ఇంగ్లాండ్‌ను షేక్‌ చేసిన అభిషేక్ శర్మ.. తొలి టీ20లో భారత్‌ ఘన విజయం

ఇంగ్లాండ్‌తో ఐదు మ్యాచ్‌ల టీ20 సిరీస్‌లో భారత్‌ బోణీ కొట్టింది. తొలి మ్యాచ్‌లో పర్యాటక ఇంగ్లాండ్‌ను చిత్తు చేసి.. విజయంతో సిరీస్‌ను ప్రారంభించింది. కోల్‌కతాలోని ఈడెన్ గార్డెన్స్ వేదికగా జరిగిన ఈ మ్యాచ్‌లో 8 వికెట్ల తేడాతో యువ భారత్‌ ఘన విజయం సాధించింది. తొలుత ఇంగ్లాండ్‌ను 132 పరుగులకే కుప్పకూల్చిన భారత్.. అనంతరం ఆ లక్ష్యాన్ని

13 ఓవర్లలోపే ఛేదించింది. దీంతో సిరీస్‌లో 1-0తో ఆధిక్యంలోకి దూసుకెళ్లింది. అభిషేక్ శర్మ ‘ప్లేయర్ ఆఫ్ ది మ్యాచ్’గా నిలిచాడు. కోల్‌కతాలో భారత్‌కు ఇది వరుసగా 7వ టీ20 విజయం కావడం విశేషం. ఇంకొక విజయం సాధిస్తే, ఇంగ్లాండ్‌తో కలిసి అగ్రస్థానంలో నిలుస్తుంది.

 ఈ మ్యాచ్‌లో టాస్‌ ఓడి బ్యాటింగ్‌కు దిగిన ఇంగ్లాండ్‌.. భారత బౌలర్ల ధాటికి బెంబేలెత్తిపోయింది. ఓ వైపు అర్షదీప్ సింగ్.. మరోవైపు వరుణ్ చక్రవర్తి ధాటికి.. వరుసగా వికెట్లు కోల్పోయింది. ఓపెనర్లు ఫిలిప్‌ సాల్ట్‌ (0), బెన్ డకెట్‌ (4)ను అర్షదీప్ పెవిలియన్ పంపించగా.. మిడిల్ ఆర్డర్ బ్యాటర్లను వెనక్కి పంపే బాధ్యత వరుణ్ చక్రవర్తి తీసుకున్నాడు. దీంతో ఆ జట్టు స్కోరు బోర్డు నెమ్మదిగా సాగింది. అయితే కెప్టెన్ జోస్ బట్లర్ (44 బంతుల్లో 68 రన్స్‌) ఒంటరి పోరాటంతో ఇంగ్లాండ్‌ 20 ఓవర్లు బ్యాటింగ్ చేసింది. సరిగ్గా 20 ఓవర్లలో 132 పరుగులకు ఆలౌట్ అయింది.

భారత బౌలర్లలో వరుణ్ చక్రవర్తి 3 వికెట్లతో సత్తా చాటాడు. అర్షదీప్ సింగ్, హార్దిక్ పాండ్యా, అక్షర్‌ పటేల్‌లు తలా రెండు వికెట్లు చొప్పున పడగొట్టారు.

అనంతరం స్వల్ప లక్ష్యంతో బరిలోకి దిగిన భారత్‌కు.. సంజూ శాంసన్, అభిషేక్ శర్మల జోడీ శుభారంభం ఇచ్చింది. ముఖ్యంగా సంజూ శాంసన్ ఆకాశమే హద్దుగా చెలరేగిపోయాడు. గస్‌ అట్కిన్‌సన్ వేసిన ఇన్నింగ్స్ రెండో ఓవర్‌లో 4 ఫోర్లు, ఒక సిక్స్‌తో ఏకంగా 22 రన్స్ రాబట్టాడు. ఆ తర్వాత అభిషేక్ శర్మ కూడా జోరందుకోవడంతో స్కోరు బోర్డు పరుగులు పెట్టింది. 20 బంతుల్లో 26 రన్స్ చేసిన తర్వాత సంజూ ఔట్ అయ్యాడు. ఆ తర్వాత కాసేపటికే సూర్యకుమార్ యాదవ్‌ (0) కూడా వెనుదిరిగాడు.

ఈ దశలో తిలక్ వర్మ (16 బంతుల్లో 19 నాటౌట్‌)తో కలిసి అభిషేక్ శర్మ విధ్వంసం సృష్టించాడు. 20 బంతుల్లోనే హాఫ్ సెంచరీ మార్కు అందుకున్నాడు. ఆ తర్వాత కూడా 200లకు పైగా స్ట్రైక్ రేట్‌తో పరుగులు రాబట్టాడు. 34 బంతుల్లో 79 రన్స్ చేసిన తర్వాత అతడు ఔట్ అయ్యాడు. అయితే అప్పటికే మ్యాచ్‌ భారత్ చేతుల్లోకి వచ్చేసింది.

ఆ తర్వాత హార్దిక్ పాండ్యా (3), తిలక్ వర్మలు లాంఛనాన్ని పూర్తి చేశారు. 12.5 ఓవర్లలో భారత్ 3 వికెట్లు కోల్పోయి 133 పరుగుల లక్ష్యాన్ని ఛేదించింది. సిరీస్‌లో 1-0తో ఆధిక్యంలోకి వెళ్లింది. రెండో టీ20 మ్యాచ్‌లో ఈనెల 25న చెన్నై వేదికగా జరగనుంది.