ఆటగాళ్ల కోసం బీసీసీఐ 10 రూల్స్.. హద్దు దాటితే

ఇటీవల కాలంలో భారత జట్టు టెస్టుల్లో పేలవ ప్రదర్శన చేస్తున్న నేపథ్యంలో బీసీసీఐ కీలక నిర్ణయం తీసుకుంది. జట్టులో క్రమశిక్షణ, ఐక్యత, సానుకూల వాతావరణాన్ని పెంపొందించడమే లక్ష్యంగా కొత్త నిబంధనలను ప్రవేశపెట్టింది. ఇందు కోసం మొత్తంగా పది రూల్స్‌ను తీసుకొచ్చింది. వీటిని కచ్చితంగా పాటించాల్సిందే అని ఆటగాళ్లకు స్పష్టం చేసింది. ఆస్ట్రేలియాతో టెస్టు సిరీస్ ముగిసిన తర్వాత.. హెడ్ కోచ్, కెప్టెన్, చీఫ్ సెలక్టర్‌లతో సమీక్ష సమావేశం నిర్వహించి.. వీటిని ఖరారు చేసింది.

పది మార్గదర్శకాలు ఇవే..

1. భారత జాతీయ జట్టుకు ఎంపిక కావాలన్నా.. సెంట్రల్ కాంట్రాక్ట్ దక్కాలన్నా.. ఆటగాళ్లు దేశవాళీ మ్యాచ్‌లలో ఆడటం తప్పనిసరి. దీని ద్వారా స్థానిక యువతకు స్టార్‌ క్రికెటర్లతో ఆడే అవకాశం లభిస్తుందని, తద్వారా వారి అనుభవం పనికొస్తుందని బీసీసీఐ స్పష్టం చేసింది.

2. మ్యాచ్‌లు, పర్యటనల సందర్భంగా ఆటగాళ్లు విడివిడిగా గాకుండా.. జట్టుతో కలిసి ప్రయాణించాలి. దీంతో ప్లేయర్ల మధ్య సంబంధాలు మరింత మెరుగుపడుతాయి. ఒకవేళ ఎవరైనా ఆటగాడు ఫ్యామిలీతో కలిసి ప్రయాణించాలంటే అందుకు ముందస్తుగా చీఫ్‌ కోచ్‌ లేదా సెలెక్షన్‌ కమిటీ అనుమతి తీసుకోవాలి.

3.బ్యాగేజీ విషయంలోనూ ప్లేయర్లంతా నిబంధనలకు కట్టుబడి ఉండాలి. ఒకవేళ ఎవరైనా ఆటగాడు పరిమితికి మించి బ్యాగేజీ తీసుకొస్తే.. అందుకు అయ్యే ఖర్చులను వారే భరించాల్సి ఉంటుంది. ఈ రూల్ ద్వారా లగేజీని ఒక క్రమపద్ధతిలో నిర్వహించడంతో పాటు అనవసరపు ఖర్చులు తగ్గించేందుకు వీలు అవుతుందని బీసీసీఐ పేర్కొంది.

లగేజీ విషయంలో పర్యటనకు పట్టే సమయాన్ని బట్టి రూల్స్ విధించింది. 30 రోజులకు మించి పర్యటనలకు ఒకలా.. అంతకంటే తక్కువ పర్యటనలకు ఒకలా రూల్ విధించింది. స్వదేశంలో జరిగే మ్యాచ్‌లకు రూల్స్ మరోలా ఉంటాయి. 30 రోజులు మించి విదేశాల్లో ఉండాల్సి వస్తే.. 150 కేజీల వరకు లగేజీని ఆటగాళ్లు తీసుకెళ్లొచ్చు. అంతకంటే తక్కువున్నా.. స్వదేశంలో సిరీస్‌లకైనా 120 కేజీల లోపే లగేజీని సర్దుకోవాల్సి ఉంటుంది.

4.టూర్‌/ సిరీస్‌లకు ఆటగాళ్లు తమ వ్యక్తిగత సిబ్బంది అంటే వ్యక్తిగత మేనేజర్లు, చెఫ్స్‌, అసిస్టెంట్స్‌, సెక్యూరిటీని తీసుకురావడంపై నిషేధం విధించింది. దీనికి బీసీసీఐ అనుమతి తప్పనిసరి.

5.బెంగళూరులోని జాతీయ క్రికెట్ అకాడమీలో ఎవైనా ప్రత్యేక ఏర్పాట్లు చేసుకోవాల్సి వస్తే.. వాటిని ఆటగాళ్లే భరించాల్సి ఉంటుంది.

6.జట్టు ప్రాక్టీస్ సెషన్స్‌లో విధిగా పాల్గొనాలి. షెడ్యూల్‌ ప్రాక్టీస్‌ ముగిసే వరకు ప్లేయర్లందరూ అక్కడే ఉండాలి. ప్రాక్టీస్‌ అయిపోయిన వెంటనే హోటల్‌కు వెళ్లడానికి వీలులేదు. అందరూ ఒకేసారి కలిసి ప్రయాణించాలి.

7.పర్యటనల సందర్భంగా ఆటగాళ్లు ఎలాంటి వ్యక్తిగత షూట్‌లు, ఎండార్స్‌మెంట్‌లలో పాల్గొనకూడదు. ఇలా పాల్గొంటే.. ఆటపై ఏకాగ్రత దెబ్బతినే అవకాశాలు ఉన్నాయి.

8.విదేశాల్లో 45 రోజుల కంటే ఎక్కువగా పర్యటించాల్సి వస్తే.. ఆటగాళ్లు కుటుంబ సభ్యులు రెండు వారాల పాటు వారితో కలిసి ఉండేందుకు అనుమతిస్తారు. భార్య, పిల్లలు (18 ఏళ్లకంటే తక్కువ వయసు ఉన్నవారు) ఇందుకు అర్హులు.

భార్య, పిల్లలు కాకుండా ఇతరుల వస్తే వారి ఖర్చును ఆటగాళ్లే భరించాలి. దాని కూడా కోచ్‌, కెప్టెన్‌, ఆపరేషన్స్‌ జీఎం అనుమతి కావాలి. అది కూడా పర్యటనలో కేవలం ఒక్కసారి మాత్రమే అనుమతిస్తారు.

9.బీసీసీఐ నిర్వహించే అధికారిక షూటింగ్‌లకు ప్లేయర్లందరూ కచ్చితంగా అందుబాటులో ఉండాలి.

10.షెడ్యూల్‌ కంటే ముందే మ్యాచ్‌లు ముగిసినా.. సిరీస్ లేదా పర్యటన ముగిసే వరకు ఆటగాళ్లు జట్టుతోనే ఉండాలి. ఇది జట్టు ఐక్యతను పెంపొందిస్తుంది