ఒకే రోజు రెండు ప్రమాదాలు.. వెంకన్న సామీ మహిమతో.. అంతా క్షేమం

కలియుగ ప్రత్యక్ష దైవం శ్రీనివాసుడు కొలువైన తిరుమలలో సోమవారం రెండు ప్రమాదాలు జరిగాయి. ఉదయం తిరుమల కొండపైనా ప్రమాదం జరగ్గా.. మధ్యాహ్న సమయంలో ఘాట్ రోడ్డులో ప్రమాదం జరిగింది. తిరుమల లడ్డూ కౌంటర్‌లో సోమవారం ఉదయం ప్రమాదం జరిగింది. 47వ లడ్డూ కౌంటర్‌లో అకస్మాత్తుగా మంటలు ఎగసిపడ్డాయి. లడ్డూ కౌంటర్‌లోని కంప్యూటర్ సిస్టమ్ యూపీఎస్‌లో షార్ట్ సర్క్యూట్ జరిగింది. దీంతో అకస్మాత్తుగా మంటలు చెలరేగాయి. దట్టమైన పొగతో లడ్డూ కౌంటర్ నిండిపోయింది. దీంతో భక్తులు భయాందోళనకు గురయ్యారు. అయితే టీటీడీ సిబ్బంది అప్రమత్తమై మంటలను ఆర్పివేశారు. కంప్యూటర్ సిస్టమ్‌ పునరుద్ధరించారు.

అయితే మధ్యాహ్న సమయంలో మరో ప్రమాదం జరిగింది. తిరుమల ఘాట్ రోడ్డులో ఆర్టీసీ బస్సు ప్రమాదానికి గురైంది. తిరుమల రెండో ఘాట్ రోడ్డులో ఆర్టీసీ బస్సు అదుపు తప్పి పిట్టగోడను ఢీకొట్టింది. దీంతో ఆర్టీసీ బస్సులో ప్రయాణిస్తున్న వారికి గాయాలయ్యాయి. పదిమంది వరకూ గాయపడినట్లు సమాచారం. ఘాట్ రోడ్డులో ఆర్టీసీ బస్సు ప్రమాదానికి గురికావటంతో ఇతరత్రా వాహనాల రాకపోకలకు ఆటంకం కలిగింది. ఆర్టీసీ బస్సు రోడ్డుకు అడ్డంగా నిలిచిపోవటంతో కిలోమీటర్ మేర వాహనాలు నిలిచిపోయాయి. అలిపిరి వరకూ వాహనాలు ఆగిపోయాయి. గాయపడిన వారిని ఆస్పత్రికి తరలించారు.

మరోవైపు ఘటన గురించి సమాచారం అందుకున్న టీటీడీ సిబ్బంది ఘటనాస్థలికి చేరుకున్నారు. ఆర్టీసీ బస్సును అడ్డు తొలగించి వాహనాల రాకపోకలను పునరుద్ధరించారు. అయితే ఒకేరోజు తిరుమలలో రెండు ప్రమాదాలు జరగడం చర్చనీయాంశమైంది. మరోవైపు ఆదివారం తిరుమల శ్రీవారిని 70 వేల 966 మంది భక్తులు దర్శించుకున్నారు. 15 వేల 681 మంది భక్తులు తలనీలాలు సమర్పించుకున్నారు. హుండీ కానుకల ద్వారా 2 కోట్ల 95 లక్షల ఆదాయం వచ్చింది. ప్రస్తుతం తిరుమల వైకుంఠ ద్వార దర్శన ఎస్ఎస్‌డీ టోకెన్లు కలిగిన వారికి మాత్రమే శ్రీవారి దర్శనానికి అనుమతిస్తున్నారు. టోకెన్లు లేని భక్తులకు దర్శనం అవకాశం లేదు. జనవరి 19 వరకూ వైకుంఠ ద్వార దర్శనాలు కొనసాగనున్నాయి. అప్పటి వరకూ టోకెన్లు లేని వారికి శ్రీవారి దర్శనం ఉండదని టీటీడీ స్పష్టం చేసింది.