హైదరాబాద్‌లో భారీగా పడిపోయిన ఇళ్ల అమ్మకాలు

 కరోనా తర్వాత 2023-24లో రియల్ ఎస్టేట్‌కు డిమాండ్ ఊహించని స్థాయిలో పెరగ్గా.. మళ్లీ కొన్ని నెలలుగా పరిస్థితి మారిపోయింది. సీన్ రివర్స్ అయిందని చెప్పొచ్చు. దేశవ్యాప్తంగా రియల్ ఎస్టేట్ డిమాండ్ తగ్గినట్లు తెలుస్తోంది. తాజాగా దేశవ్యాప్తంగా టాప్-9 నగరాల్లో ఇళ్ల విక్రయాలు.. 23 శాతం తగ్గాయి. సరఫరా కూడా 34 శాతం పడిపోవడం ఆందోళన కలిగిస్తోంది. 2025 సంవత్సరం తొలి త్రైమాసికానికి (జనవరి-మార్చి) సంబంధించి.. తాజాగా డేటా అనలిటిక్స్ సంస్థ.. ప్రాప్‌ఈక్విటీ తన రిపోర్టులో ఈ వివరాల్ని వెల్లడించింది. ఇళ్ల ధరలు పెరగడం, రాజకీయ భౌగోళిక ఉద్రిక్త పరిస్థితుల కారణంగా.. ఇంకా భారత ఆర్థిక వ్యవస్థలోనూ అనిశ్చితి వల్ల అమ్మకాలు తగ్గినట్లు నివేదిక పేర్కొంది.

అయినప్పటికీ.. మార్కెట్‌లో డిమాండ్ బలంగా ఉందని, సరఫరాకు తగినంత కొనుగోళ్లు జరుగుతున్నాయని ప్రాప్‌ఈక్విటీ సీఈఓ సమీర్ జసుజా అన్నారు. రానున్న రోజుల్లో పరిస్థితి మెరుగుపడుతుందని ఆశిస్తున్నట్లు వెల్లడించారు. బెంగళూరు, ఢిల్లీ-ఎన్సీఆర్ మినహా మిగిలిన నగరాల్లో అమ్మకాలు తగ్గాయి. బెంగళూరు మినహా అన్ని నగరాల్లో కొత్త ఇళ్ల నిర్మాణం తగ్గిందని వెల్లడించింది ప్రాప్‌ఈక్విటీ.

 ప్రాప్‌ఈక్విటీ నివేదిక ప్రకారం.. 2025 మొదటి త్రైమాసికంలో ఇళ్ల అమ్మకాలు 1,05,791 యూనిట్లుగా ఉన్నాయి. గత ఏడాది ఇదే సమయంలో 1,36,702 యూనిట్లు అమ్ముడయ్యాయి. అంటే అమ్మకాల్లో భారీగా తగ్గుదల కనిపించింది. సరఫరా విషయానికి వస్తే, ఈ ఏడాది మొదటి త్రైమాసికంలో 80,774 యూనిట్లు అందుబాటులో ఉన్నాయి. గత ఏడాది ఇదే కాలంలో 1,22,365 యూనిట్లు సరఫరా అయ్యాయి. గత మూడు త్రైమాసికాలుగా లక్ష యూనిట్ల కంటే తక్కువ సరఫరా నమోదైంది.

సాధారణంగా గత కొంతకాలంగా అధిక ఇళ్ల సరఫరా నమోదైన.. హైదరాబాద్, పుణె, థానే నగరాల్లో అమ్మకాలు తగ్గాయి. 2022, 2023 సంవత్సరాల్లో ఈ నగరాల్లోనే అత్యధిక సరఫరా ఉండేది. కానీ 2024లో అమ్మకాలు బాగా పడిపోయాయి. ఈ త్రైమాసికంలో గత ఏడాది కంటే 28,227 యూనిట్ల తక్కువ సరఫరా నమోదైంది.

బెంగళూరులో ఇళ్ల అమ్మకాలు 10 శాతం పెరిగి 18,508 యూనిట్లకు చేరుకున్నాయి. ఇది మొత్తం అమ్మకాల్లో 17 శాతం వాటాను కలిగి ఉంది. గత ఏడాది ఇదే సమయంలో ఇది 12 శాతం మాత్రమే. ఢిల్లీ-ఎన్సీఆర్ లో  అమ్మకాలు 10 శాతం పెరిగి 11,221 యూనిట్లకు చేరుకున్నాయి. ఇది మొత్తం అమ్మకాల్లో 11 శాతం వాటాను కలిగి ఉంది. గతేడాది ఇదే సమయంలో ఇది 7 శాతంగానే ఉంది.

హైదరాబాద్‌లో అమ్మకాలు గతేడాది ఇదే సమయంతో పోలిస్తే 47 శాతం పడిపోయాయి. కొత్త ఇళ్ల సరఫరా 38 శాతం డౌన్ ఉంది. ముంబైలో 36 శాతం, పుణేలో 33 శాతం, కోల్‌కతాలో 28 శాతం, థానేలో 27 శాతం, నవీ ముంబైలో 7 శాతం, చెన్నైలో 2 శాతం ఇళ్ల విక్రయాలు పడిపోయాయి.