరయ్యారు.