ఉద్యోగం కోసం పెళ్లి చేసుకున్నవాడినే చంపేసింది

ఉత్తర ప్రదేశ్ బిజ్నోర్ జిల్లా ముక్రంద్‌పూర్ గ్రామానికి చెందిన 29 ఏళ్ల దీపక్ కుమార్ ముందుగా సీఆర్పీఎఫ్ జవాన్‌గా పని చేశాడు. అయితే ఇతడికి 2023 మార్చిలో రైల్వేలో ఉద్యోగం వచ్చింది. ప్రస్తుతం అందులోనే టెక్నీషియన్‌గా పని చేస్తున్నాడు. అయితే దీపక్ ఉద్యోగం చేయడానికి కొన్నేళ్ల ముందు నుంచే అదే ప్రాంతానికి చెందిన 27 ఏళ్ల శివానీని ప్రేమించాడు. ఉద్యోగం వచ్చాకా ఇరు కుటుంబాలకు ఈ విషయం తెలుపగా వారు కూడా పెళ్లికి అంగీకరించారు. ఇలా వీరిద్దరూ 2023 జూన్ 17వ తేదీన పెళ్లి చేసుకున్నారు. దీపక్ ఇంట్లోనే కాపురం పెట్టారు. కొన్నాళ్లు బాగానే ఉన్నప్పటికీ.. ఆ తర్వాత శివానీకి అత్తగారితో గొడవలు జరగడం ప్రారంభం అయింది. ఎంత చెప్పినా ఇద్దరూ వినకపోవడంతో చేసేదేం లేక దీపక్ వేరు కాపురం పెట్టాడు.

ముఖ్యంగా నజీదాబాద్‌లోని ఆదర్శ నగర్‌కు భార్యను తీసుకు వచ్చి కాపురం ఉంటున్నాడు. ఇక్కడి నుంచే రోజూ ఉద్యోగానికి వెళ్లి వస్తున్నాడు. ఇలా వీరి కాపురం హాయిగానే సాగగా.. ఆరు నెలల క్రితమే వీరికి బాబు పుట్టాడు. ఇదంతా బాగానే ఉండగా శివానీకి భర్త చేస్తున్న ఉద్యోగంపై కన్ను పడింది. భర్తకు బదులుగా తానే రైల్వే జాబ్ చేయాలనుకుంది. కానీ ఇప్పుడు చదివి ఉద్యోగం సంపాదించడం కష్టం కాబట్టి.. తన భర్త చనిపోతే ఆ ఉద్యోగం తనకే వస్తుందని భావించింది. ఎలాగైనా సరే అతడిని చంపేసి ఉద్యోగాన్ని పొందాలనుకుంది. అందుకోసం ఓ పథకం కూడా వేసింది. ముఖ్యంగా శ్రీరామనవమి పండుగ రోజు భర్తతో మత్తు మందు కలిపిన పాలు తాగించింది. ఆపై గొంతు నులిమి హత్య చేసింది.

తన పుట్టింటి వారికి, అత్తింటి వారికి ఫోన్ చేసి పూజ చేస్తుండగా దీపక్‌కు గుండెపోటు వచ్చిందని ఆస్పత్రికి తీసుకెళ్తున్నట్లు శివానీ ఫోన్ చేసి చెప్పింది. నేరుగా ఆస్పత్రికి రమ్మని వివరించింది. ఇలా అంతా కలిసి ఆస్పత్రికి వెళ్లగా.. అప్పటికే దీపక్ ప్రాణాలు కోల్పోయినట్లు వైద్యులు ధ్రువీకరించారు. అయితే అతడు రైల్వే ఉద్యోగి కావడంతో పోస్టుమార్టం నిర్వహించాలని వైద్యులు చెప్పారు. కానీ అందుకు శివానీ అంగీకరించలేదు. ఏం చెప్పినా ఆమె వినకపోవడం, దీపక్ మెడపై గాయలు ఉండడం గనిమించారు అత్తింటి వారు. ముఖ్యంగా దీపక్ సోదరుడు పియూష్ కచ్చితంగా పోస్టుమార్టం చేయాలని పట్టుబట్టాడు. అలాగే పోలీసులకు కూడా శివానీపై తనకు అనుమానం ఉందంటూ ఫిర్యాదు చేశాడు.

ఈక్రమంలోనే కేసు నమోదు చేసుకున్న పోలీసులు దర్యాప్తు చేపట్టారు. ముఖ్యంగా దీపక్ భార్య శివానీని అదుపులోకి తీసుకుని విచారిస్తున్నారు. మరోవైపు దీపక్ కుటుంబ సభ్యులు శివానీ ఒక్కతే హత్య చేసి ఉండదని.. మరెవరైనా సాయం చేసి ఉంటారని అనుమానాలు వ్యక్తం చేస్తున్నారు. కేవలం ఉద్యోగమో, డబ్బు కోసమో ఆమె ఇలా చేసుండకపోవచ్చని, మరేదైనా ప్రేమ వ్యవహారం కూడా ఉండి ఉండవచ్చని అంటున్నారు. చూడాలి మరి ఈ కేసు ఏవైపు మళ్లుతుందనేది.