మ్యాచ్‌లు లేకున్నా.. పాకిస్థాన్‌ వెళ్లనున్న రోహిత్ శర్మ.. కారణం ఏంటంటే..?

ఐసీసీ ఛాంపియన్స్ ట్రోఫీ 2025 కోసం గడువు సమీపిస్తోంది. మార్చి 19న ఈ ఈవెంట్‌కు తెరలేవనుంది. చివరిసారి 2017 ఛాంపియన్స్ ట్రోఫీ జరిగింది. 8 ఏళ్ల తర్వాత మళ్లీ జరగబోతోంది. ఈ టోర్నీ పాకిస్థాన్, దుబాయ్ వేదికల్లో హైబ్రిడ్ మోడల్‌లో జరగనుంది. మెజార్టీ మ్యాచ్‌లు పాకిస్థాన్‌లోనే జరుగుతాయి. కేవలం భారత్ ఆడే మ్యాచులు మాత్రమే దుబాయ్ వేదికగా జరుగుతాయి. అయితే ఈ టోర్నీకి ఆతిథ్య దేశంగా పాకిస్థాన్ ఉంది.

సుమారు 29 ఏళ్ల తర్వాత పాకిస్థాన్‌లో ఐసీసీ ఈవెంట్ జరుగుతోంది. 1996లో పాకిస్థాన్, శ్రీలంక సంయుక్త ఆధ్వర్యంలో వన్డే ప్రపంచకప్ జరిగింది. దీంతో ఈసారి ఈవెంట్‌ను గ్రాండ్‌గా నిర్వహించాలని పాకిస్థాన్ ప్లాన్ చేస్తోంది. ఇందులో భాగంగా ఇప్పటికే ఏర్పాట్లు తుది దశకు చేరుకున్నాయి. ఇక టోర్నీ ఓపెనింగ్ సెర్మనీని పాకిస్థాన్ క్రికెట్ బోర్డు గ్రాండ్‌గా నిర్వహించాలని భావిస్తోంది. ఇందులో భాగంగా టోర్నీలో పాల్గొనే జట్ల కెప్టెన్‌లు వేడుకల్లో పాల్గొనాల్సి ఉంటుంది.

ఈ టోర్నీలో మ్యాచ్ ఆడేందుకు భారత్.. పాక్‌కు వెళ్లనప్పటికీ.. కెప్టెన్ రోహిత్ శర్మ మాత్రం ప్రారంభ వేడుకల్లో పాల్గొనే అవకాశం ఉంది. ఇందుకోసం అతడు పాకిస్థాన్ వెళ్లనున్నట్లు తెలుస్తోంది. వచ్చే నెల 16 లేదా 17 తేదీల్లో ప్రారంభ వేడుకలు నిర్వహించనున్నట్లు సమాచారం. దీంతో టీమిండియా కెప్టెన్ రోహిత్ శర్మ.. వచ్చే నెలలో పాకిస్థాన్‌కు వెళ్లనున్నాడు.

కాగా వన్డే ఫార్మాట్‌లో ఛాంపియన్స్ ట్రోఫీ జరగనుంది. ఇప్పటికే షెడ్యూల్ కూడా విడుదలైంది. ఫిబ్రవరి 19 నుంచి మార్చి 9 వరకు టోర్నీ జరగనుంది. ఫైనల్‌తో కలిపి 15 మ్యాచ్‌లు జరుగుతాయి. ఫిబ్రవరి 19న కరాచీ వేదికగా జరిగే తొలి మ్యాచ్‌లో ఆతిథ్య పాకిస్థాన్, న్యూజిలాండ్ జట్లు తలపడనున్నాయి. ఐసీసీ పురుషుల క్రికెట్‌ ప్రపంచకప్‌ 2023 పాయింట్ల పట్టికలో టాప్‌-8 స్థానాల్లో ఉన్న జట్లు ఛాంపియన్స్ ట్రోఫీ 2025లో పాల్గొంటున్నాయి. వీటిని 2 గ్రూప్‌లుగా విభజించారు. అందులో గ్రూప్‌-ఏలో పాకిస్థాన్, భారత్‌, న్యూజిలాండ్‌, బంగ్లాదేశ్‌ జట్లు ఉన్నాయి. గ్రూప్‌-బిలో దక్షిణాఫ్రికా, ఆస్ట్రేలియా, ఇంగ్లాండ్‌, అప్ఘానిస్థాన్‌లు ఉన్నాయి.

ఛాంపియన్స్ ట్రోఫీలో భారత్ ఆడే మ్యాచ్‌ల షెడ్యూల్..

ఫిబ్రవరి 20న బంగ్లాదేశ్‌తో మ్యాచ్‌

ఫిబ్రవరి 23న పాకిస్థాన్‌తో మ్యాచ్‌

మార్చి 2న న్యూజిలాండ్‌తో మ్యాచ్‌