రోజుకు ఎంత బి12 విటమిన్ శరీరానికి అవసరం

బి12 విటమిన్ లోపం వల్ల ఎన్నో సమస్యలు వస్తాయి. విపరీతమైన నీరసం, ఆకలి లేకపోవడం లాంటి లక్షణాలు కనిపిస్తాయి. ఈ విటమిన్లు పుష్కలంగా అందాలంటే సరిపడ మోతాదులో కొన్ని ఆహార పదార్థాలు తీసుకోవాలి. వీటిలో ముఖ్యంగా గుడ్లు, చికెన్ లివర్ చేర్చుకోవాలి. వీటిలో బి12 విటమిన్లు ఎక్కువగా ఉంటాయి. ఈ లోపంతో ఇబ్బంది పడే వాళ్లకు ఇవి సూపర్ ఫుడ్స్ గా పని చేస్తాయి.

ఉన్నట్టుండి నీరసం రావడం. కాసేపు కుర్చీలో కూర్చుని లేవగానే గిర్రున కళ్లు తిరిగినట్టు కావడం. ఆకలి మందగించడం..ఇలాంటి లక్షణాలన్నీ మీలో కనిపిస్తున్నాయంటే కచ్చితంగా అది బి12 లోపమే. శరీరానికి పోషకాలు ఎంత అవసరమో..అంతే స్థాయిలో విటమిన్లూ అవసరమే. మన బాడీ ఇంజిన్ అనుకుంటే...ఈ విటమిన్లే ఫ్యుయల్. అవి లేకుండా మనం ముందుకు వెళ్లలేం. ముఖ్యంగా బి12 విటమిన్ శరీరాన్ని చురుగ్గా, ఆరోగ్యంగా ఉంచడంలో కీలక పాత్ర పోషిస్తుంది. అంతే కాదు. ఎర్ర రక్త కణాల సంఖ్య పెంచడంలో ఈ విటమిన్ లు తోడ్పడతాయి. అందుకే..ఈ విటమిన్ లు శరీరానికి సరిపడ మోతాదులో అందాలని వైద్యులు సూచిస్తుంటారు. అయితే చాలా మందిలో ఈ విటమిన్ లోపం ఉంటోంది. ఈ సమస్య క్రమంగా ఆరోగ్యంపై తీవ్ర ప్రభావం చూపిస్తోంది. బి 12 విటమిన్ శరీరానికి అందాల్సిన ఒకే ఒక మార్గం ఆహారం. ఈ విషయంలో నిర్లక్ష్యం చేస్తే అది రకరకాల అనారోగ్య సమస్యల్ని తెచ్చి పెడుతుంది. అయితే..అసలు బి12 విటమిన్ లోపానికి కారణాలేంటి. దీని వల్ల శరీరానికి కలిగే నష్టాలేంటో తెలుసుకుందాం.

బి12 లోపంతో అనారోగ్యం..

శరీరానికి సరిపడ మోతాదులో బి 12 విటమిన్ అందకపోతే రకరకాల సమస్యలు ఎదుర్కోవాల్సి ఉంటుంది. అందులో ముందుగా గ్యాస్ట్రిస్ సమస్య తీవ్రంగా ఇబ్బంది పెడుతుంది. సాధారణంగా పొట్టలో హైడ్రోక్లోరిక్ యాసిడ్ ఉంటుంది. మనం తీసుకునే ఆహారంలోని బి12 విటమిన్లను ఇది గ్రహిస్తుంది. తద్వారా శరీరానికి ఆ విటమిన్ లను అందిస్తుంది. ఎప్పుడైతే బి12 విటమిన్ లు లేని ఆహారాన్ని ఎక్కువగా తీసుకుంటారో క్రమంగా ఆ మోతాదు తగ్గిపోతుంది. ఈ కారణంగా జీర్ణక్రియలో సమస్యలు వచ్చి మంట మొదలవుతుంది. ఇంకొందరిలో ఇది అనీమియాకి దారి తీసే ప్రమాదముంది. జీర్ణక్రియకు సంబంధించిన అన్ని జబ్బులూ వచ్చేందుకు అవకాశం ఉంటుంది. దీంతో పాటు విపరీతంగా ఆల్కహాల్ తీసుకునే వాళ్లలోనూ బి12 విటమిన్ లోపం కనిపిస్తుంది. ఇలాంటి వాళ్లలో డైజెస్టివ్ సిస్టమ్ సరిగ్గా పని చేయదు. ఫలితంగా ఈ విటమిన్ శరీరానికి అందడంలో అడ్డంకులు ఏర్పడతాయి.

