సంజయ్‌ రాయ్ శిక్షపై అసంతృప్తి వ్యక్తం చేసిన సీఎం మమతా బెనర్జీ

దేశవ్యాప్తంగా సంచలనం రేపిన ఆర్జీ కార్ హత్యాచార కేసులో దోషిగా తేలిన సంజయ్ రాయ్‌కు తాజాగా న్యాయస్థానం జీవిత ఖైదు విధించిన విషయం అందరికీ తెలిసిందే. అయితే దీనిపై పశ్చిమ బెంగాల్ ముఖ్యమంత్రి మమతా బెనర్జీ స్పందించారు. ఈ తీర్పు పట్ల తాను అసంతృప్తి చెందానని చెప్పుకొచ్చారు. ముఖ్యంగా దోషికి ఈ కేసులో మరణ శిక్ష పడాలని తాను కోరుకున్నానని.. కానీ అలా జరగలేదని ఆవేదన వ్యక్తం చేశారు. ఒకవేళ ఈ కేసు పశ్చిమ బెంగాల్ పోలీసుల చేతుల్లోనే ఉండి ఉంటే దోషికి మరణ శిక్ష పడేలా చేసేవారని అన్నారు. ఆ పూర్తి వివరాలు మీకోసం.

ఆగస్టు 9వ తేదీన నార్త్ కోల్‌కతాలోని ఆర్జీ ప్రభుత్వ ఆస్పత్రిలో విధులు నిర్వహిస్తున్న ఓ ట్రైనీ వైద్యురాలిపై అత్యాచారం చేశారు. ఆపై ఆమెను అతి దారుణంగా హత్య చేశారు. ఈ విషయం వెలుగులోకి వచ్చిన వెంటనే బాధితురాలి మృతదేహాన్ని పోస్టుమార్టం నిమిత్తం ఆస్పత్రికి తరలించిన అధికారులు.. పోస్టుమార్టం నివేదిక చూసి షాకయ్యారు. ముఖ్యంగా ఆమె ప్రైవేటు భాగాల్లోంచి బ్లీడింగ్ అయినట్లు, శరీరంలోని అనేక భాగాలపైన గాయాల గుర్తులు ఉన్నట్లు తేలింది.

ఆపై ఈ కేసును బెంగాల్ పోలీసుల నుంచి సీబీఐకి బదిలీ చేశారు. దీనిలో భాగంగానే విచారణ అనంతరం ప్రత్యేక కోర్టుకు అభియోగాలు సమర్పించింది. దీంట్లో భాగంగానే ప్రధాన నిందితుడు సంజయ్ రాయ్ పేరును మాత్రమే ఛార్జ్‌షీట్‌లో చేర్చింది. ఈ కేసులో అనేక మంది డీఎన్ఏ దొరికినప్పటికీ.. ఒక్కడినే అరెస్ట్ చేయడం, దోషిగా తేల్చడంతో దేశ వ్యాప్తంగా నిరసనలు వ్యక్తం అవుతున్నాయి. ముఖ్యంగా బాధితురాలి తల్లిదండ్రులు సహా ఆర్జీ కార్ ఆస్పత్రి వైద్యులు కూడా ఇందులో మరికొంత మంది దోషులు ఉన్నారని చెబుతున్నారు. అలాగే నిందితుడు తనకీ కేసుతో ఎలాంటి సంబంధం లేదని చెప్పినా.. సీసీటీవీ ఫుటేజీ ఆధారంగా అతడే నిందితుడని న్యాయస్థానం తేల్చింది.

ఈక్రమంలోనే సోమవారం రోజు అతడికి జీవిత ఖైదు విధిస్తున్నట్లు వెల్లడించింది. అయితే ఈ కేసుపై పశ్చిమ బెంగాల్ ముఖ్యమంత్రి మమతా బెనర్జీ స్పందించారు. ఈ తీర్పుపై తానేమాత్రం సంతృప్తి చెందలేదని చెప్పారు. జూనియర్ వైద్యురాలి హత్యాచార ఘటనకు సంబంధించిన కేసులో దోషికి మరణ శిక్ష పడాలని తామంతా డిమాండ్ చేశామని అన్నారు. కానీ అలా జరగలేదని.. ఈ కేసును బెంగాల్ పోలీసుల నుంచి బలవంతంగా సీబీఐకి బదిలీ చేశారన్నారు.

ఈ కేసు బెంగాల్ పోలీసుల చేతుల్లోనే ఉంటే దోషికి మరణ శిక్ష పడేలా చేసేవాళ్లని.. అసలు విచారణ ఎలా సాగిందో కూడా తెలియదంటూ వెల్లడించారు. రాష్ట్ర పోలీసులు విచారంచిన ఇలాంటి అనేక కేసుల్లో దోషులకు మరణ శిక్ష పడిందని.. ప్రస్తుత తీర్పు మాత్రం ఏమాత్రం సంతృప్తి కరంగా లేదన్నారు.