అలా మొదలై.. ఇలా ముగిసె.. అందుకేనా?

ఆంధ్రప్రదేశ్ ఐటీ శాఖ మంత్రి నారా లోకేష్‌ను డిప్యూటీ సీఎం చేయాలనే డిమాండ్లు టీడీపీలో వ్యక్తమవుతున్న సంగతి తెలిసిందే. ముఖ్యమంత్రి నారా చంద్రబాబు నాయుడు మైదుకూరు పర్యటనలో ఈ చర్చ మొదలైంది. ఎన్టీఆర్ వర్ధంతి సందర్భంగా వైఎస్ఆర్ జిల్లా మైదుకూరులో సభ ఏర్పాటు చేశారు. ఈ సభకు నారా చంద్రబాబునాయుడు హాజరయ్యారు, ఈ సందర్భంగా మాట్లాడిన కడప జిల్లా టీడీపీ అధ్యక్షుడు శ్రీనివాస్ రెడ్డి.. నారా లోకేష్‌ను డిప్యూటీ సీఎం చేయాలని కోరారు. పార్టీలో మూడో తరాన్ని ప్రోత్సహించాల్సిన అవసరం ఉందన్న శ్రీనివాసరెడ్డి.. తన ప్రతిపాదనను పరిశీలించాలని చంద్రబాబును వేదికపై నుంచే కోరారు. దీంతో టీడీపీలో నారా లోకేష్‌ను డిప్యూటీ సీఎం చేయాలనే డిమాండ్ మొదలైంది.

శ్రీనివాసరెడ్డి తర్వాత టీడీపీ సీనియర్ నేత అయిన మాజీ మంత్రి సోమిరెడ్డి చంద్రమోహన్‌రెడ్డి, పిఠాపురం మాజీ ఎమ్మెల్యే SVSN వర్మ, రఘురామకృష్ణరాజు, రాజమండ్రి అర్బన్‌ ఎమ్మెల్యే ఆదిరెడ్డి వాసు కూడా ఇదే విషయాన్ని ప్రస్తావించారు. పార్టీ కోసం కష్టపడుతున్న నారా లోకేష్‌ను డిప్యూటీ సీఎంను చేయాలని బహిరంగంగానే కోరారు. దీంతో ఈ విషయం సోషల్ మీడియాలో చర్చకు దారితీసింది. అటు జనసేన శ్రేణుల నుంచి కూడా పవన్ కళ్యాణ్‌ను ముఖ్యమంత్రిని చేయాలనే రిక్వెస్టులు, డిమాండ్లు మొదలయ్యాయి. నారా లోకేష్‌ను డిప్యూటీ సీఎం చేస్తే.. పవన్ కళ్యాణ్‌ను సీఎం చేయాలనే డిమాండ్లు మొదలయ్యాయి. క్రమంగా ఈ వ్యవహారం సోషల్ మీడియాలో టీడీపీ, జనసేన వర్గాల మధ్య చర్చకు దారి తీసింది.

ఈ నేపథ్యంలోనే టీడీపీ అధిష్టానం ఈ వ్యవహారంపై దృష్టి సారించింది. నారా లోకేష్‌ను డిప్యూటీ సీఎం చేయాలంటూ నేతలు చేస్తున్న డిమాండ్లపై రియాక్టైంది. ఈ విషయంలో పార్టీ శ్రేణులకు టీడీపీ అధిష్ఠానం కీలక ఆదేశాలు జారీ చేసింది. ఈ అంశం గురించి ఎవరూ కూడా బహిరంగంగా మాట్లాడవద్దని పార్టీ నేతలను తెలుగుదేశం పార్టీ అధిష్టానం ఆదేశించింది. మీడియా వేదికగా ఎవరూ బహిరంగ ప్రకటనలు చేయవద్దని టీడీపీ అధిష్టానం సూచించింది.

  కూటమి ప్రభుత్వంలో జరిగే ఏ నిర్ణయమైనా కూటమి పార్టీల అధినేతలు అందరూ కూర్చొని మాట్లాడుకుంటారని, ఇలాంటి సున్నితమైన అంశాలపై చర్చించి నిర్ణయం తీసుకుంటారని స్పష్టం చేసింది. టీడీపీ నేతలు ఎవరూ కూడా తమ వ్యక్తిగత అభిప్రాయాలను పార్టీపై రుద్దే ప్రయత్నం చేయవద్దంటూ అధిష్టానం క్లాస్ తీసుకున్నట్లు సమాచారం. ఈ విషయంలో టీడీపీ కేంద్ర కార్యాలయం నుంచి అధికార ప్రతినిధులకు ఫోన్లు వెళ్లినట్లు తెలిసింది. అయితే ఈ రకమైన ప్రచారంతో కూటమి పార్టీల మధ్య విభేదాలు వస్తాయనే కారణంతోనే టీడీపీ అధిష్టానం ఈ వ్యవహారానికి ఫుల్ స్టాప్ పెట్టినట్లు తెలిసింది.