బి 12 విటమిన్ లోపం - లక్షణాలు

బి12 విటమిన్ లోపం తలెత్తితే..శారీరకంగానే కాకుండా మానసికంగానూ ఇబ్బందులు ఎదుర్కోవాల్సి వస్తుంది అని వివరిస్తున్నారు వైద్యులు. ఈ లోపం ఉన్న వాళ్లు ఏ చిన్న పని చేసినా త్వరగా అలిసిపోతుంటారు. వాంతులు, విరేచనాలు లాంటివి తరచూ ఇబ్బంది పెడుతుంటాయి. అన్నింటి కన్నా ప్రమాదకరమైన లక్షణం..ఆకలి పూర్తిగా తగ్గిపోవడం. ఆకలి లేకపోవడం వల్ల ఏమీ తినాలనిపించదు. ఈ కారణంగా ఉన్నట్టుండి బరువు తగ్గిపోతారు. నోరు ఎప్పుడూ చేదుగా అనిపిస్తుంటుంది. కొందరిలో చర్మం పసుపు రంగులోకి మారిపోతుంది. బి12 విటమిన్ లోపం..నరాల వ్యవస్థపైనా ప్రభావం చూపిస్తుంది.

చేతులు పాదాలు తిమ్మిరి ఎక్కడం, కంటి చూపు మందగించడం, జ్ఞాపక శక్తి కోల్పోవడం లాంటి లక్షణాలు కనిపిస్తాయి. కాసేపు నడవడానికి, ఎవరితోనైనా మాట్లాడడానికి కూడా ఇబ్బందిగా అనిపిస్తుంది. మానసికంగానూ ఇది దెబ్బ తీస్తుంది. కొంత మంది ఇదంతా తట్టుకోలేక డిప్రెషన్ లోకి వెళ్లిపోతారు. తమకు ఏదో అయిపోతోందని ఆందోళన చెందుతుంటారు. పూర్తిగా ప్రవర్తనలోనే మార్పు వస్తుంది.

చికెన్ లివర్ తినాలి

వైద్య నిపుణుల సూచనల ప్రకారం..పెద్ద వాళ్లు రోజూ కనీసం 2.4 మైక్రో గ్రాముల బి12 విటమిన్ లు తీసుకోవాలి. గర్భిణులు 2.6 , బాలింతలు అయితే 2.8 మైక్రో గ్రాముల మేర తీసుకోవాలి. సాధారణంగా మాంసంలో బి12 విటమిన్లు ఎక్కువగా ఉంటాయి. చికెన్ లివర్, బ్రెస్ట్ లో ఈ విటమిన్లు అధికంగా ఉంటాయి. చేపల్లోనూ ఇదే స్థాయిలో బి12 విటమిన్ లభిస్తుంది. తరవాత గుడ్లు, పాల పదార్థాలతోనూ ఇవి పుష్కలంగా లభిస్తాయి. గుడ్లలోని పచ్చ సొన ద్వారా ఈ విటమిన్లు అందుతాయి. రోజూ ఓ గుడ్డు తింటే బి12 విటమిన్ లోపాన్ని సరిదిద్దుకోవచ్చు. గుడ్లలో మైక్రోగ్రాముల బి12 విటమిన్లు ఉంటాయి. రోజూ ఓ గ్లాసెడు పాలు తాగితే శరీరానికి ఎక్కువ మొత్తంలో బి12 విటమిన్ అందుతుంది. ఆవు పాలల్లో అయితే దాదాపు 1.4 మైక్రో గ్రాముల విటమిన్ బి 12 ఉంటుంది. చీజ్, మష్ రూమ్స్ లోనూ ఈ విటమిన్లు అధికంగా ఉంటాయి. ఆహారంలో తరచూ వీటిని చేర్చుకోవడం ద్వారా శరీరానికి అవసరమైన మేర బి12 అందుతుంది.

మరి కొన్ని జాగ్రత్తలు..

అయితే..బి12 లోపం తలెత్తకుండా మరి కొన్ని జాగ్రత్తలు తీసుకోవాలని సూచిస్తున్నారు వైద్యులు. ముఖ్యంగా ఆల్కహాల్ తీసుకునే అలవాటు ఉన్న వాళ్లు వెంటనే ఆ వ్యసనం నుంచి బయటపడాలని తేల్చి చెబుతున్నారు. రోజూ ఆల్కహాల్ తీసుకోవడం వల్ల జీర్ణక్రియ దెబ్బ తింటుంది. ఈ కారణంగా మిగతా సమస్యలు వస్తాయి. కొంత మంది డయాబెటిస్ కోసం వేసుకునే మందుల వల్ల బి12 విటమిన్ లోపం తలెత్తుతుంది. అలాంటి వాళ్లు తప్పకుండా ఆహార నియమాలు పాటించాలి. బి12 ఎక్కువగా ఉండే ఆహార పదార్థాలు తప్పనిసరిగా తీసుకోవాలి. మల్టీ విటమిన్ ట్యాబ్లెట్లతో పాటు బి12 ట్యాబ్లెట్లు కూడా అందుబాటులోకి వచ్చాయి. వాటిని కూడా తీసుకోవచ్చు. కానీ సహజంగా ఈ విటమిన్లు పెంచుకునేందుకు ప్రయత్నించడం ఆరోగ్యానికి మంచిది.